Nýtt nafn: Betri flokkurinn ?

Einu sinni varð mér það á að segja við sótugan slökkviliðsvarðstjóra í beinni útsendingu, eftir að hann kom beint úr stórum bruna að segja í lok ágengs viðtals við hann í hughreystingarskyni: "Það gengur betur næst." 

Þótt meining mín væri velviljuð tóku flestir þetta sem argasta dónaskap minn í garð varðstjórans og ég áttaði mig á því að það væri skiljanlegt. 

En það varð ekki aftur snúið og þá var næsta skref að læra af þessu og gera gott úr öllu. 

Niðurstaðan varð sú að ég gerði orðin "það gengur betur næst" að kjörorði í lífi mínu. 

Í þessum fjórum orðum flest nefnilega tvennt:

Annars vegar viðurkenning á því að ekki hafi tekist til sem skyldi.

Hins vegar vilji til að læra af því og gera betur framvegis.

Nú má sjá að Besti flokkurinn telji mikilvægt að hann sýni æðruleysi og auðmýkt í sínum störfum þótt heitið "Besti flokkurinn" beri ekki vitni um mikla auðmýkt. 

Meiri auðmýkt hefði falist í því í upphafi að kalla flokkinn örlítið minna yfirlætislegu nafni svo sem "Betri flokkinn".

Það getur falist í því svipað "æðruleysi og auðmýkt" og í setningunni "það gengur betur næst".

 

„Batnandi flokkum er best að lifa“

Athugasemdir

[Anna Sigríður Guðmundsdóttir, 24.6.2011 kl. 07:53]

Ómar. Satt er það að auðmýkt er okkur víst öllum holl, þó maður gleymi henni nú stundum. Skemmtileg saga hjá þér, um hvernig algengasti skilningurinn, sem er misskilningur, getur sett allt í uppnám.

Ég veit ekki í hverju það felst aðallega, að Besti flokkurinn er ekki vinsælli en raun ber vitni.

Það hefur verið tekið til í orkuspillingunni sem var virkilega nauðsynlegt, því spillingin þar var nú ekkert fyrir þá gömlu að vera stoltir af. Þau eru að byrja að brjóta upp stórgallað skólakerfið, sem hefur svikið mörg ungmenni sem síst skyldu svikin. Er það kannski vegna alls þessa, sem sumir eru óánægðir?

Svo er búið að fjarlægja umferð að hluta til úr miðbænum, og glæða hann mannlífi í staðinn fyrir dauðar risa-blikkbeljur (risa-jeppar), sem hindru fólk í að komast áfram á tveimur jafnfljótum, og dældu koltvísýringi beint ofan í lungun á fólki.  

Mig vantar eiginlega rök fyrir að Besti sé ekki bestur ennþá, þegar ég kíki í baksýnis-spegilinn? Skoðana-kannanir breyta ekki þessari skoðun minni, þó sumir láti slíkar misvandaðar kannanir hafa áhrif á sig og sína afstöðu, sem er varasamt. 

M.b.kv.