Horfum til framtíðar.

Þegar Íslendingar gerðu Sambandslagasamninginn við Dani 1918 voru margir áhyggjufullir vegna þeirra réttinda Dana á Íslandi sem samningurinn gerði ráð fyrir. Þær áhyggur reyndust sem betur fór óþarfar, því að hið vanþróaða og harðbýla Ísland lengst norður í hafi sá um það að Danir höfðu ekki eftir miklu að slægjast hér. 

Þegar EES-samningurinn var gerður á sínum tíma var inni í honum að allir innan EES-svæðisins mættu kaupa jarðir á Íslandi. Margir höfðu réttilega áhyggjur af þessu, en enn sem komið er hefur þetta ekki komið sér illa enda Ísland enn langt frá öðrum löndum. 

En þetta kann að breytast með bráðnun hafíss og opnun Norður-Íshafsins og hugsanlega stórauknu vægi og verðmæti landsins og auðlinda þess, og ég held að við verðum að fara að taka þetta alvarlega fyrir og horfa til framtíðar.

Danir fengu fram við inngöngu í ESB þá undantekningu frá reglum ESB að útlendingar mættu ekki kaupa sumarhús að vild í Danmörku.

Við Íslendingar höfum það í lögum að útlendingar megi ekki eiga meira en 49% í íslenskum sjávarútvegsfyrirtækjum og mér sýnist í fljótu bragði að sama ætti að gilda um eignarhald á jörðum og að stefnt skuli að því að ná þessu fram, hvort sem við verðum áfram aðeins í EES eða gerum samning við ESB.

Nú held ég að sé rétta tækifærið úr því að verið er að vinna að samningi hvort eð er að taka þetta mál rækilega upp. 

Sagt er að jafnræði sé í gildi hvað þetta varðar því að við getum keypt jarðir í öðrum EES-löndum til jafns við kauprétt EES-fólks á íslenskum jörðum.

En stærðarmunur þjóðanna skekkir myndina, því að augljóst er að við, svo fá og smá, eigum enga möguleika á að kaupa upp heilu löndin í Evrópu, en á hinn bóginn geti meira en þúsund sinnum fjölmennari þjóðir keypt upp allar jarðir hér.

Mál Nubos gerir það aðkallandi að fara rækilega ofan í þessi mál öll með framtíðina í huga. 

Rétt verður hins vegar að vera rétt. Grímsstaðir á Fjöllum eru ekki inni í óbyggðum miðhálendisins heldur stór bújörð við hringveginn með byggða bæi á báða bóga, þótt byggðin sé dreifð og liggi nokkuð hátt yfir sjó. 

Grímsstaðir eru ekki stærsta jörð á Íslandi heldur Reykjahlíð í Mývatnssveit sem býr auk þess yfir margfalt meiri auðlindum auk náttúruverðmæta sem vart er hægt að meta til fjár. 

Lágreist lúxushótel á Grímsstöðum í stíl við Hótel Rangá og rétt við hringveginn og aðra byggð, þarf ekki að valda stórfelldri sjónrænni röskun. 

En aðalatriðið er þetta: Við eigum ekki að haga málum þannig að einn góðan veðurdag vakni Íslendingar upp við það að fjársterkir útlendingar, eða stofnanir og fyrirtæki, innlend og erlend, hafi eignast mestallt jarðnæði á Íslandi, heilu dalina og sveitirnar. 

Engin þörf er fyrir þá sem vilja fjárfesta í uppbyggingu á Íslandi að eignast stærstu bújarðir landsins. 

Huang Nubo hlýtur að geta byggt upp sína fyrirhuguðu starfsemi á Grímsstöðum á Fjöllum án þess að eignast alla jörðina eða meirihluta í henni.

Tryggja þarf að góður meirihluti jarðarinnar, sem gæti þess vegna verið sameign Nubos og íslenska ríkisins, sé í íslenskri eigu.

Tryggja þarf ennfremur í lögum að sveitarfélög eigi forkaupsrétt í svona tilfellum og að mat á verðmæti jarða sé ekki spennt upp með sýndargerningum, heldur virði þeirra metið á sanngjarnan og óvilhallan hátt. 

Jafnframt ætti ekkert að vera á móti því að semja um það, hvernig Nubo geti fjárfest í nýrri starfsemi sem heyrir undir íslensk lög, svo sem skipulagslög, sem tryggja að skynsamlega sé staðið að málum í samræmi við hag íslensku þjóðarinnar.  

Það er að mörgu að hyggja og þarf að drífa í því að gera það nú, því nú er rétti tíminn til þess.  

 

Olnbogar sig ekki áfram á Íslandi

Athugasemdir

[Ólafur Sveinsson (IP-tala skráð) 12.11.2011 kl. 23:47]

http://sigurbjorns.blog.is/blog/sigurbjorns/entry/1203757/

[G. Tómas Gunnarsson, 13.11.2011 kl. 00:39]

Að mörgu leyti má segja að þetta rími við þau varnaðarorð sem margir viðhöfðu þegar EES samningurinn var gerður.  Þá var talað um að Íslendingar hefðu fengið allt fyrir ekkert.  Ég held að flestir séu farnir að sjá að svo hafi ekki verið. 

En hinu verður ekki mælt í mót að EES samningurinn hefur reynst Íslendingum í mörgu vel, en er auðvitað ekki gallalaus.

Ef Nubo (eða einhver annar) stofnar fyrirtæki í t.d. Grikklandi, á Kýpur eða í Noregi á Ísland enga leið til að stoppa það fyrirtæki í því að kaupa Grímsstaði eða aðrar landareignir á Íslandi.  Hví skyldi hann gjalda fyrir það að að vera Kínverji, eða það að koma hreint fram og ekki fela eignarhaldið?

Ekki hef ég trú á því að þetta atriði fái margar mínútur í þeim samningaviðræðum sem nú stand yfir við "Sambandið".  Enn síður held ég að EES samningum fengist breytt í þessum tilgangi.

Hvað gera bændur þá?

[Ólafur Sveinsson (IP-tala skráð) 13.11.2011 kl. 01:47]

Lesið þetta gaumgæfilega.

http://sigurbjorns.blog.is/blog/sigurbjorns/entry/1203757/

[Gunnar Th. Gunnarsson, 13.11.2011 kl. 04:38]

Ef Nubo fær bara að kaupa hluta af Grímsstöðum, þá verður ríkið að kaupa rest af landeigandanum. Kannski sættast bæði kaupandi og seljandi á þetta.

Ég er spenntur fyrir því að sjá að hægt sé að byggja þarna upp ferðaþjónustu. Þá kannski rætist þetta "eitthvað annað" loksins. Það væri óskandi.

Ögmundur Jónasson og fleiri eru hræddir við hið óþekkta, það er mannlegt. Það hlýtur samt að vera hægt að setja einhvern regluramma utan um fyrirhugaðar framkvæmdir kínverjans. Ég botna hins vegar ekkert í, við hvað menn eru hræddir.

"Sporin hræða" segi Ömmi. Hann er þá væntanlega að tala um einhver kínversk spor erlendis. En ef regluverk um framkvæmdir og rekstur Nubo á Íslandi, er samkvæmt íslenskum lögum, þá get ég ekki séð að það skipti nokkru máli af hvaða þjóðerni rekstraraðilinn er.

[Jón Logi (IP-tala skráð) 13.11.2011 kl. 11:36]

Nú þegar eiga útlendir aðilar jarðir víða í kring um mig. Einn á nánast heilan dal. Og þar er EKKI atvinnuuppbygging í gangi, - það væri líflegra ef þetta væru bara 6 kúabú eða svo.

Abbars mjög sammála Ómari, það ætti að skoða þetta m.t.t. forkaupsrétta og deildrar eignaraðildar. Áætlanir Nubos eru einfaldlega það magnaðar, að ekki verður litið fram hjá þeim.

Ein jörð eða partur úr henni og það er verið að tala um tugmiljarða innspýtingu og hundruði af störfum. Ekki hægt að líta fram hjá því.

Nú er Marriot keðjan að fara að byggja skverlegt hótel við hliðina á Hörpu. Er það ekki bara varasamara en hitt, - útlend keðja í beinni samkeppni við þær Íslensku? Ég lenti einu sinni í rökræðum við lífsreyndan félaga sem taldi ferðaþjónustuna ekki verða neitt sem skilaði neinu, þar sem tilhneigingin væri svo oft sú að hún færi að tilheyra einhverju apparati erlendis, og innfæddir fengju bara vinnu við að skúra og skrúbba á meðan hinn raunverulegi virðisauki sogaðist burt. Sjáðu bara allar paradísareyjarnar með flottu strendurnar og hótelin, og innfæddir ríðandi um á ösnum og búandi í blikkskúrum. Nokkuð til í þessu. En margt má nú á milli vera ef klárt er að staðið.

[Þorvaldur Sigurðsson (IP-tala skráð) 13.11.2011 kl. 11:36]

Nú er það svo að Ömmi er ekki einn um tortryggni gagnvart þessu verkefni.  Ekki ómerkari maður en formaður Sjálfstæðisflokksins hefur látið í ljós efasemdir um þessi mál.  Í hvorn fótinn eigum við nú að stíga?  Eigum við að vera sammála meintri skoðun félaga Steingríms (hrollur) og fara gegn vilja foringjans (enn meiri hrollur), eða stöndum við með leiðtoga vorum?

http://www.dv.is/frettir/2011/9/4/bjarni-ben-hefur-efasemdir-um-kaup-kinverjans/

[Leifur Þorsteinsson, 13.11.2011 kl. 12:00]

Hvað eru Kínverjar að gera með kaupum á jarðnæði í Astralíu, Asíu og Afríku.

Haldið þið virkilega að prívat maður hafi full yfirráð yfir slíku fjármagni í

alþýðu lýðveldinu Kína, sem þessi fyrverandi? embættismaður uppvaxsinn

á tíma menningarbyltingar, á aðhafa.

[Gunnar Th. Gunnarsson, 13.11.2011 kl. 12:27]

Bjarni Ben kom mér á óvart. Hanna Birna er ósammála honum og segir sem rétt er að peningar eigi sér ekki landamæri.

[jonasgeir (IP-tala skráð) 13.11.2011 kl. 14:35]

Þetta er ekkert flókið mál.

Með því að leyfa erlent eignarhald á "dauðum" hlutum á Íslandi er verið að hækka verðgildi þessara hluta nær alþjóðamarkaðsverði.

Jarðir á Íslandi nálgast þá heimsmarkaðsverð á gulli eins og aðrir takmarkaðir áþreifanlegir hlutir á jörðu hér.  

Í stað þess að eiga gull dautt í bankahólfi geta auðmenn átt jarðir "dauðar" á Íslandi.

Þetta er ekki sniðug þróun fyrir almenning.  Ónothæft jarðnæði í erlendri eign er þanni dautt og engum til gleði og gagns.  Og ekki einu sinni eigendanum sem sjaldan kemur til landsins.

Fjárfesting í atvinnulífi, starfssemi og hugviti er allt annað mál.

[sveinn sigurður ólafsson (IP-tala skráð) 13.11.2011 kl. 23:33]

fannst þetta svoldið skondið,

fyrrverandi starfsmaður hjá áróðursmálastofnun kínverja, kemur hér og ætlar að kaupa land.

lætur taka af sér mynd með harðfisk (stilltur upp..)

svoldið skondið miðað við fyrrverandi starf mannsins og merkilegt hve margir kaupa þetta.

áhugaverða við þetta er tal um opnun norðurleiða og staða íslands í ljósi þess, komst maðurinn yfir einhverjar upplýsingar um það og þessvegna vill hann reisa hótel?

[Guðlaugur (IP-tala skráð) 14.11.2011 kl. 00:16]

Sæll Ómar.

Þetta er akkúrat farvegurinn sem svona mál eiga að fara í skoða af skinsemi og haf íslenskt regluverl i lagi. Það þarf ekki að vera neitt annað en jákvætt að svona hótel sé sett niður á þessum mel sem Grímstaðalandið er. Gs.

[Ómar Ragnarsson, 14.11.2011 kl. 19:16]

Grímsstaðalandið er ekki "melur". Að vísu hefur geigvænleg jarðvegseyðing fengið að grassera vegna ofbeitar áratugum saman, en frá náttúrunnar hendi er meginhluti Grímsstaðalands gróið land og stórir hlutar þess að gróa upp vegna kúvendingar í nýtingu þess þar sem landgræðsla, friðun og hófleit beit hafa völdin.