Dæmi um það sem er undir.

Helstu auðlindir Íslands eru fjórar,  mannauðurinn, einstæð náttúra, sjávarauðlindin og orkan.

Dæmi um auðlind, sem er hvort tveggja, orkuauðlind og náttúruverðmæti, er Aldeyjarfoss sem efsta myndin á þessari síðu er af. 

Þetta vita erlendir fjárfestar og hafa því sóst eftir því eftir því að komast yfir þær allt frá því er Sigríður í Brattholti barðist gegn því að Gullfoss, sem er hvort tveggja, náttúrverðmæti og orkuuppspretta, yrði seldur.

Þótt þjóðin virðist því ekki fylgjandi að eignarhald sjávarútvegsfyrirtækja komist að meirihluta í hendur útlendinga sækja þeir þó leynt og ljóst í að eignast sjávarauðlindina eins og mál útgerðarfélagsins Storms sýnir.

Sama gildir um orkuna, sem nú sem fyrr tengist oft náttúruverðmætum og Gullfoss er gott dæmi um. 

Myndasyrpa, sem ég byrja nú að setja á þessa síðu, gefur hugmynd um svæði sem fórnað yrði fyrir svonefnda Hrafnabjaravirkjun með því að sökkva svonefndum Króksdal sem Skjálfandafljót fellur um áður en það kemur niður í Bárðardal.

Þrátt fyrir afneitanir má sjá að Magma Energy og kínverskir aðilar sækjast eftir því að ná orkuauðlindum undir sig á beinan eða óbeinan hátt.

Magma hefur meðal annars leitað hófanna um virkjanir í Kerlingarfjöllum og kínverskt fyrirtæki hefur keppt við Alcoa um að setja upp álver á Bakka með þeim afleiðingum að allar orkuauðlindir Norðurlands eru undir með tilsvarandi umturnun náttúruverðmæta og viðkomandi fyrirtæki í raun orðinn allsráðandi eigandi orkuauðlindar heils landshluta.

Við Helga fórum um síðustu helgi um Króksdal, sem verður að fórna ef álver verður reist á Bakka og í fyrra flaug ég eftir dalnum.

Dalurinn er að sjálfsögðu nær óþekktur enda hentar það best þeim sem vilja virkja fljótið því öllum er sama um það sem þeir ekki þekkja. Hann er í raun framhald Bárðardals til suðurs og nær svo langt inn í hálendið að Bárðarbunga og Trölladyngja gnæfa fyrir botni hans.

Hann liggur í aðeins um 350-400 metra hæð yfir sjó eða um 200 metrum neðar en núverandi Sprengisandsleið, sem liggur uppi á hálendinu fyrir vestan hann. Þar af leiðandi er hann grösugur að stórum hluta og snjóléttur.

Síbyljan um að miðlunarlón á hálendinu sökkvi aðeins eyðisöndum og grjóti á ekki við um Króksdal fremur en hún átti við um Hjalladal en trú margra á þessa fullyrðingu um sandana og grjótið er svo sterk að ég verð vafalaust sakaður um að hafa falsað myndirnar sem fylgja þessum pistli, hvað sem líður vísindalegum skýrslum um hið sanna og bótum til bænda vegna missis beitilands. 

Þessi ásökun var og er höfð frammi um myndirnar af Hjalladal af mönnum sem aldrei hafa komið á staðina sem myndirnar eru af. 

Króksdal á að fylla af jökulleir svo að til verði 26 ferkílómetra miðlunarlón, alls um 25 kílómetra langt. 

Meðal annars verður sökkt ferðamannaskála sem er í dalnum en væntanlega boðið að færa hann upp í grýtta brekku fyrir ofan núverandi stað. 

Helstu náttúruverðmætin, sem undir eru varðandi Hrafnabjargavirkjun, er þó ekki þessi dalur sem er svo mikil vin í hálendinu, heldur fossar Skjálfandafljóts fyrir neðan væntanlega stíflu.

Hér á blogginu sá ég þá fullyrðingu um daginn að Aldeyjarfoss væri flottasti foss Íslands. 

Ég held þó að Dynkur í Efri-Þjórsá sé magnaðisti stórfoss landsins, en hann á líka að þurrka upp og búið er að taka um þriðjung af vatnsmagni hans í burtu. 

Fyrir ofan Aldeyjarfoss eru mjög fallegir fossar í Skjálfandafljóti sem bera ekkert nafn á kortum og sýnir það vel hve fáfarið er þarna. 

Þetta mun koma sér afar vel þegar fossarnir verða teknir því að þá mun það hvergi sjást í gögnum um þessa virkjun, sem gefa mun um 50 manns vinnu í álverinu á Bakka. 

Enginn lætur sér detta í hug að skoða hve mörg störf það gæti skapað í ferðaþjónustu að nýta náttúruverðmætin sem felast í Aldeyjarfossi og öðrum fossum þarna enda datt engum það heldur í hug um 1920 að Gullfoss fæli í sér nein verðmæti hvað þetta snertir. 

Við Helga hittum fólk við ferðamannaskálann sem trúði því ekki að þessu svæði ætti að sökkva fremur en að flestir, sem ég hitti við Kárahnjúka á árunum fyrir 2001 trúðu því sem til stóð að gera þar. 

En myndin er skýr: Orkuveita Reykjavíkur og heimamenn hafa stofnað sérstakt félag um að virkja Skjálfandafljót og eytt í það fé. Alcoa ætlar að reisa 460 þúsund tonna álver á Bakka sem krefjast mun virkjunar á þessum stað því að jarðvarmavirkjanir gefa innan við helming þeirrar orku sem þarf. 

Króksdal verður sökkt en sú ósk margra að enginn fái að vita hvað verður gert þarna rætist vonandi ekki ef mér tekst að klára og koma á framfæri upplýsingum um það sem í vændum er. 

 

 

 

 

Mál Storms í nefnd

Athugasemdir

[Einar Kr. Jónsson (IP-tala skráð) 8.8.2010 kl. 16:23]

Stöldrum aðeins við!!   Er þetta það sem við viljum með Nýja Ísland?  Það er ekki tilviljun að ferðamannaiðnaðurinn er orðinn 3. stærsta gjaldeyrissköpunin á aðeins 10 árum og hefur óendanleg sóknarfæri næstu 100-200 árin. 

Það er þekkt staðreynd að jarðgufuvirkjun hefur aðeins 60 ára líftíma við full afköst, þá er gufutankurinn búinn á þeim stað, alveg eins og með olíulindir.  Jarðgufa er nefnilega ekki endurnýjanleg auðlind, eins og vatnsaflið, nema á mun lengri tíma, en það hefur ekki verið rannsakað þar sem menn hafa aldrei tæmt jarðgufutanka áður.  Það mun kannski koma í ljós nokkrum kynslóðum eftir að Nesjavallatankarnir hafa tæmst, hvort og á hve löngum tíma þeir endurnýja sig.

Ef ég skil málið rétt þá á að sökkva þessum dal fyrir 60 ára líftíma jarðgufu annars staðar frá, virkjun Skjálfandafljóts, sem um hann rennur, er aðeins hugsuð til að brúa bilið til að uppfylla orkuþörf álvers á Bakka, þar sem jarðgufan er ekki næg.  Þetta felur í sér óafturkræfa röskun á náttúruperlum og auðlindum fyrir aðeins 60 ára nýtingartíma.  Auk þess:  Hvaða áhrif mun virkjunin hafa á Skjálfanda, einn fegursta foss landsins?

Bestu þakkir, Ómar, fyrir halda áfram að vekja okkur til umhugsunar.

[Lárus Vilhjálmsson (IP-tala skráð) 8.8.2010 kl. 19:02]

Já Ómar Þetta ætti mönnum að vera ljóst, bæði stjórnvöldum og orkufyrirtækjunum. En það er ljóst að menn eru enn í sama gírnum og þegar Kárhnjúkavirkjun og Hellisheiðarvirkjun voru reistar. Engin virðing fyrir náttúrunni, engin virðing fyrir þeim sem reyndu að spyrna við fótum og engin virðing fyrir komandi kynsloðum. Það má heldur ekki gleyma því að, auk þess að menn þurfa örugglega að fara í Skjálfandafljót til að skaffa orku til Helguvíkur, þá eru áformuð hrikaleg skemmdarverk á Þeistareykjum og Kröflu. Það vita örugglega ekki margir af þeim áformum

[Lárus Vilhjálmsson, 8.8.2010 kl. 19:30]

Já Ómar og auk þess að 460 þúsund tonna álver ALCOA í Helguvík kallar örugglega á virkjun í Skjálfandafljóti, þá kemur líka örugglega krafa um virkjanir í jökulsánum í Skagafirði. Og svo má ekki gleyma því að væntanleg áform um háhitavirkjanir á Þeistareykjum og Kröflu munu algera eyðileggja þau svæði. Og svo kemur örugglega krafa um að Gjástykki verði virkjað, þrátt fyrir fyrirhugaða friðlýsingu. Það er sama sagan í gangi og í Helguvík. Byrjum að byggja og heimtum svo virkjun.

[Ómar Ragnarsson, 8.8.2010 kl. 21:15]

Doktor Bragi Árnason rannsakaði jarðvarmasvæði og niðurstöður hans og fleiri eru þær að ef jarðvarmi svæðisins klárast á segjum 50 árum, taki það helmingi lengri tíma, 100 ár, að bíða þar til afl svæðisins hefur verið endurheimt.

Eina vitlega leiðin til að nýta jarðvarmann er að gera ráð fyrir þessu og virkja því aðeins þriðjung þess sem áætlað er að virkja alls þegar búið er að draga frá þau svæði sem menn ætla að geyma ósnortin.

Núna ríkir engin stefna í þessum efnum, - aðeins er anað áfram og hrópuð lygin: Endurnýjanleg orka! Endurnýjanleg orka !

[Kristján Sigurður Kristjánsson, 8.8.2010 kl. 23:30]

Það er þetta með ferðamannaiðnaðinn, hann er utan flokka. Það getur hvaða fífl sem er hafið þjónustu við ferðamenn án þess að vera flokksbundinn.

Að auki veldur ferðamannaiðnaður bólgu í millistétt (sjálfbjargarfólk), fólk sem er sjálfbjarga eru vondir kjósendur.

[Stefán Stefánsson, 9.8.2010 kl. 00:03]

Þú ert nokkuð fullyrðingaglaður Ómar minn og ferð jafnvel nokkuð frjálslega með sannleikann stundum.

Það liggur ekki fyrir hvað mikla orku má fá á Þeistareykjum vegna þess að það á eftir að rannsaka svæðið. Þó eru vísbendingar um að mun meiri orka sé þar en áður hefur verið haldið.

Ég held að það sé ekki alveg rétt hjá þér að skálinn á Réttartorfu sem er í eigu 4 x 4 félaga á Akureyri fari á kaf.

En annars skemmtilegt svæði þarna sem þið voruð á ferð.
Bestu kveðjur og hafðu það gott. 

[Gísli Gíslason, 9.8.2010 kl. 10:45]

Ómar

Skemmtilegur pistill eins og margir hér.  Finnst vanta faglega samfélagslega umræðu um  hvar megi virkja og hvar ekki, þannig yrði svæðum skipt uppi

1. Má ekki virkja
2. Má virkja
3. Svæði sem mætti skoða

Ef svona umræða og flokkun færi fram þá yrði miklu meiri samfélagsleg sátt um bæði friðun og virkjanir, nokkuð sem gæti farið saman.

[Lárus Vilhjálmsson, 9.8.2010 kl. 12:08]

Stefán

Það liggur fyrir að Þeistareykir ehf. ætlar að fá 400 MV út úr Þeistareykjasvæðinu. Þeir hafa frá 2002 borað 7 rannsóknarholur sem gefa nú orku sem samsvarar 300 MV. Með þessum rannsóknum hafa þeir stórskaðað svæðið þótt að Skipulagsstofnun hafi ekki talið að rannsóknarborarnirnar þyrftu að fara í umhverfismat. Eins og venjulega þá er fyrst skotið en síðan spurt.

[Stefán Stefánsson, 9.8.2010 kl. 22:25]

Lárus minn, þvílíkt bull í þér góði...
Í fyrsta lagi er búið að bora 6 gufuholur (þar af 5 nýtanlegar) og orkan úr þeim samtals líklega í kringum 40 megawött. 

Rökstyddu það á hvern hátt svæðið hefur skaðast, en haltu þig við staðreyndir og segðu sannleikann.

[Sigurður Hlynur Snæbjörnsson, 12.8.2010 kl. 00:29]

Í drögum að aðalskipulagi Þingeyjarsveitar er búið að taka Hrafnabjargavirkjun út en hún er enn inni á skipulagi miðhálendisins þannig að þar er misræmi sem mun verða leiðrétt.

Hvað félagið varðar sem stofnað var til að virkja Skjálfandafljót við Hrafnabjörg þá liggur ekkert annað fyrir því en að verða leyst upp eftir því sem ég best veit.

Það er hins vegar áhyggjuefni hversu heittrúaðir margir Þingeyingar eru enn á álver sem endanlega lausn í atvinnumálum þegar fyrir liggur að þau álver sem flestir virðast vilja byggja þurfa miklu meira rafmagn en hægt er að framleiða með viðunandi hætti.