Yfirgnæfandi líkur á meti.

Meðalhiti septembermánaðar í Reykjavík er 7,4 stig. Nú virðist stefna í að að minnsta kosti fyrri hluti mánaðarins verði með 4-6 stigum hærri hita en það ef gluggað er í spátölur fram til 13. september.

Til þess að meðalhiti alls mánaðarins fari niður fyrir 7,4 stig þyrfti meðalhitinn í síðari hluta mánaðarina að verða aðeins 1-3 stig. Með hverjum deginum, sem líður, minnka líkurnar á því að svo verði og raunar eru þær líkur nánast engar.

Eitt af einkennum hlýnandi veðurfars undanfarin ár hefur verið að það hefur yfirleitt vorað fyrr og vetur komið seinna og þess vegna geta varla verið miklar líkur á því að langvinnt svalviðri dynji yfir seinni part september.

Ofan á þetta bætist að vegna þess að hinir sumarmánuðirnir hafa verið hlýrri en meðaltalið, þarf seinni hluti september að verða enn kaldari, ekki með nema 0-2ja stiga meðalhita, til þess að september verði kaldari en í meðallagi og hnekkja því að sumarsins 2010 verður minnst með svipaðri hlýju og fólk, sem upplifði sumarið 1939, minntist þess sumars lengi á eftir.   

Mun sumarið slá öll met?

Athugasemdir

[Kristinn Pétursson, 7.9.2010 kl. 11:35]

Guði sé lof fyrir allt góða veðrið

[Gunnar Th. Gunnarsson, 7.9.2010 kl. 13:38]

Ég hygg að það sé nokkuð algengt að síðari hluti september sé vel svalur... án þess að ég geti bent á statistik því til stuðnings.

Það væri gaman ef einhver "veðurgúrúinn" gæti svarað því

[Gunnar Th. Gunnarsson, 7.9.2010 kl. 13:39]

.... eða kannski ekki "nokkuð algengt"... en kemur þó fyrir

[Sveinn Atli Gunnarsson, 7.9.2010 kl. 14:14]

Ætli það sé nú ekki allur gangur á því hvernig seinni partur september er, en það er þó nokkuð ljóst að það þarf að koma nokkuð langt og djúpt kuldaskeið seinnipart mánaðarins, eins og Ómar bendir á, til að hitastigið fari undir meðallag. Það virðast því vera nokkuð miklar líkur á því að hitastig verði yfir meðallagi og jafnvel að mánaðarmet verði slegið (þó kannski sé full snemmt að spá því). Fyrir forvitna má benda á beina útsendingu septembermánaðar hjá Sigurði Þór.