Allt of seint. Slæleg viðbrögð.

Í annað sinn í vetur eru viðbrögð samgöngusviðs Reykjavíkurborgar allt of sein varðandi aðgerðir vegna svifryks á götunum.

Fréttin um "rykbindingu" vekur spurningar.

Orðið er venjulega notað um þá aðferð til að sporna gegn rykmyndun, að sett sé efni í rykið sem bindur það. Verður rykbindiefni dreift á göturnar?

Eða er þarna um að ræða rangt orðalag varðandi það að skola eða fjarlægja rykið og drulluna af götunum eins og gert var allt of seint fyrr í vetur?

Hvort sem um er að ræða eru viðbrögðin nú og við sams konar aðstæður fyrr í vetur allt of seint á ferðinni og gagnrýniverð að mínu mati.

Aðfararnótt fyrradags var hiti um þrjú stig í Reykjavík og þá hefði verið auðvelt að skola rykið af götunum án þess að vatnið frysi eða að það þyrfti að salta göturnar á eftir eins og gert var fyrr í vetur.

Á mánudag síðastliðnum lá fyrir að eftir miðja þessa viku og eins langt fram í tímann og séð yrði myndi verða frost í Reykjavík.

Frostkaflanum sem kom um helgina hér í borginni hafði verið spáð og þar á undan fór langur kafli með blautum auðum götum. Þá strax hefði átt að grípa til aðgerða.  

En rétt eins og í fyrra skiptið í vetur bregst samgöngusviðið allt of seint við og þar á bæ virðast menn ekki í neinu sambandi við veðurstofuna eða hafa áhuga eða getu til að sinna þessum verkefnum.  

Fyrirsjáanlegt var að svifryk myndi stigmagnast þegar tugþúsundir óþarfra nagladekkja slíta upp slitlagi gatnanna og búa til viðbjóðslegt svifryk sem er heilsuspillandi og hvimleitt.

Þessi dekk hafa skóflað götunum upp í allan vetur öllum til ama, leiðinda og kostnaðar.

Lagðar hafa verið fram tillögur á vettvangi borgarstjórnar um þessi mál árum saman án þess að nokkuð hafi gerst.

Ef menn vilja orða það svo að ég gagnrýni þau yfirvöld harðlega sem eiga að fást við þessi mál þá er það rétt orðalag.  

 

Rykbinding vegna svifryks

Athugasemdir

[Steini. (IP-tala skráð) 18.2.2010 kl. 21:04]

Trúlega er átt við magnesíumbílinn margfræga. Þetta er salt og magnesíumblanda sem úðað er á göturnar. Það var mikil spenna þegar Magnesíumbíllinn byrjaði að láta til sín taka fyrir ca 3 árum. Og tókst satt að segja fjandi vel til.

EN...að sjálfsögðu hefði verið margfalt áhrifaríkara að stunda reglulegan gatnaþvott á stærstu umferðaræðunum. Gatnaþvottur vikulega myndi stórbæta loftgæði frekar en að senda magnesíumbílinn í bíltúr einu sinni á vetri. Auðvitað tímir borgin ekki þessum gatnaþvotti. En dýr var líka magnesíumbíllinn.

Svo er hitt, að svifryk mun ekki hafa aukist í 10 ár. Sem segir svosem ekki mikið. Svona álíka og að afi gamli hafi ekki farið upp fyrir tvo pakka á dag í tíu ár. Nógu slæmt fyrir.

Og annað: það þyrfti engan magnesíumbíl ef það væri almennilegt efni í malbikinu, og einnig væri lítið svifryk ef niðurrif húsa hefði ekki verið jafngengdarlaust og raun ber vitni undanfarin ár. Það kemur gífurlegt ryk frá slíkum framkvæmdum sem sest á götur og umferðin þyrlar upp.

Nagladekk eða ekki? Það er umferðarhraðinn sem veldur svifrykinu. Ef allir ækju á 40 kmklst á sínum nöglum, væri þetta ekki vandamál.

Þú varst fínn hjá Bubba. Hann bara stoppaði þig alltof oft maðurinn. Skil ekki hversvegna hann getur aldrei leyft mönnum að klára.

[Rafn Haraldur Sigurðsson (IP-tala skráð) 18.2.2010 kl. 22:45]

Ekki alls fyrir löngu var ég í Þýskalandi og fór þar með leigubíl í bruna hálku, ég spurði hann hvort þeir notuðu ekki nagladekk. Hann horfði forviða á mig og sagði svo, nei, það er bannað og  við værum fljótir að tæta upp göturnar ef við gerðum það.

Ég heyri oft talað um að aðstæður hér séu svo sérstakar, það er reyndar allt svo sérstakt við Ísland en þarna var alveg nákvæmlega sömu aðstæður og eru svo oft á Íslandi,blautar götur, hitastig rétt við frostmark og engin nagladekk.

[Birkir Ingason (IP-tala skráð) 18.2.2010 kl. 23:31]

Já þeir nota ekki nagladekk þar ytra. Vinkona mín bjó í Þýskalandi í smá tíma og einu sinni þegar ég talaði við hana þá sagði hún að samgöngurnar væru lamaðar í bænum þar sem hún bjó vegna sjómagns. En það var ekki nema 5sm jafnfallinn snjór og dekkjabúnaður bílanna réði ekkert við þessa "miklu" snjókomu.

Ég er alls ekki fylgjandi nagladekkja. Það sýnir sig alveg að þau rífa upp malbikið. Ég er með undir mínum bíl Toyo heilsársdekk og þau svínvirka. Ef það er hálka/snjór þá hleypi ég bara pínu úr dekkjunum til að auka veggrip. Svo daginn eftir þegar hálkan/snjórinn er farinn þá renni ég við á næstu olís-stöð og pumpa í dekkin. Og núna með hækkandi hitafari og veðrabreytingum sem eru að eiga sér stað, og við verðum vel vitni að á Íslandi. Þar sem veturinn er orðinn mildur og sumrin þokkalega góð. Þá myndi ég leggja til að nagladekk yrðu bönnuð. Það eru komin það góð dekk á markaðinn að þau slá jafnvel nagladekkjunum út. 

 Ómar flott bolludagslag. Úff það sat ekkert smá í mér. 

[VíR (IP-tala skráð) 19.2.2010 kl. 00:06]

Var sjálfur nagladekkjatrúar þar til í fyrra. Skifti þá yfir á harðskeljadekk. Finnst ég vera alveg jafn öruggur og áður. Mæli hiklaust með því.

Svo er líðanin næstum eins góð og þegar maður hættir að reykja. Sparar peninga, minni mengun...;-)

[Ómar Ragnarsson, 19.2.2010 kl. 00:49]

Borgin hefur losnað að mestu við snjómokstur í vetur og saltdreifing hefur verið sáralítil vikum saman. Hún hefur vel efni á þvotti á götunum á rétt völdum tímum eða á magnesíumbílnum.

Ég þurfti að aka á bílaleigubíl frá Björgvin til Stokkhólms fyrir tveimur árum og leiðin lá frá ströndinni upp á hálendið í allri mögulegri gerð af hálku, sem við myndum kallal "séríslenska hálku."

Bíllinn var á ónegldum en alveg nýjum vetrardekkjum af bestu gerð og allar mínar miklu áhyggjur af hálkunni reyndust óþarfar.

[Haukur Kristinsson (IP-tala skráð) 19.2.2010 kl. 09:35]

Í Sviss eru nagladekk bönnuð. Hef verið búsettur þar til tugi ára og í mörg ár var ég á vetrin upp í Ölpunum um hverja helgi við allar þær aðstæður, sem hugsast getur. Ástæðan var sú að sonur minn var í keppnisliði á skíðum. Ég lenti aldrei í neinum vanda. Vetrardekkinn eru orðin ótrúlega góð, en þau eru ekki öll jafngóð eða jafn dýr. Þegar ég segi Íslendingum frá þessu er viðkvæðið alltaf það sama; Ísland er svo spes. Þessi nagladekka-manía Íslendinga er út í hött og kostar stórfé og einnig falskt öryggi. Þá skulum við ekki gleyma því að betra en öll vetrar- og nagladekk er að keyra varlega.

[Magnús Már Magnússon (IP-tala skráð) 19.2.2010 kl. 10:35]

Ég get sagt það sama og VíR, ég var lengi nagladekkjatrúar, og tók undir með þeim sem fullyrtu að með því að  notast við annars konar hjólbarða að vetrarlagi væri öryggið skert. Þetta breyttist fyrir nokkrum árum þegar faðir minn hvatti mig til að prófa loftbóludekk, en hann býr fyrir norðan þar sem aðstæður ættu að öllu jöfnu að vera erfiðari en hér syðra. Ég setti slík dekk undir venjulegan framhjóladrifinn fólksbíl og varð verulega undrandi á því hve vel þau virkuðu við mismunandi aðstæður. Lenti meira segja einu sinni í því í Húnavatnssýslum á leið suður að það myndaðist svellbunki axla á milli og það var farið að hlána er ég átti leið um, auk þess sem vindur var orðinn allnokkur. Þótt nagladekk séu vissulega fýsilegri við slíkar aðstæður þá gekk allt vel þar sem ég fór bara rólega yfir og reyndi ekki að streðast við að halda sama ferðahraða og ég var vanur. S.l. haust þurfti ég að endurnýja vetrardekkin en hafði verið á nagladekkjum þar sem frúin tók ekki annað í mál (haldin blindri trú á öryggi þeirra eins og svo margir), en fékk því framgengt að prófa aðra gerð og setti Toyjo harðskeljadekk undir bílinn. Og þvílíkur munur. Þau eru betri við allar aðstæður en nagladekkin, nema kannski við glærahálku, en það kom mér verulega á óvart hvað harðskeljadekkin ná að krafsa í hálkuna. Eftir þessa reynslu mun ég aldrei aftur setja nagladekk undir mína bíla. Batnadi mönnum er best að lifa.

[Ómar Ragnarsson, 19.2.2010 kl. 13:02]

Þjóðfélagið í heild myndi hagnast ef hið opinbera greiddi niður ónegld vetrardekk að einhverju leyti með aðeins broti af þeim kostnaði sem nagladekkin hafa í för með sér.

Ekki er framkvæmanlegt að banna naglana alveg, til dæmis fyrir bíla sem þarf að nota í jöklaferðum.

Ég á tvo afgamla bíla tiltæka sem komast á jökla en þeim er að meðaltali aðeins ekið 200-1500 kílómetra á ári. Mynstrið á þeim dekkjastærðum, sem undir þeim eru, er þannig að dekkin á þeim verða að vera negld ef þeir eiga að hafa grip á glæru svelli og oft blautu neðst á skriðjöklunum, einkum á sumrin og haustin,

Vegna þess hve þessum bílum er lítið ekið hef ég ekki verið sektaður fyrir að hafa þá á nöglum allt árið, - bílarnir eru yfirleitt ekki á ferðinni. Það væri ódýrara fyrir mig að borga sekt einu sinni á ári heldur en að hafa fyrir því að vera sífellt að skipta um dekk undir þeim.

Ég ek 95% af akstri mínum á ónegldum dekkjum á minnstu bílum bílaflotans.