Gullni hringurinn á fjórum klst með alls 220 króna orkukostnaði, 0,5 l/100km.

Rannsóknum varðandi möguleika á nýrri byltingu í samgöngum undir kjörorðinu "Orkuskipti-útskipti-koma svo!", sem staðið hafa síðan i júní, lauk með ferð um Gullna hringinn sem hófst um hádegi sl. fimmtudag og varð reyndar 283 kílómetrar í stað 220 ef farin er stysta mögulega leið. 

Farið var austur um Hellisheiði, en niður í Skálholt og í Laugarás og einnig um Grímsnes á leiðinni til Þingvalla í bakaleiðinni. 

Myndirnar, sem settar verða í þennan pistil, voru teknar í ferðinni. 

Farkosturinn var rafknúið léttbifhjól af gerðinni Super Soco CUx, en hjól af þeirri gerð voru fyrstu rafknúnu hjólin af þessari stærð með útskiptanlegum rafhlöðum, sem flutt voru til landsins í sumar. 

Þetta eintak er með 39 lítra farangurskassa, sem rúmar tvær aukarafhlöður. 

Hjólið með farangurskassanum kostar 300 þúsund krónur nýtt. 

Tímasetningin markaðist af því að koma við og stansa í Skálholti í lok fjöltrúarráðstefnunnar Faith for Earth frá hádegi fram til hálf fimm. 

Niðurstöðurnar eru fengnar að hluta til með hliðsjón af ferð á sama hjóli í ágúst þegar farnir voru 132 kílómetrar á sömu hleðslunnni án þess að hlaða, frá Reykjavík til Selfoss, til baka, upp í Kollafjörð og til baka.   

Niðurstaðan var sláandi.

Tæknilega hægt að fara á rafknúnu léttbifhjóli, sem kostar 300 þúsund krónur nýtt, á ferðatíma upp á fjórar klukkustundir nettó fyrir 220 krónur í orkukostnað alls, eða eina krónu á hvern kílómetra.

Þetta samsvarar 0,5 lítra eyðslu á 100 km á bensínknúnu hjóli.  

Hægt væri að nota þrefalt dýrari rafhjól, sem eru komin á markaðinn erlendis, til þess að ná fullum hraða á við bíl og fara þessa leið á þremur klukkustundum nettó.

Og nú eru að koma á markaðinn léttir rafbílar með útskiptanlegum rafhlöðum, SEAT Minimo og Fiat Centoventi. 

Ferðin um hringinn var ekki farin við sumarhita aðstæður.

Meðal lofthiti var 4 stig, en fór niður í frostmark og ísingu, og á bakaleiðinni frá Grímsnesi upp til Þingvalla og þaðan í bæinn, var mikill mótvindur, meira að segja með hviðum upp á 27 metra á sekúndu frá Steingrímsstöð um Þingvelli og Mosfellsheiði. 

Lágur lofthiti dró um ca. 10% úr drægninni, þannig að í sumarhita væri árangurinn enn betri. 

Forsendan fyrir nýtingu nýrrar tækni varðandi útskiptalegar rafhlöður er, að þær verði aðgengilegar líkt og gaskútar á orkusölustöðum, þar sem hægt er að skipta út tómum rafhlöðum fyrir hlaðnar á innan við mínútu.

Í gangi er mikil bylting í notkun útskiptanlegra rafhlaðna og komin á markaðinn fjölmörg ný rafknúin léttbifhjól með möguleika á 90 km hraða og einnig að koma til skjalanna léttir rafbílar með útskiptanlegum rafhlöðum. 

Á bakaleiðinni kólnaði hratt við sólarlag og byrjuð var að myndast lúmsk ísing á vegunum.

Var því ákveðið, af því að hjólið er ekki enn komið á vetrardekk, að fara niður i Laugarás. 

Bíða þess þar að og bíða þar til morguninn eftir svo að hægt væri að taka þær myndir, sem eftir væri að taka. 

Einnig að hlaða allar þrjár rafhlöðurnar. 

Ferðin um þennan lengda Gullna hring var afar ánægjuleg í fallegum haustlitum og þeirri gefandi tilfinnningu sem algerlega hljóðlaus farkostur getur gefið í íslenskri náttúru. 

Frá Skálholti til Gullfoss og til baka aftur var ekki mann að sjá fyrr en í Minni-Borg og Grímsborgum. 

 

 

 

 

Gylling haustsins gefur eftir

Þarf endurskoðaðar heilsíðuauglýsingar um Þýskaland?

Að undanförnu hafa heilsíðuauglýsingar áhugamanns um viðbrögð við kórónaveirunni vakið athygli og umræður hér á landi. Í þeim hefur verið mærð eins konar þýsk leið í þessum málum, sem byggist á mun mildari sóttvarnaraðgerðum en hér á landi. 

Í þessum auglýsingum hafa íslenskar sóttvarnaraðgerðir verið harðlega gagnrýndar og taldar valda ómældu tjóni, sem stingi heldur betur í stúf við einstaklega gott ástand í Þýskalandi.  

Nýjustu fréttir frá Þýskalandi sýna hins vegar núna, að þar er ástandið að komast á ógnarhraða upp á svipað stig og það var í vor, og frá Berlín berast fréttir um örvætingarfullar og einstaklega harðar aðgerðir. 

Þessar fréttir hljóta hins vegar að vekja upp nýjar spurningar í þessum efnum, sem gætu orðið tilefni til nýrra heilsíðuauglýsinga. 

Nú er Berlín að vísu ekki allt Þýskaland frekar en New York er öll Bandaríkin, en Berlín er samt um það bil tíu sinnum fjölmennari en Ísland og til dæmis hliðstæð að því leyti, að þar hefur fyrirbærið "skyldudjamms" verið stundað af kappi um áratuga skeið. 

Gallinnn við samtíma samaburð á milli landa og svæða varðandi ástandið í heimsfaraldrinum virðist vera sá, að það virðist vera talsverðum tilviljunum háð á hvaða tíma hinar mismunandi bylgjur faraldursins rísa og hníga. 

Bylgjan sem nú stendur hér á landi var rakin til tiltölulegra fárra einstaklinga, sem komu til landsins í skjóli mildaðra aðgerða og ollu hópsmitum, sem meira að segja ríkisstjórnin komst í kast við.  

Svipt djamminu í fyrsta sinn frá 1949