Loksins! Keldnaland fyrir spítala rímar við norska reynslu.

Nú eru fjórtán ár síðan síðuhafi skoðaði og kynnti sér spítalana í Osló og Þrándheimi, sem þá voru nýbyggðir með tveimur ólíkum aðferðum: Í Osló á auðri lóð, alveg frá grunni, en í Þrándheimi með bútasaumsaðferðinni sem hér er í gangi við Hringbraut. 

Í Noregi var það manna mál 2005 að spítalinn nýi í Osló mætti teljast flottasti spítali í Evrópu, en að hins vegar væri bútasaumsspítalinn í Þrándheimi "víti til varnaðar."

Fréttaflutningur um þessi spítalamál Norðmanna var kæfður með mjög úthugsuðum aðferðum þeirra, sem af einhverjum ástæðum höfðu gert Hringbrautarspítalann að eina kostinum hér heima. 

Á þeim tíma hefði hugsanlega verið skárra að byggja við Borgarspítalann vegna meira landrýmis, en í staðinn var landrýminu eytt í nýja íbúðabyggð, sem að mestu leyti var fyrir eldri kynslóðina. 

Keldnalandið fékkst aldrei rætt, en þó liggur það skammt frá stærstu krossgötum landsins og höfuðborgarsvæðisins.  

Loksins nú örlar á framtíðarsýn, sem betur hefði verið látin ráða ferð fyrir 15 árum og er ástæða til að fagna því. 

 

Vill skoða Keldnaland undir nýjan spítala

Helmingur allra banaslysa á vélknúnum hjólum er vegna vímu.

Ef menn kynna sér gögn um slys á vélhjólum og bera þau saman við gögn um slys á bílum, kemur í ljós, að ríflega helmingur banaslysa og alvarlegra slysa á vélknúnum hjólum er vegna þess að ökumaðurinn er í vímu af völdum áfengis eða annarra vímuefna. 

Þetta er meira en þrefalt hærri tala en raunin er hjá ökumönnum bíla. 

Rafhlaupahjól og rafreiðhjól eru vélknúin farartæki og því einkennilegt að lesa í fréttum, að einhver undrist og finnist "mikið gert úr því" að árekstur og slys hafi orðið vegna hugsenlegrar ölvunar ökumanns á rafhlaupahjóli.   

Þótti mikið gert úr hlaupahjólsárekstrinum

Dýrlegur sumardagur í gær. Skaflinn merki um kalt sumar?

Dýrlegt sumarveður var á stórum hluta landsins í gær og sem dæmi um blíðuna eru myndir, sem teknar voru í Hvalfirði og verða settar á síðuna, en Hvalfjörður er ekkert sérstaklega þekktur fyrir að vera spegilsléttur í norðaustanátt. 

Öll hæstu fjöllin á suðvesturhorninu voru snjólaus á þeim hliðum, sem sneru að sól, og sum raunar snjólaus með öllu eins og Skjaldbreiður, sem er 1060 metra hár. 

Það er óhætt að segja að sínum augum líti hver á silfrið hvað snertir þræturnar um hlýnandi loftslag. 

Nýjasta innleggið hjá einum af þeim, sem síðuhafi rakst á í fyrradag, var athyglisvert. 

Hann sagði það væri augljóst merki um það að sumarið hefði verið kalt, hvað það tók skaflinn í Gunnlaugsskarði í Esjunni langan tíma að hverfa með öll. 

Ef sumarið hefði verið hlýtt hefði hann horfið mun fyrr í stað þess að hverfa ekki alveg fyrr en í blálokin á september!  

Skaflinn í Gunnlaugsskarði aftur horfinn