Reynslulausn? Fráleitt að nefna það.

Morðið á John Lennon verður ekki tekið til baka og hann vakinn til lífsins. Verknaður Chapmans var óafturkræfur og svo stór, að fráleitt er að geti fengið reynslulausn, þó ekki væri nema vegna þess að þá verður hann sjálfur í bráðri lífshættu, svo margir eru enn heitir vegna hins hörmulega morðs fyrir 30 árum.

Þess vegna er útilokað að hann geti fengið aftur frelsið sem hann naut áður en hann myrti Lennon. Svo einfalt er það. 

Banamaður Lennons brátt frjáls á ný?

Athugasemdir

[Sigurður Þór Guðjónsson, 28.7.2010 kl. 01:15]

Reynslulausnir fyrir morð eru greinilega til í dæminu í Bandaríkjunum þó hinir myrtu verði ekki vaktir til lífsins. Morðið á Lennon er ekkert stærra morð en önnur morð. Það væri lélegt réttarkerfi sem færi í manngreinarálit. Það er ekkert fráleitara að veita þessu manni reynslulausn en öðrum morgðingjum sem fá reynslulausn. Hver myndi þekkja þennan mann 30 árum seinna ef skynsamlega væri frá því gengið, hann breytti t.d. um nafn og fleira. Það er afleit hugmynd að það eigi að skipta máli HVER var myrtur þegar reynslulausnir eru annars vegar. 

[Ingimar (IP-tala skráð) 28.7.2010 kl. 06:54]

Það er alveg rétt hjá þér að það eigi ekki að skipta máli HVER var myrtur, en á að eyða peningum í að dulbúa og fela þennan mann, sem myrti annan mann? Hann framdi þennan glæp og má alveg búast við því að þurfa að eyða ævinni í felum, því eins og Ómar segir, það verða ansi margir tilbúnir að eyða tíma og peningum í að gjalda honum lambið gráa. Persónulega held ég að hann sé öruggari fyrir innan rimlanna.

[Árni Gunnarsson, 28.7.2010 kl. 08:45]

Reynslulausn í þessu tilfelli ber auðvitað að túlka á nýjan hátt. Það á að láta reyna á það hversu lengi hann honum takist að forðast hefndina.

[Sigurður Þór Guðjónsson, 28.7.2010 kl. 12:53]

Ekki það að mér sé það eitthvað hjartans mál að þessi maður verði látinn laus. Ég býst við að morðingjar í Bandaríkjunum, eins og annars staðar, geti fengið reynslulausn fyrst og fremst á þeirri forsendu að þeir séu ekki lengur taldir samfélaginu hættulegir. Ef réttum skilyrðum er fullnægt ætti þessi maður að geta fengið reynslulausn eins og aðrir.  Það þarf varla að dulbúa manninn mikið, bara ekki básúna út um allt hvar hann sé og nota rétt nafn. Slíkt er stundum gert.  Þær aðgerðir verða áreiðanlega ekki dýrari en það að hafa manninn áfram í fangelsi ef peningar eiga að skipta þarna máli. Ég veit ekki til að það sé nokkurn tíma sjónarmið við reynslulausn á morðingjum að hugsanlegt sé að það valdi öðrum morðum. Mér finnst að við reynslulausn eigi allir að sitja við sama borð. Það er hins vegar áberandi í viðbrögðum við þessa frétt að menn vilja ekki að maðurinn fái reynslulausn beinlínis vegna þess hver sá var sem hann myrti.

[doctore (IP-tala skráð) 28.7.2010 kl. 13:28]

Gaurinn var/er geðveikur... Ef hann er orðin hæfur til að vera úti, þá á hann að fá það alveg eins og aðrir sem drepa menn sem enginn veit hverjir eru.

En eins og þið segið... þá eru stórar líkur á að einhver drepi hann ef hann sleppur út.

[Ómar Ragnarsson, 28.7.2010 kl. 17:36]

Því miður er það svo að það er ekki sama hver er drepinn. Annars væru nöfn mannanna sem myrtu Lincoln, Kennedybræður, Martin Luther King og Lennon ekki heimsþekkt.

Þessir menn vissu alveg hvern þeir voru að fara að drepa og að þeir yrðu heimsþekktir fyrir vikið og að þess vegna yrðu afleiðingarnar aðrar en eftir venjuleg morð.