Til fyrirmyndar. Maður að meiri.

Einlæg afsökunarbeiðni Veigars Páls Gunnarssonar, knattspyrnumanns, er honum til sóma. Það reynist ekki auðvelt fyrir menn að brjóta odd af oflæti sínu og viðurkenna mistök og ranga hegðun, en það hefur Veigar Páll nú gert svo vel að í minnum verður haft.

Athygli vekur hve yfirlýsingin er afdráttarlaus, hreinskilin og yfirveguð.

Hann er maður að meiri fyrir vikið. 

Öll erum við breysk og það er mannlegt að skjátlast og því eru þessi viðbrögð Veigars Páls til fyrirmyndar og eftirbreytni fyrir alla. 

Fram að þessari yfirlýsingu Veigars Páls sýndu framkoma hans og hegðun öll merki afneitunar og sjálfslygi. 

Það getur komið fyrir alla. 

En nú hefur hann heldur betur snúið blaðinu við og er ástæða til að óska honum til hamingju með það og vona að allt gangi honum í haginn. 

Veigar Páll biðst afsökunar

Athugasemdir

[Gunnlaugur Ingvarsson (IP-tala skráð) 9.9.2011 kl. 14:08]

Hárrétt hjá þér Ómar. Veigar er svo sannarlega maður af meiru fyrir þessa einlægu afsökunarbeiðni, eins og þú orðar svo vel.

Flott hjá þér að vekja athygli á þessu Ómar og skrifa svona fallega og mannlega um þetta.

[Axel Jóhann Hallgrímsson, 9.9.2011 kl. 15:32]

Var hann ekki fyrst búinn að reyna hina leiðina - að þetta væri hans eikamál og hann gæti vel "höndlað" smá drykkju?

[Haukur Kristinssonhh (IP-tala skráð) 9.9.2011 kl. 16:20]

"Til fyrirmyndar. Maður með meiru." Vá, er það nú orðin “major” dygð að biðjast afsökunar hafi maður orðið sér til skammar. Eða á kannski að heiðra drenginn með riddarakrossi?

Halló, Ómar, slakaðu nú á.

[Ómar Ragnarsson, 9.9.2011 kl. 20:32]

Ég vil benda þér á, Haukur, að þegar neysla áfengis er annars vegar, er það afar sjaldgæft að menn bregðist við eins og Veigar Páll hefur gert, heldur reyna menn yfirleitt ýmist að afneita verknaðinum, breiða yfir hann eða sleppa sem mest við það að gera málið upp.

Þess vegna kann ég að meta þetta hjá Veigari Páli. 

[Haukur Kristinsson (IP-tala skráð) 9.9.2011 kl. 20:59]

Eiginlega sammála þér Ómar. En það eru nú einu sinni svo, að ég geri meiri kröfur til þeirra, sem valdir eru í landslið Íslandinga, fótbolti eða annað, og eru fulltrúar okkar erlendis. Kannski er ég of strangur, en þannig er ég nú barasta. Því sé ég enga fyrirmynd í þessu, fremur sjálfsagðan hlut. Ómar, ekki vera meðvirkur, of margir Íslendingar eru það.

[Ómar Ragnarsson, 9.9.2011 kl. 22:26]

Hvernig í ósköpunum finnurðu út að ég sé "meðvirkur"?

Meðvirkur í hverju?  Meðvirkur í fyrri fullyrðingum Veigars Páls að þræta fyrir að hafa brotið af sér? 

Aðalvandamálið varðandi svona mál er það að menn vilja ekki viðurkenna neitt eða til vara að viðurkenna sem allra minnst. 

Ég er sammála þér í því að gera verði meiri kröfur til fulltrúa okkar erlendis en margra annarra og meiri kröfur til þeirra sem gegna mikilvægari embættum. 

Það hefur komið fyrir slíka að misstíga sig á svipaðan hátt og Veigar Páll og ég minnist þess ekki að samsvarandi og jafn afgerandi afsökunarbeiðni hafi komið frá þeim. 

Þeir komust upp með það af því að nógu margir voru meðvirkir og þannig er orðið meðvirkni notað varðandi áfengissýkina, þegar "kóararnir" reyna að gera sem minnst úr öllu eða þagga það niður. 

Að kalla það meðvirkni að fagna því að einhver gangi hreint til verks og viðurkenni til fulls það sem aflaga hefur farið finnst mér einkennilegur skilningur á orðinu meðvirkni. 

[Þorvaldur Guðmundsson, 9.9.2011 kl. 23:51]

Sammála Ómar Veigar maður að meiri nú ætti Óli að stíga upp og gera hið sama.