Að "fiska víti".

Stundum sér maður eða heyrir setningar á borð við þessa: Hann skoraði fjögur mörk, átti fimm stoðsendingar og fiskaði tvö víti.

Í svona lýsingu er það lagt að jöfnu sem hið besta mál að skora mörk, gefa stoðseningar og "fiska víti." 

Nú er það svo að í flestum tilfellum felst í því að "fiska víti" að reyna eftir bestu getu að skora en þurfa að sæta því að varnarmaður andstæðinganna neyðist til að brjóta af sér til að koma í veg fyrir að mark verði skorað. 

En því miður er það alltof oft að sóknarmenn reyna að búa til atburðarás sem gerir þeim kleift að láta líta svo út sem brotið hafi verið á þeim í stað þess að reyna sitt ítrasta á heiðarlegan hátt að sleppa fram hjá varnarmanninum og skora.

Í orðinu "fiska" leynist að vísu sú hugsun að verið sé að leggja gildru fyrir andstæðinginn og er það oft gert á ódrengilegan hátt. 

Mér kemur í hug leikmaður hér á árum áður, sem hét Elmar Geirsson. Hann var fljótur sóknarmaður sem harðir varnarmenn reyndu oft að stöðva með hörðum tæklingum, en oft var unun að horfa á Elmar hvernig hann "hljóp upp úr" tæklingum á aðdáanlegan hátt og komst sína leið með boltann. 

Oft hefði hann auðveldlega getað látið sig falla og "fiskað aukaspyrnu" eða jafnvel "fiskað víti." 

En hann var heiðarlegur leikmaður, sem gerði sitt besta án nokkurra undirmála. 

Ég hef verið afar gagnrýninn á ljót og harkaleg brot varnarmanna og jafnvel sett fram þá kenningu, að hafi leikmaður sannanlega brotið af sér og afleiðingarnar orðið þær að mótherjinn hafi beinbrotnað ætti hinn brotlegi að vera í settur út af í leikbanni jafn lengi og hinn meiddi er frá vegna meiðslanna. 

En þessi krafa um ákveðnari og betri dómgæslu hefur því miður leitt til þess að ákveðnir leikmenn beinlínis gera út á að búa til aðstæður þar þeir geta, oft með vel heppnuðum og útsmognum leikaraskap, "fiskað" víti eða aukaspyrnur. 

Þessir leikmenn gera íþróttinni meira ógagn en ruddarnir því að með leikaraskapnum gera þeir dómurum erfiðara fyrir að beita sér gegn ruddaskapnum. 

Krafa um ákveðnari dómgæslu og harðari viðurlög hlýtur því einnig að beinast að því að harðara verið tekið á þeim sem sýna þann ódrengskap að reyna að "fiska" andstæðinga sína útaf, eins og það er stundum kallað í handboltanum. 

 

Aldridge: Nani er ógeðfelldur leikmaður

Athugasemdir

[Einhver Ágúst, 3.11.2010 kl. 11:23]

Vel orðað og málefnalegt.....knattspyrnan er óheiðarleg í keppnisumhverfi sínu því miður og peningarnir eru aðgera þetta alveg galið...

[Villi (IP-tala skráð) 3.11.2010 kl. 12:45]

Sammála. Eins er annað sem mér líkar illa og það hafa United menn stundað. Það er að taka aukaspyrnur hratt og áður en andstæðingar hafa náð að stilla upp. Ódrengilegt. Oft sýna dómararnir flutuna og þá verða þeir að bíða en oft gleymist það. Fyrir bragðið þoli ég ekki ákveðna leikmenn sem mér finnst stunda þetta td. Ryan Giggs.

[Offari, 3.11.2010 kl. 17:19]

Eru seld veiðileyfi í Víti?

[Egill Óskarsson, 4.11.2010 kl. 00:41]

Villi, mér sýnist þú ekki alveg þekkja knattspyrnulögin nógu vel. Það er liðið sjálft sem ákveður hvort það ætlar að bíða eftir flauti eða ekki, dómarinn getur bara spurt en ef liðið er þegar búið að taka spyrnuna lætur hann leikinn einfaldlega halda áfram hafi hún verið tekin á réttum stað og boltinn ekki verið á hreyfingu. Dómarinn hefur auk þess yfirleitt ekki einu sinni fyrir því að spyrja nema að brotið sé í skotfæri við markið. 

Svo skil ég ekki af hverju þú tekur Man Utd eitthvað sérstaklega út fyrir sviga varðandi þetta atriði. Öll lið gera þetta og flest eru orðin meðvituð um það að best er að láta allavega einn leikmann vera nálægt boltanum þangað til ljóst er hvort að bíða á eftir flauti eða ekki. 

Annars fer Aldridge algjörlega offari í þessum pistli og er á öndverðum meiði við flesta sem hafa tjáð sig um þetta atvik.