Ein elsta tegund leikja.

Stríðsleikir eru ein elsta tegund leikja sem til er, líkast til jafngamlir manninum. Um aldir hafa íslenskir drengir leikið sér að því með sverðum að skylmast og vega hver annan.

"Jesús kallar: Verjið vígið, / vaskra drengja sveit!" sungum við strákarnir í Kaldárseli. Og einnig: "Myrkraherinn, syndasveimur, /  sígur móti oss. / Margir falla, felast sumir, / flýjum því að kross!"

Vel ort hjá séra Friðriki og ekki var síðri krafturinn í söngnum: "Áfram! Kristmenn!  Krossmenn! / Kóngsmenn erum vér! / Fram í stríðið stefnið, / sterki æskuher!"

Á tímabili tókum við þetta þó kannski aðeins of bókstaflega, hlóðum vígi úr grjóti í hrauninu og köstuðum steinum (ímynduðum handsprengjum). En fljótlega lærðist okkur boðskapur söngvanna.

Fyrir mörgum árum kom ég í leiktækjasal erlendis, þar sem maður gat farið upp í tölvugerða eftirlíkingu af sprengjuþotu og flogið í árásarferð í Vietnam. Það telst viðburður ef ég fer í leiki í leiktækjum en af því að ég er flugmaður og stóð til boða að stjórna flugvél ákvað ég að prófa. 

Ég settist því í flugmannsætið og fljótlega gleymdi ég mér alveg, því að þetta var svo spennandi, bæði að höndla þotuna, finna skotmarkið og fara rétt að því að varpa sprengjunum og einnig að forðast skothríð úr lofvarnarbyssum og verjast árásum andstæðinganna.  

Mér tókst að klára verkefnið en um leið og ég slökkti á leiktæknu setti að mér hroll yfir því sem ég hafði verið að gera í huganum; að hafa gaman af stríðleik sem miðaðist að því að nota ítrustu tæknisnilli mannsandans og yfirburði í gerð stríðstóla til að drepa og limlesta fátækt fólk í fjarlægu landi. 

Ég spurði sjálfan mig: Hvernig getur andstæðingur Víetnamstríðsins tekið þátt í svona leik? 

Og samt er ég mikill áhugamaður um styrjaldir, vopnabúnað og bardagaíþróttina hnefaleika en hef aldrei lagt hendur á nokkurn mann. 

Þetta er allt fullt af mótsögnum. 

Stríðsleiki og bardagaíþróttir verður aldrei hægt að banna.

Heldur ekki blóðugar og hryllilegar glæpa- og stríðssögur sem margt friðsemdarfólk hefur yndi af að lesa og jafnvel lifa sig inn í.

En það eru takmörk fyrir öllu og verður einhvers staða að draga línu á stóru og erfiðu gráu svæði þess sem telst boðlegt fyrir siðað og friðsamt fólk. 

Við getum að vísu deilt um það út í eitt hvar linan eigi að liggja, en nærtækast hlýtur til dæmis að vera að huga að leikjum sem snúast um það að ná sem blóðugustum árangri í skipulagningu og framkvæmd hryðjuverka. 

Á sínum tíma, skömmu eftir hið hroðalega Víetnamstríð, hefði ég dregið línuna þannig, að sleppa þessum ljóta árásarleik af því að stríðið var þá svo nálægt í tíma og aðferðirnar sem notaðar voru í því, voru oftar en áður hafði þekkst svívirðilega villimannlegar. 

Nóg var af öðrum bardagaleikjum í leiktækjasalnum, sem reyndu á færni og snerpu. 

 

Þingmenn deila um tölvuleik

Athugasemdir

[DoctorE (IP-tala skráð) 24.11.2011 kl. 14:24]

Þetta er bara rugl, það verður enginn geðveikur morðingi af því að spila tölvuleiki; Það er líka verið tengja tölvuleiki við geggjun Breiviks, call of dudy + WOW létu hann drepa, það er bara rugl og bull.

Hvað með skák, þegar menn drepa biskup.. er það eitthvað annað, væru allir biskupar ekki myrtir ef leikir hefðu þessi áhrif; Væri karl biskup ekki í skotheldum kufli og alles ha

Ég þekki ótal tölvuleikjaspilara, allir ljúfir sem lamb, engum dettur í hug að drepa í raunveruleikanum.

Ég er orðin leiður á svona skotleikjum.. er meira í RPG í dag, Skyrim alveg frábær leikur, svo ég tali ekki um Zelda

[Haraldur Rafn Ingvason, 24.11.2011 kl. 17:48]

Þekki vel fullorðinn mann sem datt í þessa tegund leikja fyrir nokkrum árum. Eftir að hafa spilað þá í nokkurn tíma varð hann sannfærður um að viðbrögð sín t.d. í umferðinni hefðu batnað töluvert.

Ég sé engann mun á þessu leik og öðrum sambærilegum skotleikjum (er búinn að fara í gegn um hann) annan en þann að hann gerist ekki á Mars eða Helghan. þarna er umhverfið kunnuglegt og raunar er það einmitt sá punktur sem fer sérstaklega í taugar þessa Vaz-gaurs!

[Svavar (IP-tala skráð) 25.11.2011 kl. 13:04]

þessi leikur er bannaður börnum innan 18 ára í bretlandi og bandaríkjunum.

Það er fullorðið fólk sem er að spila þessa leiki. Ekki krakkar nema þá með leyfi

foreldra. Þetta er svo yfirmátlega heimskuleg tillaga.

Ef það á að banna svona leiki á þá ekki að banna stríð eða fótbolta? Það er mikið ofbeldi til dæmis í rúbbí eða amerískum fótbolta.

Svona fólk sem kemur með svona tillögur þekkir greinilega ekki muninn á raunveruleika og ímyndun. Eða hafa einhvern tíman spilað tölvuleiki.

Það vill frekar hafa ofbeldi í sjónvarpi þar sem fólk situr og horfir á glæpaþætti

en að fólk taki raunverulega þátt í leiknum.

Ef þessi tillaga verður samþykkt þá er alveg eins gott að segja bara, gjörið svo vel

talibanar takið yfir heiminn og gerið hann að leiðindastað.

[Jón Ferdínand (IP-tala skráð) 25.11.2011 kl. 14:32]

Nákvæmlega Svavar, hvað vill fólk meira en bannað innan átján ára? Banna sjálfráða fólki sem má kjósa að spila tölvuleik?

Það er nú einu sinni bara þannig að til þess að spila tölvuleik og fara síðan út til þess að fremja ófremdarverk líkt og morð vegna leikjarins, þá þarftu að hafa einhvers konar geðrænan vanda!

Væntanlega er það þá á ábyrgð foreldra sem ættu barn sem ætti við slíkan vanda að stríða að ekki vera að kaupa handa því ofbeldisleiki eða ofbeldismyndir á sama hátt og þau ættu ekki að kaupa handa því byssu eða hníf.

[Jón Ferdínand (IP-tala skráð) 25.11.2011 kl. 14:43]

Ps: Ómar: Þú skiljanlega skemmtir þér konunglega í þessum leik sem þú lýstir fyrir okkur, en hrylltir þér síðan við tilhugsuninni um að þurfa að gera þetta í alvörunni!

 Er það ekki bara jákvætt? Og myndir þú ekki búast við slíkum álíka viðbrögðum hjá hverjum þeim sem hefur einhvers konar ásættanlegt siðferði? Hryllir ekki flestu fólki við tilhugsuninni um morð líka? 

 Svo má líka bæta því við að það eru líka til ofbeldisfullir leikir sem hafa mjög jákvæðan boðskap! Ég mæli í þeim skilningi með Batman: Arkham City sem var að koma út, en þar leikur þú Batman og lemur ógrynni glæpamanna og morðingja í klessu en þú gerir það til þess að bjarga lífum!

Og ef ofbeldisfullt innihald hluta er svo slæmt, ætti þá ekki að banna lestur á Biblíunni þar sem óvarkár lesandi gæti auðveldlega farið út að myrða fólk eftir hennar lestur þar sem mjög beinskeyttar skipanir koma þar iðulega fram um að myrða og nauðga fólki frá sjálfum skapara alheimsins(samkvæmt bókinni allaveganna;))?