Mýtan um frjálsan vilja unglingsins.

Sérkennilega röksemd mátti sjá í frétt Fréttablaðsins í gær um hýðingar sem tæki til busunar í íþróttahreyfingunni. Þar er sagt að enginn drengur sé neyddur til að láta hýða sig, heldur geti hver þeirra beðist undan því og hafi til þess frjálsan vilja.

Þetta gengur ekki upp. Eða er það líklegt að drengur geri það "af frjálsum og fúsum vilja" að láta hýða sig til blóðs svo að hann geti hvorki setið né legið í nokkra daga á eftir?

Nei, auðvitað ekki. Skýringarnar á slíku geta aðeins verið tvær:

1. Drengurinn er massókisti, nýtur þess að láta kvelja sig og fær sérstaka ánægju út úr því að láta berja sig til blóðs. Hann samþykkir þess vegna hýðinguna og er hugsanlega líka sadisti, sem hlakkar til að taka seinna þátt í því að lumbra á næstu nýliðum og berja þá kannski enn fastar en hann var sjálfur barinn.

2. Drengurinn er fórnarlamb algengs og viðurkennds fyrirbæris unglingsáranna, sem felst í hjarðhegðun, þ. e. að leitast við að þóknast hópnum með hegðun sinni og forðast hættuna á að vera lenda utangarðs, vera álitin skræfa, minnka í áliti og jafnvel lenda í einelti með því að færast undan því að gangast undir hremmingarnar, sem hópurinn skemmtir sér við að láta nýliðann sæta.

Hið síðarnefnda er augljóslega miklu líklegra og rímar við allar rannsóknir á hegðun unglinga og undirrót eineltis, - fyrirbæris sem ég hélt að verið væri að koma böndum yfir.

Allt tal um frjálsan vilja er aðeins lélegt yfirklór.

Enda hefur vitneskjan um þetta aðeins borist til mín og annarra á þann hátt að það hefur verið sett sem algert skilyrði að viðhöfð sé nafnleynd, bæði um þolendur, gerendur og íþróttafélagið.

Svo eindregin beiðni er einmitt vitni um þann ótta við afleiðingarnar við að skera sig úr hópnum, sem viðheldur þessari vitleysu.  

Ragnheiður Ríkarðsdóttir alþingismaður komst vel að orði á þingi í morgun þegar hún sagði í umræðu um málið að íþróttahreyfingin ætti að taka við nýliðum með virðingu en ekki með því að niðurlægja þá.

Því að hýðingar, hvort sem þær eru "léttar" eða til blóðs, geta aldrei flokkast undir neitt sem hægt er að tengja við virðingu.  

Brot gegn drengjum er staðreynd

Athugasemdir

[DoctorE (IP-tala skráð) 15.6.2012 kl. 13:40]

Augljóslega þarf fréttablaðið að spá í að fá sér alvöru fólk í vinnu.. ekki bare einhverja bullukolla.. sem skrifa eins og vitleysingar með frjálsum vilja.
Er ekki líklegt að sá sem skrifaði þetta hafi einmitt verið "bully",... og sé að réttlæta þetta fyrir sjálfum sér

[Theódór Gunnarsson, 15.6.2012 kl. 14:03]

Ég verð að viðurkenna að ég hef aldrei haft húmor fyrir svona löguðu. Ég skil ekki hvers vegna þetta busaofbeldi í skólum og víðar er yfirleitt leyft. Það hlýtur að vera kolrangt að taka við nýliðum á þennan hátt.  Mér fyndist eðlilegra að fagna þeim með einhverskonar hátíðarhöldum, en að niðurlægja þá og meiða.

[Haukur Kristinsson (IP-tala skráð) 15.6.2012 kl. 14:14]

Þetta kemur málinu kannski ekki beint við, og þó?

Lesið bókina "Free Will" eftir Sam Harris. Kostar aðeins USD 10,00. Frábær bók!

http://www.amazon.com/gp/product/1451683405?ie=UTF8&tag=wwwsamharri02-20&linkCode=xm2&camp=1789&creativeASIN=1451683405

[Hörður Björgvinsson (IP-tala skráð) 15.6.2012 kl. 20:23]

Þegar ég fór í Verzló fyrir nær 50 árum tíðkuðust busavígslur.  Nýnemar í MR fengu óblíðar móttökur, og var t.d. gert árshlé á þessu ofbeldi þegar eitt fórnarlambið handleggsbrotnaði. 

Í Verzlunarskóla Ísland fór hver nýnemi upp á svið og kynnti sig fyrir öllum hópnum.  Hlaut að launum lófaklapp og fagnaðarlæti.  Allir boðnir velkomnir á jákvæðan hátt.  Ég man ekki eftir því að neinn í Verzló hafi beðið varanlegan skaða af því að vera ekki tuktaður til í upphafi skólagöngu.

[Hörður Einarsson, 15.6.2012 kl. 22:10]

Ómar, ert þú sérfræðingur í öllu?