Skarpskyggn og ódrepandi nagli !

Það hefur verið gaman að fylgjast með Sigurbirn Bárðarsyni á löngum og gifturíkum ferli sem er einstakur í hestaíþróttum.

Margir væru búnir að setjast í helgan stein hvað keppni varðar en Sigurbjörn er ódrepandi nagli og keppnismaður.

Mér er enn í minni í haustralli 1981 þegar við bræður, Jón og ég, ókum sérleið inn í Þórsmörk og síðan aftur til baka.

Hver var það, sem hafði valið sér besta staðinn á leiðinni inn eftir, þar sem gleggst mátti sjá tilþrif á erfiðum vegi,  til að fylgjast með keppninni, nema Sigurbjörn Bárðarson !

Við hittum hann síðar hvers vegna í ósköpunum hann hefði verið þarna, hafandi um nóg annað að hugsa í sinni íþrótt, - hvort hann hefði áhuga á ralli.

"Já, reyndar", svaraði hann, "en það var ekki aðalástæða þess að ég ákvað að eyða kvöldinu þarna inn frá, heldur hitt að reyna að sjá í hverju velgengni ykkar á þessu ári liggur. Ég hef áhuga á að kynna mér slík fyrirbæri til þess að lær af því og efla mig sjálfan", bætti hann við.

"Og varðstu einhvers vísari?" spurði ég. "Já, svo sannarlega", svaraði Sigurbjörn, og lýsti því síðan í einstökum atriðum hvernig hann hafði séð hvernig aksturinn var í samanburði við hina keppendurna.

"Á blindhæðinni á miðjum kaflanum, sem ég sá, var ykkar bíll til dæmis sá eini þar sem ekki sáust hemlaljós á meðan þið fóruð í gegnum beygjurnar sjálfar. Þú komst hraðast að beygjunum, hemlaðir á nákvæmlega réttum stað áður, en hélst síðan vaxandi hraða alla leið í gegn.

Hinir hemluðu of fljótt og misstu allir of mikinn hraða, og allir nema þú hemluðu aukalega á undan blindhæðinni.  Ég sá að þér tókst að fljúga yfir hana með því að "skera" beygjurnar rétt án þess að missa hraða og koma á hámarkshraða út úr þeim."

"Ég græddi ekki nema eina sekúndu á því" svaraði ég.

"Að vísu" svaraði Sigurbjörn, en ég þykist vita að þegar allar slíkar sekúndur séu lagðar saman í langri keppni verði þær að mínútum."

Í þau tíu ár, sem við Jón kepptum saman, var enginn áhorfandi sem kom fram með svo nákvæmar skýringar og greiningu á því sem hann sá, og voru margir þeirra þó sjálfir rallökumenn.  

Af þessu dró ég þá ályktun að á bak við einstæðan feril Sigurbjörns byggi gríðarlegur og markviss undirbúningur, byggður á skarpskyggni og miklum vilja til að ná fullkomnun.

Þess vegna er hann ódrepandi nagli.

Sigurbjörn sigraði í gæðingaskeiði