Við unnum þá efstu en töpuðum samt.

Íslenska handboltalandsliðið getur borið höfuðið hátt þótt það kæmist ekki alla leið á Ólympíuleikunum.

Efstu liðin í lokin töpuðu leikjum sínum við Íslendinga fyrr á leikunum og hefur það aldrei gerst áður, svo ég muni, að Íslendingar hafi haft af slíku að státa á stórmóti og þar að auki unnið alla leiki sína nema þennan eina í lokin, sem tapaðist með minnsta mögulega mun og gat endað á hvorn veginn sem var.

En um þetta gildir hið fornkveðna að spurt er að leikslokum en ekki vopnaviðskiptum.

Stundum flýgur mér í hug að miðað við þá reynslu oft áður á stórmótum að vegna skorts á breidd eða ofkeyrslu okkar á fáum lykilmönnum, hefði átt að hlífa þessum lykilmönnum okkar í leiknum við Frakka, setja aðra oftar inn á, og eiga þar með meira inni síðar í keppninni, úr því að við vorum búnir að tryggja okkur framhald hvort sem var og því ekki úrslitaatriði að vinna Frakka.

Því verður aldrei svarað hvort þetta hefði breytt einhverju í leikjum, sem þá hefðu verið eftir, heldur liggur nú tvennt fyrir, að þakka landsliðinu fyrir frábæra frammistöðu og horfa fram á við.

Fyrst svo grátlega litlu munaði núna að við kæmumst alla leið þarf nú byggja á því, sem blasir við, að landslið okkar getur unnið hvaða landslið sem er og að með réttri úrvinnslu úr því, komist alla leið á hvaða stórmóti sem er.   

Frakkar vörðu ólympíumeistaratitilinn

Athugasemdir

[ari (IP-tala skráð) 13.8.2012 kl. 14:47]

þetta er eins og einhver íþróttafréttamaður sagði, liðin sem brillera í riðlakeppninni vinna nánast aldrei titilinn í sögunni, hins vegar vinna liðin sem tapa einhverjum leikjum í riðlakeppninni oftar, það er hæg og sígandi "lukka"/árangur hjá þeim, skriðþungi/momentum er oft á þeim liðum, það er kannski betra að tapa allavega einum í riðlakeppni og uppgötva mótlæti og læra af því?

[Magnús Þ. Þórðarson (IP-tala skráð) 13.8.2012 kl. 21:41]

Ef, ef, ef.  Okkar menn fóru á taugum, tognuðu á sálinni eins og kallað var.  Old fashioned choke, segir Tjallinn ... þoldu ekki spennuna á síðustu sekúndunum í venjulegum leiktíma á móti Ungverjunum, þegar þeir voru með unninn leik.  Það er engin skömm að 7/8 sæti á Olympíuleikum -- en til að vinna mót þurfa taugarnar að vera í lagi.