Síðasta vígið að falla ?

Danir hafa dregið lappirnar varðandi það að minnka reykingar og reykt meira en flestar þjóðir.

Drottningin hefur verið þar framarlega í flokki.

En virðast þeir loksins vera að gefa eftir og er það vel. Ingimar Eydal hefði orðið 75 ára um þessar mundir hefði hann lifað. Hann færði að því sterkar líkur á sínum tíma að aðdáendur hans hefðu reykt hann, Hauk Morthens og fleiri hljómlistarmenn í hel með óbeinum reykingum.

"Ef ég stæði upp frá píanóinu og gengi fram í veitingasalinn og kastaði af mér vatni á eitthvert borðið myndi lögregla vera látin fjarlægja mig og þetta talið saknæmt athæfi", sagði hann einu sinni við mig þegar hann átti skammt eftir. "Ég hefði þó ekki ógnað heilsu eða lífi nokkurs manns. Hins vegar er það í lagi að samkomugestir reyki mig í hel."

Mikið hefur breyst síðan Ingimar varpaði ljósi á þetta mál með ofangreindum ummælum. Er það vel og gott ef síðasta vígið í Norðurálfu, sem hefur verið í Danmörku, fer að falla hvað úr hverju.

Afstaða Dana til reykinga gjörbreytt

Athugasemdir

[Kristján B Kristinsson (IP-tala skráð) 19.10.2011 kl. 19:04]

Já Ómar það er sorglegt hvernig þetta frábæra fólk sem sjálft var algert bindindisfólk urðu fórnarlömb aðdáenda sinna sem reyktu . 

[Ómar Ragnarsson, 19.10.2011 kl. 20:44]

Haukur fékk krabbamein í hálsinn sem talið var næsta víst að væri vegna reykinga.

Ingimar fékk krabbamein, sem talið er að séu 80% líkur á að stafi af reykingum.

Þótt ekki væri hægt að slá því alveg föstu að veikindi Ingimars stöfuðu af reykingum nægði honum talan 80% til þess að verða sár yfir þessu.