Þarf ekki mikla breytingu til að 27 þúsund kjósendur fengju engan þingmann.

Það er athyglisvert að það þarf ekki mikla sveiflu í fylgi til þess að nýju framboðin fengju engan þingmann, t. d. ef þau færu öll rétt undir 5% hvert, sem er lágmark til að ná manni inn á þing.

Það myndi þýða að í kringum 27 þúsund kjósendur fengju engan þingmann, sem eru 3 þúsund fleiri kjósendur en eru í Norðausturkjördæmi.

Myndi fólki hugnast kosningalöggjöf sem fæli þann möguleika í sér að allir kjósendur frá Siglufirði til Hornafjarðar fengju engan þingmann?

Það held ég ekki.

5% þröskuldurinn er alltof hár og raunar ætti að nægja að fá þau ca 1,7 % sem eru að baki hverjum þingmanni.

Reynslan hefur sýnt að svona þröskuldur kemur ekki í veg fyrir að þingmenn segi sig úr flokkum sínum og lýsi sig utan flokka, og heldur ekki í veg fyrir klofning þingflokka eða myndun lítilla þingflokka.

Þess vegna er hann til óþurftar og er ólýðræðislegur.  

Ný framboð næðu tíu þingmönnum

Athugasemdir

[Sigurður Hrellir, 4.5.2012 kl. 09:22]

Samt dugði það ekki fjórflokkunum á Alþingi að setja þennan þröskuld í lög nr. 24/2000 um kosningar til Alþingis þar sem segir í 108. gr. "Þau stjórnmálasamtök koma ein til álita við úthlutun jöfnunarsæta sem hlotið hafa a.m.k. fimm af hundraði af gildum atkvæðum á landinu öllu.

Til þess að geirnegla það að nýjum framboðum sé gert erfitt fyrir var þessu einnig troðið inn í stjórnarskrána þar sem segir m.a. í 31. gr. "Öðrum þingsætum en kjördæmissætum skal ráðstafa í kjördæmi og úthluta þeim til jöfnunar milli stjórnmálasamtaka þannig að hver samtök fái þingmannatölu í sem fyllstu samræmi við heildaratkvæðatölu sína. Þau stjórnmálasamtök koma þó ein til álita við úthlutun jöfnunarsæta sem hlotið hafa minnst fimm af hundraði af gildum atkvæðum á landinu öllu."

Svo er þetta notað til að hræða kjósendur frá því að kjósa einhverja aðra en "góðu gömlu" flokkana því að annars gætu atkvæði þeirra fallið niður dauð.