Firring í hernaði verður æ meiri.

Í hefðbundnum hernaði fyrri alda var hermönnum att á móti andstæðingum sínum og þeir horfðust í augu við afleiðingar gerða sinna.

Þegar fallbyssur komu til sögunnar fjarlægðust skotmörkin en herirnir sáu þó oftast hvorir aðra og fylgdust í grófum dráttum með árangri kúlnahríðarinnar og urðu að taka við kúlum andstæðinganna og særast eða hljóta bana ef svo bar undir.

Lofthernaður seinni heimsstyrjaldar jók enn á firringuna. Nú var fjarri því að hermenn horfðust í augu við fórnarlömb sín á jörðu niðri og það var helst að viðureign sprengjuflugmannanna við orrustuflugvélar andstæðinganna viðhéldu hinni gömlu nálægð við mótherjana.

Notkun ómannaðra árásarflugvéla fer nú sívaxandi og stjórnendur þeirra sitja í þægilegum stjórnstöðum, oft tiltölulega fjarri skotmarkunum og taka enga áhættu af því að svo mikið sem hár verði hreyft á höfði þeirra þótt flugvélarnar verði fyrir skothríð eða verði jafnvel skotnar niður.

Hernaðurinn er af hálfu árásaraðilans orðinn að ígildi skemmtilegs tölvuleiks með firringu sem gerir menn að tilfinningalausum og kaldrifjuðum slátrurum þegar svo ber undir.

Hernaðurinn er orðinn fjarlægur og ópersónulegur frá upphafi til enda.

Fyrst eru ómannaðar könnunarflugvélar eða upplýsingar úr gervitunglum ígildi njósnara fyrri tíma, sem hættu sér inn á óvinasvæði og út af því aftur, síðan er árásarflugvélunum fjarstýrt að skotmörkunum, og í lokin er upplýsinga aflað með hliðstæðri tækni,  og upp á tölvuskjáinn kemur tala fallinna, 33 í þessari árás en kannski 330 í næstu, rétt eins og verið sé að spila á spilakassa.  

 

Loftárás á skotmörk í Jemen

Athugasemdir

[Örn Ægir (IP-tala skráð) 12.3.2012 kl. 00:24]

Það verður að beyta öllum brögðum við upprætingu á hryðjuverkasamtökum sem drepa oftast vopnlaust saklaust fólk með heilaþvegnum sjálfsmorðs sprengumönnum eða öðrum álíka fólskulegum aðferðum.

[Anna Benkovic Mikaelsdóttir, 12.3.2012 kl. 01:02]

Er hægt að breyta þessari þróun? Þetta er siðlaust hugleysi!

[Sævar Óli Helgason, 12.3.2012 kl. 01:13]

Æi... Örn Ægir, góði besti...

Dráp á saklausum borgurum og samherjum hættir ekkert þótt morðtólin verði tæknilegri... Einsog hefur margsinnis sannað sig...

Núna síðast drápu BNA-menn yfir 120 pakistanska landamæraverði og hermenn með árás, einmitt með svona ómannaðri flugvél, á landamærastöð í Pakistan þegar óvinurinn var meir en tvo kílómetra í burtu... En þeir pakistönsku áttu að vera til taks kæmi árás úr þeirri átt sem óvinurinn var í...

"Flugmaður" vélarinnar sá bara hermenn í kamerunni og skaut einni bombu án þess að átta sig á hvar vélin var stödd... Eða á hvern hann var að skjóta á...

Herstjórn BNA hefur viðurkennt að um fjarlægð frá vígvellinu var um að kenna... Þ.e að ópersonuleg nálgun "flugmannsins" gagnvart viðfangsefninu var það sem olli "slysinu..."

[Laxinn, 12.3.2012 kl. 04:25]

Tækniþróun verður aldrei stöðvuð með ákvarðanatöku stjórnmálaafla, þó hægt sé að hægja á henni þá verður hún aldrei stöðvuð. Nýjasta hertækni er vægast sagt óhugnaleg eins og t.d. svokallaðar "exoskeletons" sem munu breyta hermönnum í brynvarða ofurhermenn (ekki sci-fi, youtube leit sýnir það!) svo ekki sé minnst á þróunina í "drones" tækninni sem fleygir fram nú.

Sumir ganga jafnvel svo langt að halda því fram að framtíðar flugherir muni að stærstu leiti samanstanda af slíkum vélum því þær séu margfalt ódýrari og menn komist hjá mannfalli í eigin röðum.

[Hilmar (IP-tala skráð) 12.3.2012 kl. 08:28]

Já, þetta er rétt.

Það var svo miklu betra þegar tugum þúsunda ungra manna var fórnað í návígi, jafnvel í einni orustu.

[Jón Logi (IP-tala skráð) 12.3.2012 kl. 08:39]

Mannfallið hefur reyndar aukist furðu lítið miðað við þessa hátækni, þótt að menn sitju með donut og kaffibolla, og sleppi við að sjá allan splatterinn. Blóðugasta mannfall á Enskri grund var til dæmis í borgarastríðinu 1461, þar sem 28.000 manns féllu á 10 klst.

Og það er ekkert nýtt að hermennskan reyni að "firra" sína menn með því að gera þá þannig útbúna að ósnertanlegir séu. Brynvarðir riddarar (allt frá Pörthum til þyngstu riddara miðalda). Betra stál. Langdrægari byssur. Hraðfleygari og háfleygari flugvélar (t.d. Me 109 frá 1939-vors 1940). Fjarstýrð skeyti (byrjar á V-1). Skotstjórn og flotabyssur sem gera kleyft að hæfa óvin sem vart sést. (Bismarck sökkti Hood á 14 km færi, og HMS Warspite sló heimsmet með að lenda skoti á 14 sjómílna færi, - 26 km). Tundurskeyti. Forrituð tundurskeyti (frá og með LUUT sem sökkti m.a. Goðafossi). Ballistísk flugskeyti (frá 1945, og erfitt að stoppa þau enn þann dag í dag). Bomban. Jarðsprengjur og gildrur. Þykkbrynjaðir skriðdrekar á vígvelli þar sem nánast ekkert fær þeim grandað (dæmi, Tiger um tíma). Og nú, - fjarstýrðar flugvélar, - Fyrst notaðar af viti til könnunar 1973, og til hernaðar 1982, - ekkert nýtt þarna frekar en brynjurnar.

En, - þetta er svolítið "krípí". Minnig mann á myndina "terminator". Núna eru menn við stjórnvölinn, - en hversu langt verður þar til að slegin eru inn hnit, og tölvan sér um restina?

Ég átti einu sinni samtal við flugsveitarforingjann á Keflavíkurvelli. Hann flaug F-15 sem var reyndar mjög örugg "office", - varla til vél með betri árangur. Ég spurði hann hvort að næstu kynslóðir flugvéla yrðu ekki bara fjarstýrðar. Hann svaraði neitandi, - sagði að menn myndu aldrei sleppa mannlega þættinum og treysta taækninni. "Hvað ef einhver hakkar eða truflar hjá þér sambandið" sagði hann. Ég sleppti því að svara, því andsvar hefði verið "það sama og ef einhver hakkar linkinn hjá þér og nær að trufla t.d. miðunarkerfið þitt eða radarinn, - þá ertu bara fljúgandi blikkdolla"

Ég sá nokkra kosti við svona græjur. T.d. að allt klabbið í kringum flugmanninn vegur heilmikið, og kostar helling. T.d. að með því að útiloka flugmanninn (um borð) er hægt að misbjóða þyngdaraflinu mun sverara, og taka meiri áhættur. 

Vélarnar yrðu ódýrari, gætu því verið mun fleiri, og þá sérhæfðari. Þær gætu verið smærri, og enn meira stealthy, - eða bara alls ekki stealthy!

Og ef að "linkurinn" rofnar þá slekkur hann á sér og vélin snýr aftur á fyrirfram ákv. stað með autopilot.

Þetta er svona dálítið hrollvekjandi. Eina hughreystingin er sú, að það er ekkert tæki í brúki sem ekki er hægt að slátra einhvernveginn.

[Haukur Kristinsson (IP-tala skráð) 12.3.2012 kl. 10:39]

Talið er 10 þúsund manns hafi verið slátrað í Sýrlandi. Tugir þúsunda hafa þegar látið lífið í átökum landa fyrir botni Miðjarahafsins, kennt við "arabíska vorið". Þó fullyrti fíflið á Bessastöðum fyrir nokkrum dögum, að þetta hafi allt byrjað í henni Reykjavík. Ekki samt til þess vitað að menn hafi fengið hér blóðnasir, hvað þá meira.

[Sigurður Sunnanvindur (IP-tala skráð) 12.3.2012 kl. 13:30]

Þetta er ástæða þess að Nóbel kom friðarverðlaununum a koppinn.

Hann gerði sér grein fyrir siðrofinu sem fylgdi því að geta drepið fjölda manns með sprengiefni sem hættilítið var í meðförum og opnaði möguleikann á því að depa án þess að eiga á hættu á að vera drepinn sjálfur.

Hámark þessarar fyrringar er að sitja inná kontór og ýta á "rauða hnappinn"!