"...og Náttfari var klár..."

Ég var í sveit á Norðurlandi í æsku og kynntist íslenska hestinum þar.  Kynni mín af honum voru þó ekki fullkomnuð fyrr en á landsmóti hestamanna á Vindheimamelum 1972 og þau kristölluðust í því ógleymanlega augnabliki þegar stjarna mótsins, Náttfari, þaut rétt framhjá mér, þar sem ég hafði fengið leyfi til að vera við brautina við myndatökur. 

Vindheimamelar eru rétti staðurinn til að slegin séu heimsmet og enn í dag er straumur um mig við tilhugsunina um þá tign og fegurð sem íslenski hesturinn býr yfir og hreif mig í skagfirsku umhverfi fyrir 39 árum.

Þótt erfitt væri að velja atriði í lagið "Í þá gömlu góðu daga..." sem gætu verið brot í heildarmynd áranna 1950-2008, varð íslenski hesturinn að komast þar inn en helst þannig, að fleira hengi á spýtunni.

Þá var það hvalreki þegar fjallað var í einu erindi um áttunda áratuginn, að í Reykjavík var á ferli á tímabili einhver skæðasti og klárasti innbrotsþjófur Íslandssögunnar, sem hlaut heitið "Náttfari", en hann náðist aldrei þótt hann væri afkastamikill.

Þess vegna hafði það þrefalda merkingu og þrefalt gildi að nota orðin "Náttfari var klár" í eftirfarandi erindi:

 

"Í þá gömlu góðu daga er Ómar hafði´enn eitthvað hár

og Hannibal var ráðherra og Náttfari var klár..."

 

Orðin "Náttfari var klár..." þýddu þrennt:

 

Hesturinn Náttfari var snjall (klár)

Hesturinn Náttfari var klár (hestur)

Innbrotsþjófurinn Náttfari var snjall ("klár")  

Spuni með heimsmet

Athugasemdir

[Magnea (IP-tala skráð) 29.6.2011 kl. 08:45]

Eitt langar mér að vita, ótengt efni þessarar færslu.

Hvers vegna leggur þú bíl þínum ekki í bílastæði við gamla HR þar sem stjórnlagaráð starfar þessa dagana? Er mjög hrifin af "baráttunni" ófatlað fólk í stæðum fatlaðs fólks og hef því furðað mig á þessu hjá þér. Hví leggur þú rétt við fatlaðra stæði og þar sem fólk með sendingar og annað athafna sig?

Bestu kveðjur

[Ómar Ragnarsson, 30.6.2011 kl. 09:17]

"Rétt við" er rétt lýsing hjá þér, því að staðurinn þar sem komið hefur fyrir að ég hafi lagt örbílum mínum er ekki stæði fatlaðra heldur hjá reiðhjólastæði og örbílarnir mínir því ekki til trafala fyrir neinn.

Á enda bílastæðisins þarna hjá er eitt stæði, sem er minna en hin. Þar myndi ég leggja ef ekki hagaði svo til að þeir sem eru í næsta stæði leggja undanekningarlaust inn á það stæði og taka sér með því tvö stæði.

En þetta er svosem ágæt ábending hjá þér og mun að sjálsögðu taka hana til greina.