Ekki ónýtt að eiga svona Íslandsvini á samfélagsmiðlunum.

Samfélagsmiðlarnir og áhrif þeirra eru af misjöfnu tagi, og sumt ekki fagnaðarefni. 

En fróðlegt gæti verið að skoða og athuga þau miklu áhrif sem svokallað frægt fólk hefur haft á þeim vettvangi við að mæra land okkar á svo áhrifaríkan hátt, að það hefur verið á við milljarða auglýsingarherferðir.  

Staðir, sem voru til án þess að verða alþekktir hér heima, hvað þá erlendis, og höfðu til dæmis verið sýndir í íslenskum fjölmiðlum, fengu eins konar fæðingu eða nýtt líf á heimsvísu. 

Þetta voru staðir eins og Fjaðrárgljúfur, Reynisfjara, Seljalandsfoss, Stuðlagil og jafnvel gamalt flugvélarflak á Sólheimsandi. 

Nú hefur íslensk ferðaþjónusta og ferðaþjónastan almennt á heimsvísu, orðið fyrir gríðarlegu höggi í formi heimsfaraldurs COVID-19. 

Þá er ekki ónýtt að eiga bæði gamla og nýja Íslandsvini með alþjóðafrægð, sem halda orðstír lands okkar á lofti á heimsvísu.  

Terry Crews dásamar íslenska náttúru

Egilsstaðaflugvöllur - klára málið - koma svo!

Flugvallarstæði Egilsstaðaflugvallar hefur flest það til að bera sem getur gert hann að boðlegum og öruggum varaflugvelli fyrir millilandaflug.  

Brýnt er að útbúa fullkomnar aðstæður til stæða og akstursbrauta, en eitt er það sem vill oft gleymast í umræðunni, að það er löngu kominn tími til að lengja flugbrautina með því annað hvort að færa þjóðveginn frá brautarendanum og hafa hann miklu sunnar, eða að láta veginn liggja undir brautina.

Síðuhafi fékk einu sinni að vera "á prikinu" í aðflugi Boeing 757 til norðurs með smekkfulla vél. 

Það var logn, en sló í 5-10 hnúta sitt á hvað. 

Svo óheppilega vildi til að á stuttri lokastefnu lagðist golan undan flugstefnunni og vegna hinna hlálegu hindrana af ljósastaurum við brautarendann "flaut" þotan talsvert langt inn yfir brautinni. 

Og seint var að hætta við, en lendingin varð þannig, að þotan þurfti gervalla brautina alveg út á enda. 

Með fullri virðingu fyrir íslensku kúnni og mjólkurframleiðslu er það fráleitt að nokkrir tugir hektara fyrir tún séu látnir hafa forgang yfir jafn bráðnauðsynlegt mannvirki og almennilegur alþjóðaflugvöllur er. 

Ekkert annað land í Evrópu er þannig staðsett, að þaðan séu 1330 kílómetrar til næsta lands.  

Vaxandi eldsumbrot í iðrum jarðar í aðeins nokkurra kílómetra fjarlægð frá Keflavíkurflugvelli sýna, að þörfin fyrir fullkominn  varaflugvöll á öðru veðursvæði og utan umbrotasvæðis Reykjanesskaga er of mikil til þess að lengur verði undan því vikist að klára þetta alltof langdregna mál, stækkun og endurbætur á Egilsstaðaflugvelli og nauðsynlegum þjónustumöguleikum í sambandi við hann. 

Klára þetta!  Koma svo!

Vilja byggja flugvöllinn upp

Bagalegt að Biden kunni ekki vísu K.N.

Það var bagalegt í kappræðum Trumps og Bidens þegar sá síðarnefndi tafsaði. Í næstu kappræðum kæmi sér vel fyrir hann að hafa kynnt sér kveðskap Vestur-Íslendingsins K.N. þegar Trump gjammar mest fram í fyrir honum. 

Þá lægi þessi vísa vel við:   

Berja og skamma þyrfti þig

þrællinn grimmi, svei þér! 

Hættu að gjamma og glefsa´í mig! 

Go til hell and stay there!  

Þetta sögðu Íslendingar um kappræðurnar