Kort sem sýnir vel nauðsyn aðgerðanna, sem eru gagnrýndar.

Það er sláandi, kortið af Evrópu sem sýnir útbreiðslu COVID-19. Ísland dökkbrúnt í litaskalanum ljósgrátt - brúnsvart sem sýnir útbreiðsluna eftir ríkjum. 

Ísland er eina norræna ríkið sem er með meira en 100 smit á hverja 100 þúsund íbúa, en þá verður að gæta að því að í Mið-Svíþjóð er svæði með mun fleiri íbúum en Ísland, sem eru með háa smittölu. 

Og á pínulitla dökka blettinum austarlega í Þýskalandi, Berlín, búa tíu sinnum fleiri íbúar en á Íslandi, og þar er verið að herða sóttvarnir vegna hraðfjölgandi smita. 

Fróðlegt er að sjá þær mismunandi skoðanir, sem fólk hér heima hefur á orsökum þessara ófara hjá okkur í annarri bylgjunni.  

Sumir halda því fram, að þær séu því að kenna að ekki hafi verið slakað nægilega mikið um mitt sumar og vilja meira að segja gjörbreyta sóttvarnarlöggjöfinni, að því er virðist til að auðvelda opnanir og brottfall harðra aðgerða.  

Sé svo, er það skringilegt að í löndunum í vestanverðri Evrópu og í Berlín í Þýskalandi skuli nú verið að setja á jafnvel enn harðari aðgerðir en gert er hér. 

 

Staðan svipuð og í Bretlandi

Nauðsynlegt að vanda til verka varðandi lagaumverfi léttra bifhjóla.

Í ljósi hraðrar þróunar í notkun léttra bifhjóla og rafknúinna reiðhjóla hér á landi, er óhjákvæmileg nauðsyn að fara vel yfir öll ákvæði skráningar og trygginga sem um þau gilda. 

Í því efni þarf ekki aðeins að hafa hliðsjón af reynslu og löggjöf annarra þjóða, heldur líka að skoða hvaða ákvæðum geti verið rétt að breyta miðað við okkar aðstæður. 

Nokkur lönd í Evrópu hafa þegar leyft aðrar vélarstærðir og hámarkshraða en gilda í grunngerðinni frá Brussel, svo sem 350 eða jafnvel 500 vatta rafhreyfla í rafreiðhjólum í stað 250 vatta, 30 km/klst hámarkshraða í stað 25 eins og Danir hafa gert, og leyft handstýrðar aflgjafir í viðbót við fótahjálp. 

Margt fleira mætti nefna og skrifa um þetta allt drjúglangan pistil. Sum meginákvæði, sem gilda hér á landi, eins og til dæmis um hand aflgjafir, eru fáránleg. 

Eða hvers vegna ætti að banna handgjöf á 25 kílóa þungu 250 vatta rafreiðhjóli en leyfa hins vegar handgjöf á bensínknúnu hjóli sem er 90 kílóa með 1500 vatta afl?

En svona er þetta hér á landi.

Á efstu myndinni hér á síðunni eru þrjú létt bifhjól. 

Fremst er 125 cc bensínknúið hjól með 96 km/klst hámarkshraða og 250 km drægi með 2,5 lítra eyðslu á hundraðið. 

Miðjumyndin er af rafreiðhjólinu Sörla á Öxnadalsheiði í ágúst 2015 á leið til Reykjavíkur um Hvalfjörð í tæplega tveggja daga ferð, hámarksdrægi 159 km og orkukostnaður Akureyri - Reykjavík 115 krónur, sem svarar 0,2 lítrum af bensíni á hundrað ekna kílómetra. 

Siðan eru fimm ár og neðsta myndin hér á síðunni gefur til kynna hraða þróun í rafknúnum hjólum hér á landi, þrjár mismunandi stærðir við Kringluna. Og samt erum við á eftir öðrum þjóðum á þessu sviði. 

Fremsta hjólið er með 25km/klst hámarkshraða, 250 watta mótor og til nota einkum á hjólastígum, í miðjunni er rafhlaupahjól, og aftast er rafknúið léttbifhjól sem hægt er að fá í tveimur flokkum fyrir götur og vegi, skráningar og tryggingaskylt, annars vegar með 45km/klst hámarkshraða og hins vegar með 64 km/klst hámarkshraða, drægi án hleðslu 132 km og orkueyðsla 100 krónur á 100 kílómetra, eða sem svarar 0,5 bensínlítrar á hundraðið. 

 

Nú hægt að skrá bifhjól á netinu

"Eitt líf, hvílíkt undur!"

Heitið Lífsvirðing á samtökum áhugafólks um dánaraðstoð er réttnefni.

Ljóð og lag undir heitinu "Eitt líf, hvílíkt undur!" er dæmi um afsprengi þeirrar hugsunar og vitundarvakningar í þessum efnum. Þess má geta að ljóðlínan "Ein tvö..." er í raun hið sama og að snúa orðunum við og segja "Tvö ein..."

 

EITT LÍF, HVÍLÍKT UNDUR! 

 

Eitt líf, hvílíkt undur! 

Ein sál, einstæð perla! 

Ein ást, andans tundur! 

Ein tvö: Geislar merla!

 

Ei neinn endurgerður! 

Ein ævi, sem líður! 

Einn dauði, sem verður

ein eilífð, sem bíður!

 

Hver ævi er einstakt undur; engar tvær eru eins! 

 

Ein jörð; ekki fleiri!

Ein lausn: Kærleiksvegur! 

Einn Guð; enginn meiri!

Einn! Hæst! Dásamlegur! 

 

Hver stund undur merk er

í lífshlaupi snjöllu! 

Hvert líf kraftaverk er!

Hvert líf ofar öllu! 

 

Hver sál er einstakt undur; engar tvær eru eins!  

 

Eitt líf, hvílíkt undur! 

Ein sál, hvílík perla! 

Ein ást, andans tundur!

Ein tvö: Geislar merla! 

 

Ei neinn endurgerður! 

Ein ævi, sem líður! 

Einn dauði, sem verður 

ein eilífð, sem bíður. 

 

Hvert líf er einstakt undur! Engin tvö eru eins! 

Vitundarvakning um dánaraðstoð