Einstæð samskipti tveggja knattspyrnuþjóða.

Íslendingar hafa ekki skorað mark á útvielli  í knattspyrnulandsleikjum við Dani í 43 ár, eða síðan í hinum fræga leik 1967.

Samkvæmt þessu virðist engin leið að skora mark gegn Dönum ytra nema að fá á sig 14 mörk á móti ! 

Í öllum leikjunum frá 1946 til 1959 skoruðu Íslendingar ekkert mark, en Sveinn Teitsson, sem var miðjumaður, skoraði eitt mark gegn þeim í jafnteflisleik 1959 og held ég að það hafi verið eina markið sem þessi leikmaður skoraði í landsleik! 

Þetta einmanalega mark hans er hið eina sem Íslendingar hafa skorað utan 14:2 leiksins í landsleikjasögu sem tekur yfir 64 ár !   Þetta hlýtur að fara að komast í heimsmetabók Guinness ! 

 

P. S.  Ég breyti yfirleitt aldrei bloggfærslum mínum í neinum meginatriðum eftir á og sætti mig við það ef ég hef treyst á svikult minni eða gert hliðstæð mistök.  

Færslan var gerð í hita leiksins i gærkvöldi og féllu niður orðin "á útivelli" og "ytra" hjá mér og þar með riðlaðist öll færslan. 

Fleira er missagt hjá mér og  ofangreind færsla mín er ekki rétt hvað varðar það að við höfum staðið okkur svona hræðilega illa gagnvart Dönum á knattspyrnusviðnu.  Hið rétta er hins vegar að við höfum ekki getað skorað mark á móti Dönum í neinum landsleikjum við þá í Danmörku síðan 1974, eða í 36 ár ! 

Og við höfum heldur ekki unnið einn einasta af 21 landsleik við þá, hvorki hér heima né ytra í 64 ár ! Hlýtur slíkt að teljast óvenjulegt. 

Biðst ég velvirðingar á þessum mistökum í hita leiksins og sýnist raunar líklegt að þau sýni, að ég sé haldinn sama "Danakomplexinum" og íslenska landsliðið virðist hafa verið haldið í leikjunum ytra í meira en 60 ár.

Nú er bara að eyða þessum komplex í eitt skipti fyrir öll og vinna þá í fyrsta skipti í 64 ár og helst á útivelli! 

Grátlegt tap gegn Dönum á Parken

Athugasemdir

[Eiríkur Guðmundsson, 8.9.2010 kl. 03:05]

Það eru rétt rúmlega áratugur síðan að Eyjólfur Sverrisson skoraði mark gegn Dönum í landsleik, en það gerði hann 2. september árið 2000.

[Eiríkur Guðmundsson, 8.9.2010 kl. 03:17]

1949 skoraði Halldór A Halldórsson í 5-1 tapi fyrir Dönum.

1957 skoruðu Ríkharður Jónsson og Þórður Þórðarson í 2-6 tapi

1960 skoruðu Sveinn Jónsson og Þórólfur Beck í 2-4 tapi og sama ár skoraði Sveinn Teitsson í 1-1 jafntefli.

1965 skoraði Baldvin Baldvinsson í 1-3 tapi.

Ísland hefur síðan aðeins skorað 4 mörk frá 14-2 tapinu. Guðgeir Leifsson og Eyleifur Hafsteinsson í 2-5 tapi '72, Matthías Hallgrímsson í 2-1 tapi '74 og svo Eyjólfur árið 2000 í 2-1 tapi.

Ísland hefur því skorað 11 mörk fyrir utan 14-2 leikinn.

[Ómar Ragnarsson, 8.9.2010 kl. 09:17]

Mest af því sem þú segir af landsleikjum okkar við Dani í athugasemd þinni, Eiríkur, kemur mér mjög spánskt fyrir sjónir.  Ég minnist þess ekki að við höfum leikið svona marga landsleiki við Dani á árunum 1957 og meira að segja tvo árið 1960. 

Þegar skrifstofa KSÍ verður opnuð ætla ég að fá upplýsingar um þetta. 

Þess má geta að eftir 0-4 tap hér heima fyrir Dönum 1955 lék danska landsliðið leik við Reykjavíkurúrval og tapaði 5-2.  En slíkur leikur telst ekki landsleikur.

[Ómar Ragnarsson, 8.9.2010 kl. 09:27]

Nú sé ég á frétt frá árinu 2007 að Íslendingar hafi ekki skorað mark í landsleikjum við Dani á heimavelli þeirra síðan árið 1974 eða í 36 ár.

Meðan annnað kemur ekki í ljós skoðast það hið rétta og ég biðst velvirðingar á að hafa haldið að þetta ástand í leikjum okkar við Dani hafi verið verra en þetta. 

Ekki er þó allt rangt í minni færslu og rétt í þinni. Þannig var það rétt munað hjá mér að Íslendingar léku við Dani 1959 en ekki 1960 eins og þú segir. 

Hitt stendur eftir að auðvitað er það einsdæmi að í öllum þeim mörgu landsleikjum, sem við höfum leikið við Dani frá 1974 skuli okkur aldrei hafa tekist að skora mark á útivelli. 

Þessu verðum við að breyta og það helst með fyrsta sigrinum yfir þeim. 

[Eiríkur Guðmundsson, 8.9.2010 kl. 15:22]

Mér sást reyndar yfir orðið á útivelli þarna, sem breytir nú ýmsu. Í þessari upptalningu fyrir ofan er leikurinn 49 og 59 á útivelli og svo 74, eins og þú bendir réttilega á.

Klúður hjá mér sem veldur misskilningi.

En annars væri skemmtilegt að fara að sjá sigur gegn þeim. Þetta fer að leggjast verr á mann en gamla Svíagrýlan í Handboltanum.