Þörfin er mikil.

36 árum eftir að hringvegurinn var opnaður með vígslu brúar yfir Skeiðará er enn ekki búið að leggja bundið slitlag á allan veginn. Kannski verður það ekki einu sinni búið á 40 ára afmælinu, að minnsta kosti varla á veginum yfir Öxi

Það er bagalegt ef það dregst mikið lengur að gera almennilegan veg yfir Öxi sem margir telja að eigi að  hluti af hringveginum, enda 61 kílómetra styttri leið en Breiðdalsheiði.

Kaflinn, sem efir er að malbika af hringveginum, er á Austurlandi og skiptir ekki máli hvort menn telja hringveginn liggja um Öxi, Breiðdalsheiði eða um firðina, það eru enn leiðinlegir malarkaflar í Berufirði, alls um átta kílómetrar að lengd.

Myndin af þessum holureit er tekin í Berufirði og ég myndi láta fylgja mynd tekna í þokunni á Öxi síðastliðið laugardagskvöld ef þokan hefði ekki verið svo þykk að það var tilgangslaust. 

Hefur það einhver áhrif á skyggnið að vegurinn er malarvegur?  Ójá, því að drullan af veginum úðast yfir stikurnar og eyðileggur endurskinið af þeim. 

Hlýnandi veðurfar gerir það að verkum að mun sjaldnar ætti að snjóa á Öxi en fram að þessu og þar að auki myndi almennilegur vel lagður og upphleyptur vegur gera leiðina greiðfærari í vetrarveðrum. 

Verkefnin í vegagerð eru æpandi víða á landinu, einkum á Vestfjörðum. Nú eru liðin 14 ár síðan forsetinn gat ekki orða bundist út af því í opinberri heimsókn þar og sá landshluti er enn hálfri öld á eftir öðrum landshlutum í flugsamgöngum. 

 

 

Framkvæmt fyrir 38 milljarða

Athugasemdir

[Gunnar Th. Gunnarsson, 7.9.2010 kl. 19:48]

Enn og aftur ertu að halda því fram að raunhæft sé að gera veg yfir Öxi fyrir marga miljarða, fyrir umferð sem er um 100 bílar á dag, þegar mest er yfir sumarmánuðina. Á veturna yrði umferðin um 30 bílar á dag.... þá daga sem hægt væri að hafa opið á annað borð.

[Daníel (IP-tala skráð) 7.9.2010 kl. 20:04]

Athugasemdin frá Gunnari hér að ofan minnir mann alveg svakalega mikið á viðtalið við Magnús og Eyjólf í áramótaskaupinu forðum daga: - "Eruð þið með síma?"

- "já nei það þýðir ekkert, það hringir aldrei neinn í okkur"

- "og af hverju hringir aldrei neinn í ykkur?"

- "Nú af því að við erum ekki með síma!"

Það er auðvitað alls ekki þannig að slæmir vegir dragi úr löngun fólks til að ferðast, og ég veit ekki um nokkurn einasta veg þar sem umferð hefur aukist eftir að hann hefur verið malbikaður. Eða þannig.

[Sigurður (IP-tala skráð) 7.9.2010 kl. 21:12]

Vegabætur á Öxi voru komnar á dagskrá fyrir hrun en hafa verið stopp síðan þá.  Ég er alveg sammála Ómari að það á að gera almennilegan veg á Öxi og jafnvel að gera hann hluta hringvegarins enda styttir þetta leiðina verulega.  Það er líka mjög fallegt um að lítast á þessari leið.  Í dag aka mun fleiri þessa leið heldur en Breiðdalsheiði þó að hringvegurinn liggi um hana. 

[Ómar Ragnarsson, 7.9.2010 kl. 21:18]

Þegar farið er inn í umferðarkönnun í Berufirði á vef Vegagerðarinnar sést að umferðin skiptist í helgarumferðinni næstum því jafnt á milli vegarins um Öxi og hringvegarins enda þótt vegurinn um Öxi sé miklu ófullkomnari.

Ef vegurinn um Öxi væri fyrsta flokks og upphleyptur með bundnu slitlagi er ekki vafi á því að umferðin yrði meiri um hann. 

Það er nýtt fyrir mér að landsbyggðarmaður skuli mæla á móti vegabótum innan fjórðungsins sem hann á heima í og samkvæmt þessum tölum hefði bar alls ekki átt að gera neitt fyrir veginn milli Berufjarðar og Breiðdals vegna þess að umferðin væri svo lítil. 

[Gunnar Th. Gunnarsson, 7.9.2010 kl. 23:07]

Ég er ekki á móti vegabótum yfir Öxi, það hef ég aldrei sagt. En til þess að vegabætur yrðu til einhvers gagns yfir vetrarmánuðina, hvað þá að gera hann fyrir þann standard sem EES reglur segja til um hvernig þjóðvegir eiga að vera, þá erum við að tala um nokkurra miljarða framkvæmd, fyrir um 100 bíla að meðaltali á dag þegar mest er.

Ómar, ég skora á þig að kynna þér þessi mál hjá Vegagerðinni, en ekki blaðra svona út í loftið

[Ómar Ragnarsson, 8.9.2010 kl. 00:54]

Ég var einmitt að kynna mér þetta mál á vef Vegagerðarinnar og sá að föstudagsumferðin yfir Öxi í þeirri könnun var tæplega 300 bílar en ekki 100 eins og Gunnar segir að sé "þegar mest er." 

Hver er að "blaðra út í loftið"?  Á hvern ætti að skora að "kynna sér þessi mál hjá Vegagerðinni"?

[Hjalti Finnsson (IP-tala skráð) 8.9.2010 kl. 07:20]

Hér er smá tilvitnun í umhverfismatsskýrslu vegagerðarinnar vegna vegagerðar um Öxi. Þar má allavega sjá að umferðin er langt umfram þessa 100 bíla sem Funnar heldur fram.

"Endurbætur á Axarvegi hafa orðið til þess að umferð um hann hefur aukist mikið frá árinu 2000 og mferð um Hringveginn um Breiðdalsheiði að sama skapi minnkað. Sumardagsumferðin um Axarveg SDU hefur aukist úr 25 bílum árið 2000 í 190 bíla árið 2006. Á sama árabili hefur dregið úr umferð á Breiðdalsheiði úr 163 bílum á sólarhring í 83 bíla. Ástæðan er sú að leiðin milli Egilstaða og Hafnar í Hornafirði er 61 km styttri ef farinn er vegurinn um Öxi en ef Hringveginum er fylgt, auk þess sem aka þarf 5 km styttri vegalengd á malarvegi."

Hér er svo slóð á skýrsluna í heild sinni.

http://www.vegagerdin.is/vefur2.nsf/Files/Axarvegur_Mau_2008.06.05DTM/$file/939-01_M%C3%A1u_2008.06.05._Dtm.pdf

[Gunnar Th. Gunnarsson, 8.9.2010 kl. 12:38]

Þegar ég tala um "mest er",þá er ég að tala um sumarmánuðina en ekki einstaka daga. Reyndar fór ég línuvilt í töflunni og umferðin er ca 100 bílar á dag yfir árið og rétt rúmlega 200 þegar "mest er".

Annars held ég að á milli okkar liggi ákveðinn misskilningur sem er fólgin í því að þið virðist ekki vita hvað "heilsársvegur" í raun þýðir. Þ.e.a s. hvaða kröfum slíkur vegur þarf að fullnægja samkv. EES.

Þegar þið eruð búnir að kynna ykkur það, þá munuð þið sjá að heilsársvegur yfir Öxi er óraunhæfur. Lagfæringar á veginum fyrir sumarumferð er allt annað og við hljótum öll að fagna þeim.

[Hjalti Finnsson (IP-tala skráð) 8.9.2010 kl. 13:12]

Gunnar ég held ekki að um neinn misskilning sé að ræða, þú segir einfaldlega í fyrstu athugasemdinni þinn að:

"Enn og aftur ertu að halda því fram að raunhæft sé að gera veg yfir Öxi fyrir marga miljarða, fyrir umferð sem er um 100 bílar á dag, þegar mest er yfir sumarmánuðina."

En skýrsla vegagerðarinnar segir að SDU sé 190 bílar.

Varðandi það ekki sé hægt að leggja heilsársveg um Öxi vegna þess hve hátt yfir sjávarmáli vegurinn kemur til með að liggja má benda á að hringvegurinn liggur í 550 m h.y.s. yfir Öxnadalsheiði, í 500 m h.y.s. um Vegaskarð og í 600 m h.y.s. um Langadal
við Svartfell.

Norðfjarðarvegur um Oddskarðsgöng liggur í um 632 m h.y.s. og Seyðisfjarðarvegur um Fjarðarheiði liggur í um 620 m h.y.s.

Það er því ekki það sem kemur í veg fyrir að hægt sé að leggja veg um Öxi en eins og veglínan hefur verið teiknuð núna er ekki um að ræða heilsársveg með 90 km/klst alla leið heldur verður um 4 km. kafli með hraðatakmörkun við 80 km/klst.

[Gunnar Th. Gunnarsson, 8.9.2010 kl. 14:16]

Ómar hefur verið að tala um "heilsársveg" þarna yfir.

Aðstæður eru mjög misjafnar á fjallvegum og hæðin segir ekki alltaf allt. Hins vegar eru líka vegir þarna sem þú nefnir, eins og t.d. Fjarðarheiði og Oddsskarð, sem engan veginn eru bjóðandi fólki árið 2010 og slíkum vegum mun að sjálfsögðu fækka í framtíðinni. En þangað til úr verður bætt, þá eru þessar samgöngur Norðfirðinga og Seyðfirðinga, þær einu sem íbúarnir hafa völ á.

Þið viljið byggja nýjan fjallveg sem mun kosta marga miljarða og óhemju að þjónusta á veturna, fyrir sára litla umferð. Veg sem flutningafyrirtækin munu ekki nota yfir vetrarmánuðina

Vegirnir yfir Fjarðarheiði og Oddsskarð eru ekki fjölfarnir en þar er þó margfalt meiri umferð en um Öxi. Ég ætla rétt að vona að hugsað verði til íbúa þessara staða, áður en farið er í heimnskulegar framkvæmdir á Öxi.

Vegurinn hefur verið lagfærður mikið á undanförnum árum og vonandi verður hann lagaður enn frekar.

Hvað finnst þér réttlætanlegt Hjalti, að leggja mikla fjármuni í þetta verkefni?

[Gunnar Th. Gunnarsson, 8.9.2010 kl. 14:20]

"Samkvæmt því sem fram kemur í drögum að matsáætlun eru hönnuðir vegarins ekki ánægðari með fyrirhugað vegstæði en svo að þeir treysta sér ekki til að mæla með meira en 80 km/klst. hámarkshraða a.m.k. á 4 km kafla.

Þetta sýnir vel hversu erfitt þetta vegstæði verður og full ástæða til að reikna með að vetrarfærð áþessum hluta vegarins geti orðið varasöm. (úr skýrslunni)

[Gunnar Th. Gunnarsson, 8.9.2010 kl. 14:24]

Haft eftir landeigendum á Gilsá:

"Þó ekki sé gott að átta sig nákvæmlega á því hvar væntanleg veglína liggur upp hjallana í botni Berufjarðar er alveg ljóst að þar verður ekki lagður “nútíma” vegur nema verulegt rask verði á landslagi. Þetta er mjög ámælisvert því engin þörf er að spilla þessu svæði með vegalagningu þar sem veggöng undir Berufjarðarskarð og Breiðdalsheiði myndu leysa brýna þörf á samgöngubótum á svæðinu mikið betur.

Það er fátítt í dag að ákveðið sé að byggja nýja heilsársvegi í yfir 520 metra hæð.

Slíkt er mikil fásinna og ekki verjandi nema miklir almannahagsmunir krefjist og engir aðrir kostir séu í boði. Slíku er ekki til að dreifa í þessu máli.

Lítið er talað um veðurfar í drögum að matsáætlun en öllum sem eitthvað þekkja til er ljóst að Öxi ermikið veðravíti. Það mun ekki breytast þó byggður verði nýr og eitthvað betri vegur. Tillaga um veglínu sýnir að væntanlegur vegur mun að stærstum hluta liggja í mikilli hæð.

Í haust og vetur hefur Öxi alloft verið ófær og Breiðdalsheiði stundum líka.

Við erum þess fullviss að nýr vegur yfir Öxi hefði þar litlu breytt. Hefðu veggöng hins vegar verið til staðar hefði trúlega aldrei verið ófært þessa leið, þar sem í raun hefur verið afar snjólétt í byggð þó nokkuð hafi snjóað til fjalla.

Nýr vegur yfir Öxi er einungis takmörkuð bráðabirgðalausn á samgönguvanda þessa svæðis.Bygging hans mun fresta verulega nauðsynlegum veggöngum sem hljóta að koma undir Berufjarðarskarð og Breiðdalsheiði."