Íslands þúsund ár

2.6.2012 | 13:40

Hálendið aldrei eins og núna.

Hér er best að skella inn nokkrum myndum, sem voru teknar í ferð frá Hvolsvelli þvert yfir Vatnajökul yfir Sauðárflugvöll á Brúaröræfum norðan við Brúarjökul til að sýna, að veðrið hefur verið tiltölulega enn betra á hálendinu en á láglendinu, raunar svo frábært, að ég man ekki eftir öðru eins í maí.

Á fyrstu myndinni er að vísu að sjá mikinn snjó á belti sem liggur austur frá Heklu um Torfajökulsvæðið og er horft til austurs í átt að Hrafntinnuskeri en síðan til vesturs í átt að Heklu.

En þar með er þetta tákn vetrarins úr sögunni, því að norðan Landmannalauga er alauð jörð allt til Kerlingarfjalla og Hofsjökuls.

Hér er horft yfir Veiðivötn í þessa átt, öll vötn alauð.

Eina vatnið sem enn var ísilagt í fyrradag var Langisjór og nokkur snjór er í Jökulgili og á eystri hluta Fjallabaksleiðanna.

Eldstöðin í Grímsvötnum naut sín vel úr lofti eins og sjá má.

Kverkfjöllum var lónið "Gengissig" autt en í sorta alauðs hálendisins norður af stóð Herðubreið vaktina ásamt Upptyppingum í hitamistrinu.

Sauðárflugvöllur er eins og á júlídegi eins og sjá má og er nú opinn öllum flugvélum upp í Fokker F50.

Þar er nú 11-13 stiga hiti dag eftir dag. Á myndinni standa Brúarjökull og Kverkfjöll vörð í suðri.

Ég er umsjónarmaður vallarins, skipti um annan vindpokann og skoðaði brautirnar og gaf síðan flugturnum og NOTAM skrifstofu skýrslu um opnun vallarins.