Tískuorð: Aukning.

Orðið aukning hefur verið tískuorð um langt skeið og ofnotað og misnotað stórlega. Nú síðast í viðtali í hádegisfréttum er sagt að "orðið hafi aukning á farþegum." 

Ef farþegar aukast á einhvern hátt, á hvaða hátt er það?  Eru þeir þyngri, stærri, feitari? 

Hér er orðið aukning að ryðja burt miklu betra orði, sem er fjölgun, og sögninni að fjölga. 

Í stað þess að segja: "Það hefur orðið aukning á farþegum" 

er hægt að segja

"Farþegum hefur fjölgað". 

Þarna eru notið þrjú orð í stað sex. 

Orðið aukning er stundum notað þannig, að með ódæmum er. 

Oftar en einu sinni hefur til dæmis verið sagt:

"Það hefur orðið mikil aukning á fjölda nemenda"

í stað þess að segja einfaldlega

"nemendum hefur fjölgað." 

Í þessu tilfelli eru notuð átta orð í stað þriggja, algerlega að ástæðulausu. 

Ætli það sé ekki best að enda þetta í stíl með því að segja: "Það hefur orðið mikil aukning á fjölda þeirra tilvika þar sem notað er orðið aukning.

Athugasemdir

[Hugi (IP-tala skráð) 28.6.2010 kl. 16:37]

Mér skilst líka að vörur séu alltaf að hækka. Sem skýrir líklega *hóst* aukningu á stærð verslana.

[Sigurður Haraldsson, 28.6.2010 kl. 19:10]

Ómar skoðaðu hvað er að gerast í náttúrunni það er eitthvað mjög mikið meira en þú hefur séð nokkurn tíma! Ég hef áður beðið þig að aðvara stjórnvöld og almannavarnir því að þær hlusta á þig en ekki mig ég er ekki þekktur eins og þú. Taktu þetta til vinsamlegrar ábendingar og fylgdu því eftir viltu gera það fyrir okkur samlanda þína því það sem er að gerast er ekki á færi okkar að ráða við því þurfum við á öllu okkar að halda svo ekki tapist mannslíf í þeim hamförum sem koma!

Virðingarfyllst. Sigurður Haraldsson verktaki og öryggisvörður Fellsenda Þingeyjarsveit.