Sviplegt fráfall. Hverjum "líkar þetta"?

Ég hef áður sett spurningarmerki við það að þegar fólk vill lesa einhverja frétt á netinu, smelli það við merkið "líkar þetta" þar sem til áherslu er hönd með þumalinn upp í loftið.

Þegar þessi pistill er hripaður sé ég að þrettán manns hafa merkt við það að þeim "líki það" að Kara Kennedy hafi látist sviplega á besta aldri, aðeins 51 árs gömul. 

Það verður að finna eitthvað skárra en "líkar þetta" ef maður vill láta það í ljós að manni finnist frétt þess efnis að hún sé þess virði að lesa hana vel. 

Það er svo hallærislegt að sjá þegar fjöldi fólks gefur út þessa yfirlýsingu: "Líkar þetta" þegar mannslá, slys, hamfarir og aðrar slæmar fréttir dynja yfir. 

Ein úr Kennedyfjölskyldunni látin

Athugasemdir

[Jón Þórðarson (IP-tala skráð) 18.9.2011 kl. 15:46]

Já segðu, Ómar. Þetta þekkist alla vega á mörgum vefmiðlum - og hugsa sér að sjálfur Moggavefmiðillinn hvetur mann til að vera fyrstur vina sinna til að líka við verstu hörmungar. Ég hef verið að hugsa um að tala beint við eiganda eða ritstjóra til að uppræta þennan ósóma - skal alla vega vera með þér í liði til slíks.

[skúli (IP-tala skráð) 18.9.2011 kl. 19:27]

"líkar þetta" er í rauninni "lesið þetta" eða "skoðið Þetta" þetta fjallar ekki neitt um að fólki líkar við þetta

[Ómar Ragnarsson, 18.9.2011 kl. 21:05]

Þá á bara að orða það rétt og setja "lesið þetta" í staðinn fyrir "líkar þetta."

[Stebbi (IP-tala skráð) 18.9.2011 kl. 21:51]

Ég get ekki séð hvernig "Like" sé hægt að þýða sem "Lesið þetta" eða "Skoðið þetta".  "Like" þýðir einfaldlega "Líkar" á íslensku og ekki hægt að skilja það öðruvísi.  Þessi skipun sem er runnin undan hönnuðum Facebook er ekki alveg nógu vel hugsuð.