Kirkjan og trúarbrögðin taka afstöðu í stórmálum á heimsvísu. Of fáir vita það.

"Þess vegna lætur kirkjan í sér heyra" segir biskup Íslands í tilefni af því að kirkjan hefur verið gagnrýnd fyrir afstöðu sína í stærstu málum mannkynsins. 

Tveir stórir alþjóðlegir kirkjulegir atburðir hér á landi á síðustu þremur árum hafa haft áhrif á boðun kirkjunnar.

Hér við hliðina má sjá mynd af tákni þeirrar síðari sem var haldin með kjörorðinu: "FAITH FOR EARTH."  

Hinn fyrri fundurinn var haustið 2017 þegar forystumenn söfnuða undir hatti Alkirkjuráðsins, sem er sameiginlegur vettvangur stjórnenda í kristnum söfnuðum í öllum heimsálfum sem í eru alls um 1500 milljónir manna. 

Þá hélt Alkirkjuráðið aðalfund sinn hér á landi, tók þátt í Hringborði norðursins, og við hátíðlega athöfn á Þingvöllum var undirrituð viljayfirlýsing Alkirkjuráðsins um umhverfismál á Þingvöllum.  

Þessi einstæði atburður í sögu kristinnar kirkju í heiminum og þátttaka Alkirjuráðsins í Arctic Circle hlaut nær enga athygli hér á landi, heldur þótti mun fréttnæmara að greina í hundraðasta skiptið frá möguleikum Íslendinga til olíuleitar og vinnslu og aukinna siglinga um Íshafið í kjölfar minnkandi hafíss.

Síðsumars 2020 héldu stærstu trúardeilda heims með mikinn meirihluta mannkyns síðan stóra ráðstefnu í Skálholti þar sem þátttökunni frá öllum heimshornum var streymt og kynnt sameiginleg niðurstaða og boðun varðandi umhverfismál jarðarbúa hjá helstu trúarbrögðum heims. 

Eins og 2017 höfðu fjölmiðlar lítinn áhuga á þessum viðburði. 

Nú má sjá íslenska stjórnmálamenn fjalla um boðun þjóna kirkjunnar á þann hátt, að þeir hafa ekki hugmynd um forsögu þess að íslenska kirkjan hefur látið í sér heyra um stórmál, sem eru ekki aðeins íslensk málefni, heldur bæði íslensk og alþjóðleg.  

„Þess vegna lætur kirkjan í sér heyra“

Mikið ber á milli í spádómum um bólusetningar.

"Allar líkur á þvi að þorri þjóðarinnar verði bólusettur fyrir sumarið" segir heilbrigðisráðherra í upphafi nýs árs. 

En í Kryddsíld Stöðvar 2 í gær fullyrti Sigmundur Davíð Gunnlaugsson að slíkt ástand yrði ekki komið fyrr en árið 2022.  

Þetta er gríðarlegur munur á mati og sýnir áhrif þess að árið 2021 er kosningaár. 

Það er ekki að sjá annað en að kosningaslagurinn sé þegar hafinn og að hann standi meðal annars um það, hvort dugi betur, Evrópusamstarf með helstu grannþjóðum okkar, eða að við hefðum átt að snúa okkur strax í að berjast einir eða í einhverju óskilgreindu sambandi við Bandaríkin fyrir öflun bóluefnis.  

Þorri landsmanna bólusettur fyrir sumarið

230 ára gömul hefð ekki algerlega rofin. "Hátíðirnar".

Gleðilegt ár! Áramótaskaupið var flott og ávarp forsætisráðherra gott. Veðrið stillt en það skemmdi mikið fyrir loftgæðum, sem eru afleit núna.

Því má alveg halda til haga að það voru brennurnar ásamt Áramótaskaupinu sem björguðu gamlárskvöldi frá því að vera kvöld ölvunar og skrílsláta í miðbænum fram undir 1970, í það, sem þetta kvöld er nú.  

Þótt mengun sé frá áramótabrennum er hún miklu minni en frá flugeldunum, og með því að halda eina brennu á Snæfellsnesi má kannski segja að 230 ára hefðin hafi ekki verið alveg slitin í sundur. 

Þegar ferðamannastraumur fer að verða meiri til landsins væri alveg athugandi að gera veglegar og vel útfærðar álfabrennur að föstum lið í hátíðinni. 

Fyrirbrigiðið hátíðirnar er nefnilega menningarfyrirbæri, sem heillar ekki síst útlendinga. 

Því er lýst í með íslenskum orðum í texta við lagið "The wonderful time of the year" sem nota má sem allsherjar hátíðakveðju, svohljóðandi.  

 

"HÁTÍÐIRNAR"

 

Þau verða svo ljúf, þessi jól. 

Þessi gleði´er við völd fram á þrettándakvöld, 

því að hækka fer sól. 

Það er ljúft, það er svo kátt um hver jól. 

 

Fyrst á aðfangadagskvöld hátíð hefst

er við Heims um ból syngjum

og bjöllunum klingjum 

og gleði´okkur gefst

og í huganum er Hann allra efst. 

 

Eftir það sérhver dagur er dýrlega fagur , 

svo dátt fram á þrettándakvöld

og á jólatrésböllum við tápmikil tröllum, 

þótt tíðin sé rysjótt og köld. 

 

Það er svo skemmtilegt á gamlársdag,

þegar fólk kemur saman 

við gáska og gaman 

og glaðbeittan brag. 

Það er svo skemmtilegt á gamlársdag! 

 

Og við sjónvarp og brennur

þá gerum við glennur 

og gleðjumst við létt gamanmál, 

já, með álfum og tröllum,

sem ofan af fjöllum 

þá arka og kveikja sitt bál. 

 

Það er ljúft, já, það er kátt um hver jól

fram á þrettándakvöld

þessi gleði´er við völd 

þegar hækka fer sól. 

 

Það er ljúft, það er svo kátt,

það er ljúft og kátt og svo dátt, 

það er ljúft og það er svo kátt þessi jól!"  

 

 

Kveiktu brennu á Snæfellsnesi