Takmarkanir greindarinnar.

Mælingar á greind eru háðar ákveðnum forsendum, sem geta verið umdeilanlegar, enda settar fram af mönnum, sem hafa ekki jafn mikla greind samkvæmt þessum mælingum eins og þeir greindustu sem mældir eru.

Ótal dæmi eru um manneskjur, sem hafa mjög mikla greind eða gáfur á afmörkuðum sviðum en ekki á öðrum. Stærðfræðisnillingar eru sumir hverjir það sem kallað er þroskaheftir eða háðir miklum takmörkunum á öðrum sviðum mannshugans.

Sumir afburðamenn á ákveðnum sviðum hafa verið algerlega siðblindir og nánast fávitar í því tilliti. 

Enginn neitar því að Albert Einstein var yfirburðamaður á sínu sviði og jafnframt mikilhæf persóna að öðru leyti. Og verk þessa mikla snillings og annarra hafa reynst nytsöm í þeirri tækni og vísindum sem hafa verið undirstaða stórkostlegra framfara okkar tíma. 

Mennskum mönnum mun aldrei takast að komast að hinum eina algilda sannleika alheimsins því að eina staðreyndin sem virðist blasa við er sú, að hann sé óendanlegur og eilífur, en af því leiðir að möguleikarnir á hverju sem er í eilífðinni séu óendanlega margir, jafnvel það að afstæðiskenningin geti verið röng og sömuleiðis kenningin um Miklahvell. 

Spurning Pílatusar er sígild: Hvað er sannleikur?  Við kunnum að komast nærri sannleikanum innan afmarkaðs ramma tíma og rúms, en hinn endanlegi algildi sannleikur er okkur sennilega jafn fjarri og hann var Pílatusi, þrátt fyrir allar framfarirnar sem orðið hafa síðan þá. 

Tólf ára með hærri greindarvísitölu en Einstein

Athugasemdir

[Haukur Kristinsson (IP-tala skráð) 30.3.2011 kl. 13:02]

Ráðlegg þér að lesa bókina "The Grand Design", eftir Stephen Hawking og Leonard Mlodinow. Líklega hefur þú þegar lesið bók Hawkings "A Brief History of Time", sem þýdd var á íslensku. Einnig mæli ég með bókinni "The Elegant Universe" eftir Brian Green. Menn eiga ekki að tjá sig um eins flókin fræði og "The Principle of Relativity", "Quantum Theory", "Universe, Multiverse", "Big Bang", nema að hafa lesið sig til og það mjög rækilega. 

[Elvar Eyvindsson (IP-tala skráð) 30.3.2011 kl. 14:16]

Nú geta vísindamenn velt því fyrir sér, og eflaust til gagns, hvernig allt þetta virkar í smáatriðum, hvernig jónir og eindir þeytast út og suður eftir flóknum lögmálum og víst er að það er hin þyngsta þraut. Samt hallast ég að því eins og Ómar og held að það sé mikilvægara, að stóra spurningin sé hvað er heimur og tilvera og hvað er það að vera maður sem hugsar og er til. Það munu flóknustu reikniformúlur seint geta leyst.

[ks (IP-tala skráð) 30.3.2011 kl. 16:16]

"As far as we known today, Albert Einstein has never done any IQ test. Thus his IQ is unknown!"

...no further comment..

[Skuggi (IP-tala skráð) 30.3.2011 kl. 17:01]

@ Hauk. Kíktu á Electric Universe theory og eftir að þér

hafið lesið yður til og það mjög rækilega, er ásættanlegt

(samkvæmt yðar eigin reglu) að þér tjáið yður á því sviði.

[Jón Logi (IP-tala skráð) 30.3.2011 kl. 19:27]

Hvernig skyldi Tesla koma út úr þessu mati öllu. Nógu skratti skarpur til þess að ennþá eru margar kenningar hans mönnum ráðgáta. Get bent á eina sem Mythbusters tóku í skoðun. Þeir urðu að játa það að kenning kallsins virkaði, en sú staðreynd setur nýja vídd í samhengi orku....

[Sigurður Antonsson, 30.3.2011 kl. 22:37]

Er ekki nægilegt að fá að sjá þetta allt. Himinngeiminn. Vera hluti af alheiminum. Hvað skyldu skordýrin sjá. Er okkar sýn ekki álíka í réttum stærðarhlutföllum. Leyndardómur upphafsins er varla fæðing eða umbreyting í aðra stærðargráðu. Eitthvað allt annað. Greind eða uppgötvun nær ekki yfir það?

[Karl Ólafur (IP-tala skráð) 31.3.2011 kl. 21:34]

Til að byrja með, þá er drengurinn einhverfur. Í öðru lagi, Haukur, þá er það að hafa lesið einhverjar bækur eftir "stóra" vísindamenn ekki að gera neinan almennilega fróðan um þessa hluti. í bókum af þessu tagi er ekki minnst á stærðfræði, vegna þess að þær eru hannaðar fyrir almenning, ómenntaðan í vísindum. Svo er engin regla sem segir að maður verði að lesa sér til mjög rækilega til að geta tekið þátt í samræðum við annað fólk sem veit um það bil jafn mikið um umræðuefnið og maður sjálfur. Hefur þú lesið þér til um allt sem þú talar um?

[Ómar Ragnarsson, 1.4.2011 kl. 00:17]

Hver var það nú aftur sem sagði að þeim mun meira sem hann lærði og vissi, því betur áttaði hann sig á því hvað hann vissi lítið.

Það er ekki til neitt allsherjar upphaf alls eða endir alls, óendanleikinn og eilífðin sjá fyrir því.