Norsku stafkirkjurnar gefa tóninn.

Stafkirkjurnar tvær sem ég hef skoðað í Noregi höfðu meiri áhrif á mig en allar aðrar byggingar þar í landi.

Þær hafa mikið aðdráttarafl fyrir ferðamenn vegna þess að engar aðrar hliðstæðar kirkjur er að finna í Evrópu þótt í flestum löndum sé að finna margfalt stærri steinkirkjur. 

Margar frægar kirkjur í Evrópu hafa verið endurbyggðar eða endurreistar frá gruni, flestar vegna þess að þær voru eyðilagðar í stríðinu. Enginn tekur til þess svo framarlega sem þær eru eins og þær voru. 

Enginn efi er á því að þegar og ef þarf að endurreisa stafkirkjurnar í Noregi vegna skemmda eða aldurs, verður það gert og gildi þeirra verður ekkert minna fyrir það. 

Miðaldakirkjurnar í Skálholti voru endurreistar jafnóðum og þess gerðist þörf og því enginn eðlismunur á því að endurreisa þá stærstu. 

Með þvi að kynna sér ágóðann af hliðstæðum húsum erlendis ætti að vera hægt að finna út hvort og hvernig þetta borgaði sig. 

Náttúru- og menningartengd ferðaþjónusta er stækkandi hluti af ferðaþjónustu. Fólk kemur ekki til Íslands af því að hér séu betri hótel og bílaleigur en í öðrum löndum, það sýna kannanir. 

Sem dæmi um lítið atriði sem verður stórt fyrir erlenda ferðamenn er það, þegar komið er að gröf í Skálholti og sagt: Hér hvílir síðasti kaþólski biskupinn yfir íslenskri þjóðkirkju, og synir hans. 

Það finnst erlendum ferðamönnum stórmerkilegt og svara einatt: "Það getur ekki verið; kaþólskur biskup og synir hans! 

Ég legg til að áður en ferðamenn framtíðarinnar skoði komandi miðaldakirkju verði þeir fyrst látnir skoða grafir Jóns Arasonar og sona hans. Eftir það muni þeir trúa nánast hverju sem er. 

 

P. S. Athugasemd að fenginni ábendingu í athugsasemd.

Hér skriplaði ég á skötunni og ruglaði saman biskupssetrumm.

Jón og synir hans eru grafnir á Hólum.

Hins vegar er það rétta varðandi Skálholt að þar hvá erlendir ferðamenn þegar þeim er sagt frá aftöku Jóns Arasonar og sona hans, og hef ég ekki ómerkari mann fyrir þessu en Ólaf Sigurðsson, fréttamann, en bæði faðir hans, Sigurður Pálsson, og síðar bróðir hans, Sigurður, voru vígslubiskupar í Skálholtsbiskupsdæmi.

Og ekki ætti undrun erlendra ferðamanna að verða minni við grafirnar á Hólum.  

Miðaldakirkja rísi í Skálholti

Athugasemdir

[Gunnar Th. Gunnarsson, 16.11.2011 kl. 01:13]

Sammála.... úps

[Gunnar Th. Gunnarsson, 16.11.2011 kl. 01:14]

Ég verð að bæta þessum við....

[Jón Logi (IP-tala skráð) 16.11.2011 kl. 09:27]

Sammála líka.

Nú er ég ekki kirkjukall. Fékk t.d. alveg upp í kok af þessu kirkjudóti öllu í Vilnius, þar sem virðist vera dómkirkja á 400 metra bili í allar áttir. En, það er sterkur túrismi í kringum þetta.

Var nú leiðsögumaður í sumar, og lagði lykkju á leið hópsins að ósk eins farþegans, - að Skálholti.

Fólkið var stórhrifið að kirkjunni, og áður hafði Hallgrímskirkja verið skoðuð, - sama þar.

Evrópskar steinkirkjur eru nebbnilega annar stíll, og margar talsvert yfirskreyttar.

Ferðamenn eru margir líka mjög hrifnir af gömlum sveitakirkjum, og ég er löngu búinn að missa töluna á þeim sem ég hef sýnt kirkjuna á Keldum á Rangárvöllum við mikla hrifningu.

Þessi hugmynd er kannski nokkuð djörf, en mér finnst hún sniðug, og hún mun örugglega draga fólk þarna uppeftir. Og þá kemur hitt. Skálholtskirkja sem nú stendur er aldeilis frábært tónlistarhús, með mjög góða "accoustic". Þarna er hægt að tvinna þetta saman.

Og svo passa að fúaverja og hafa slökkvitæki

[Eiður (IP-tala skráð) 16.11.2011 kl. 09:54]

 Það verður þá að segja   söguna eins og hún er, að hér hafi Íslendingar hálshöggið sinn síðasta kaþólska biskup og syni hans  7. nóvember 1550.  Norsku stafkirkjurnar sem ég  hef  heimsótt  eru upprunalegar ekki endursmíðuð tilgátuhús

[DoctorE (IP-tala skráð) 16.11.2011 kl. 10:22]

Fáránlegt að sóa fé í einhverja fornkirkju; Það verður varla til hræða eftir nokkur ár sem hefur áhuga á svona fáránleika.

[Vilhjálmur Örn Vilhjálmsson, 16.11.2011 kl. 11:04]

Monstrum Medievalis

http://fornleifur.blog.is/blog/fornleifur/entry/1205127/

[Svanur Gísli Þorkelsson, 16.11.2011 kl. 13:42]

"Með þvi að kynna sér ágóðann af hliðstæðum húsum erlendis ætti að vera hægt að finna út hvort og hvernig þetta borgaði sig."  Ómar, meinarðu  að ef hægt er að græða á því sé það svo sem í lagi? -

[Þorvaldur Sigurðsson (IP-tala skráð) 16.11.2011 kl. 15:23]

Þótt þetta sé hinn ágætasti pistill verð ég að gera athugasemd.  Jón Arason og synir voru ekki grafinir í Skálholti heldur á Hólum.  Það hefur því lítið upp á sig að leita grafar hans sunnan heiða. 

[Ómar Ragnarsson, 17.11.2011 kl. 00:01]

Úps! En á báðum stöðunum er ferðamönnum greint frá lífláti feðganna og ég hef ekki ómerkari mann fyrir viðbrögðum erlendra ferðamanna í Skálholti en Ólaf Sigurðsson fréttamann sem veit sitt af hverju um Skálholt og gesti þar, af því að faðir hans og bróðir voru vígslubiskupar í Skálholtsbiskupsdæmi.

Að sjálfsögðu verður að láta ferðamenn vita af því að um "tilgátuhús" sé að ræða, en jafnframt að geta þess skilmerkilega hvað sé vitað um það, svo sem um stærð hússins og skipan þess í meginatriðum. 

[Ómar Ragnarsson, 17.11.2011 kl. 00:11]

Ég orðaði þetta svona með "kaþólskan biskup" því að síðan kaþólskur söfnuður var stofnaður í Reykjavík hafa verið hér "kaþólskir biskupar".

Raunar er orðanotkunin og titlatogið svolítið snúið, því að miðað við það að trúfrelsi er á landinu er tiltill hins evangelíska lúterska biskups svolítið hæpinn: "Bískupinn yfir Íslandi." 

Sem minnir á það að þrátt fyrir sérkennilega ræðu, sem flutt var á Kirkjuþingi um frumvarp stjórnlagaráðs og haft horn í síðu ákvæðis um kirkjuskipan í því, var ræðumaður sammála í því að úrelt væri að hafa það í stjórnarskrá að ríkisvaldið skuli sérstaklega styðja og vernda "hina evangelisku lútersku kirkju" sem þar að auki er ókvæmt orðalag, því að fríkirkjan er líka evangelisk lútersk. 

Hins vegar sé ég ekkert því til fyrirstöðu að Þjóðkirkjan nefni sig því nafni, því að hliðstæðurnar eru og hafa verið nokkar, "Þjóðvaki", "Þjóðviljinni" sálugi o. s. frv.