Enn þarf aðgát og íhugun.

Ég hef í mörg ár reynt að benda á þá miklu möguleika sem einstæð náttúra á Norðausturlandi býr yfir og talað fyrir daufum eyrum, því að það eina sem menn hafa séð er fórna þessum náttúruverðmætum fyrir mesta orkubruðl nútímans, erlenda stóriðju.

Einkum hafa menn lokað eyrum og augum fyrir þeim möguleikum, sem þarna eru fyrir hendi að vetrarlagi og haft allt á hornum sér varðandi það að læra til dæmis af ferðamálafólki í Lapplandi.

Ég er langt komin með heimildamynd um þetta sem ég vona að opni augu einhverra.

Í ljósi fyrri reynslu virðist það verða vonlítið að íslensk augu opnist, en hins vegar er athyglisvert þegar allt annað verður uppi á teningnum þegar ríkur Kínverji býðst til að opna veskið. Meira að segja golfvöllur, sem mér hafði aldrei dottið í hug að nefna, varð að pottþéttri hugmynd í augum Íslendinga með peningagljýju í augunum.

Obama Bandaríkjaforseti var í dag að stöðva með sérstakri tilskipun áform Kínverja um að eignast vindorkuver í Bandaríkjunum.

Samt eru Bandaríkjamenn þúsund sinnum stærri þjóð en Íslendingar. Á sama tíma sem Kínverjar hafa verið að undirbúa þetta í Bandaríkjunum og nú fengið neitun, hefur verið í gangi ferli hér í þá veru að selja í kínverskar hendur hundruð ferkílómetra landssvæði á Grímsstöðum á Fjöllum.

Sem betur virðist vonandi hafa tekist að afstýra því, en kínverska sóknin hefur samt haldið áfram.

Nú eru áform um kínverskt land komin niður í leigu á 2-3 ferkílómetrum fyrir mannvirki íslensks fyrirtækis í eigu Nubos.

Það kann kannski að sýnast lítið en til samanburðar má geta þess að beiðni Bandaríkjamanna að leigja land undir þrjár herstöðvar 1945 til 99 ára tók aðeins yfirum  einn ferkílómetra í Hvalfirði, hluta úr ferkílómetra í Skerjafirði og nokkra ferkílómetra á Miðnesheiði.

Um þessar herstöðvar mátti þá nota sama orðalag og notað er nú á Grímsstöum um "að skapa einstakt tækifæri til að byggja upp samfélagið og innviði þess."

Engu að síður var þessu gylliboði Kana hafnað 1945. 99 ára samningur var talinn jafngilda eign til allrar framtíðar og sé enn verið að tala um 2x40 ára =  80 ára leigusamning við Nubo er full þörf á áframhaldandi aðgát í þessu máli.

Ég hef áður bent á það að útlendingum sé bannað að eiga meirihluta í sjávarútvegsfyrirtækjum hér á landi, - fyrirtækjum sem nýta hluta af náttúruauðlindum í íslenskri lögsögu, og nefnt að íslensk náttúruverðmæti á landi séu sama eðlis og sjávarauðlindin.

Er ekki ástæða til að íhuga vel fjárfestingar erlendra aðila á öllum sviðum, sem tengast íslenskum náttúruauðlindum?

P. S. Í hádegisfréttum útvarpsins heyrði ég haft eftir Nubo að hann myndi fá Grímsstaði til leigu til 99 ára sem þýðir í raun til eilífðarnóns. Sem sagt: Kaninn frá 1945 afturgenginn! Fyrr í haust hafði verið talað um 40 ár með mögulegri 40 ára framlengingu. Ætlar enginn endir að verða á misvísandi yfirlýsingum í þessu máli?
 

Áformin á Grímsstöðum skapa einstakt tækifæri

Athugasemdir

[Anna Sigríður Guðmundsdóttir, 28.9.2012 kl. 20:51]

Ómar. Þetta Grímsstaða-ævintýri er flókið mál.

Er Núpo léttlyndi og ofur-ríki Kínaþrællinn ekki að fara í framkvæmdir í Danmörku, til að byggja upp nýtt Hans Cristian Andersen-ævintýri þar í landi?

Ætlar hann að vera með golfvöll, lífrænan mat og íslenskar lopapeysur á þeim "hugsjónastað"? Hvernig stendur á því að þessi blessaði drengur er svona loðinn um lófana? Vann hann í lóttói í Kína, eða er hann einn af munaðarlausum fóstursonum Kína-stjórnvalda?

Það er vandasamt að blanda gamla og nýja tímanum saman. Gamli og nýi tíminn þarf að fá áheyrn, til að lýðræðið fái að ráða í framtíðinni.

Það sem mér finnst vanta of mikið í fjölmiðlaumræðuna, er verðmæti vatnsins og hreinleikans á Íslandi, í sambandi við Grímsævintýrin (bæði hér á landi og erlendis).

Það er eins og flestir hámenntaðir einstaklingar telji sig geta lifað á innistæðulausum peningum, og jafnvel án vatns? 

Þetta veldur mér miklum heilabrotum, um það hvernig hagfræði almennings er raunverulega reiknuð út, af hagfræðingum stjórnsýslunnar spilltu!

M.b.kv.

[Þorsteinn Briem, 28.9.2012 kl. 21:53]

Ég sé enga góða ástæðu til að vera á móti þessum framkvæmdum:

"Breyta á nær öllu svæðinu í fólkvang, sem felur í sér umgengnisrétt almennings og aukna náttúruvernd.

Þar að auki stendur til að leigja lítinn hluta svæðisins (u.þ.b. 1%) til íslensks félags í eigu erlends aðila sem hyggst reisa hótel á svæðinu og stunda þar ferðaþjónustu."

Og Þingeyingar eru alltof einsleitur þjóðflokkur, sem skortir tilfinnanlega kínverskt blóð, eins og dæmin sanna.

[Anna Sigríður Guðmundsdóttir, 28.9.2012 kl. 22:20]

Steini minn. Ert þú með kínverskt tilfinningablóð í þínum æðum?

Ég held að ég sé einungis með óflokkað hugsjónablóð réttlætis í mínum æðum, enda er ég ekki vinsæl af þeim sem eru með flokkað blóð í sínum hugsjóna-æðum.

Ég get sagt þér það Steini minn, að það er ekki auðvelt að hafa raunverulegt hugsjónablóð fyrir réttlæti allra í æðunum. Verkefni manna eru misjöfn á þessari jarðarkringlu.

M.b.kv.

[Þorsteinn Briem, 28.9.2012 kl. 23:48]

Mannfræðilegar rannsóknir á Þingeyingum - Þetta gengur ekki lengur, segir bæjarstjórinn á Húsavík

[Ásta Steingerður Geirsdóttir, 29.9.2012 kl. 00:36]

Burt séð frá því hvaða blóð rennur um æðar mér ;) þá þykir  mér dapurt hversu margir landar mínir eru tilbúnir að selja spildur "einhverjum" kauphéðni sem á pyngju fulla af peningum, eða segir svo. Af hverju getum við ekki verið saðföst, samtaka, stolt þjóð og bara sagt, NEI, landið okkar er ekki falt. Við erum með svo mikið gull í höndunum. Við erum með bestu staðsetningu sem hugsast getur og ættum að berjast fyrir lífrænni ræktun og hreinleika í allri framleiðslu matvara á landinu. En, við látum græðgi og skammtímahagsmuni ráða. Við erum kærulaus í umgengi við vatnið, svo kærulaus að ég fæ hroll. Það þarf SVO að vekja þjóðina okkar til vitundar, þannig að  börnum sé kennt að bera virðingu fyrir vatninu. það er ekkert líf  án vatns. Við bruðlum og sóum vatni eins og enginn sé morgundagurinn.                                          

[Haukur Kristinsson (IP-tala skráð) 29.9.2012 kl. 10:14]

Tek undir hver orð Ásta Steingerður. Þó vil ég minna á að öll ræktun er lífræn, en hreinleikinn skiptir öllu máli. Og blessað vatnið.

  

“Veistu hvað ég þrái” þó að

það sé bara til að hlæja að-

og ég gæfi af æfi minni

ár til þess að sjá og fá,

-hvað mig er að dreyma á daginn,

-hvað mér veldur vöku um nætur?

Vatn í læk og á.

Vatn sem streymir,vatn sem niðar

Vor og haust með sínu lagi.

Geturðu skilið þessa þrá?

Vatnið hreina, vatnið heima,

Vatn sem lagst er hjá og þambað,

-þetta vatn mér veldur þrá.

Kannski hlý og hæglát rigning.

Hljóðfall dropa úr björk og lyngi

Kliðar létt við kaldan strauminn.

Kannski er yfir þoka grá.

[Gunnar Th. Gunnarsson, 29.9.2012 kl. 12:35]

Sammála Steina!! Ómar sér ótal möguleika í náttúrunni aðra en að virkja fallvötnin, en svo þegar gera á "eitthvað annað", þá er uppruni höfundar hugmyndarinnar vandamál.

Ásta Steingerður, hvernig færðu það út að "bruðlað" sé með vatn á Íslandi? Hver er munurinn á því að vatn renni úr krananum í vaskinn hjá mér og þaðan í sjóinn eða beint þangað á náttúrulegan hátt? Það er nóg vatn á Íslandi og á meðan svo er, er ekki um sóun eða bruðl að ræða.

[Þ ór (IP-tala skráð) 29.9.2012 kl. 12:37]

Það er dapurlegt að til sé dauðlegt fólk sem er tilbúið að selja landið undan barnabörnum sínum fyrir forgengilegt drasl. Gleymum því ekki að landið er okkar dýrmætasta auðlind og á ekki að vera söluvara fyrir braskara.

[Gunnar Th. Gunnarsson, 29.9.2012 kl. 12:40]

Svo finnst mér það furðuleg rök þeirra sem ekki vilja ferðamannauppbyggingu á Grímsstöðum, að segja að það verði hvort eð er ekkert úr framkvæmdum hjá Nupo. Hvað er þá vandamálið?

[Haukur Kristinsson (IP-tala skráð) 29.9.2012 kl. 15:27]

Gunnar Th. skilur ekki orðið bruðl. En líklega er nær sanni að hann misskilji orðið. Hann miskilur svo margt. Það kemur að því að fólk verður látið borga fyrir kalt vatn, eins og heitt vatn. Þá fyrst munu skammsýnir innbyggjarar fara að haga sér eins og viti bornar manneskjur. En ekki fyrr.

[Ómar Ragnarsson, 29.9.2012 kl. 17:02]

Ég hef þann metnað fyrir hönd minnar þjóðar að hún framkvæmi sjálf það sem henni er til mest sóma, hugsanlega í fyrirtækjum þar sem erlendir fjárfestar eiga ekki meirihluta.

Ég er ekki á móti fjárfestingu útlendinga í íslenskum fyrirtækjum en tel rétt að gera þær kröfur til eignarhalds á náttúruauðlindum landsins og landinu sjálfu, að þar eigum við sjálfir meirihluta.

[Gunnar Th. Gunnarsson, 29.9.2012 kl. 17:23]

Haukur, veistu það ekki að fólk borgar nú þegar fyrir kalt vatn? Ef þú borgar ekki fyrir kalda vatnið sjálfur, þá er einhver annar að gera það fyrir þig.

[Anna Sigríður Guðmundsdóttir, 29.9.2012 kl. 23:04]

Ómar minn. Það er alla vega mikilvægt að við látum öll réttlætis-hugsjónirnar ráða för, en ekki Kínverskt "réttlætisblóð" né annarra heimsvalda "réttlætisblóð"!

Heimurinn verður ekki öfgalausari og réttlátari en við gerum hann sjálf. Hollur er rétt útbúinn og heimafenginn baggi.

M.b.kv.