Brot úr hitastigi breytti öllu.

Það var eftirminnilegt að koma í heimsókn til Ara vinar míns Teitssonar á Hrísum í Reykjadal og heyra lýsingu þeirra hjóna á óveðrinu sem varð svo illvígt. Lýsing þeirra sýndi í hnotskurn að það var algerlega ómögulegt að spá nákvæmlega fyrir um það að þarna kæmi það dæmalausa óveður á þessum árstíma, sem dundi yfir, hvar það yrði verst og hvar ekki.

Á Laugum, í aðeins fimm kílómetra fjarlægð norðar í dalnum var grenjandi rigning á sama tíma sem það rok, sem spáð hafði verið þrjá daga á undan, hlóð þvílíkum fádæmum niður af snjó á Hrísum, að sterkbyggð trén í tjárlundinum á Hrísum brotnuðu eins og eldspýtur.

Þarna breytti brot úr hitastigi öllu, og engin leið var fyrir veðurstofuna að spá fyrir um þetta. Spá Veðurstofunnar var innan eðlilegra skekkjumarka hvað varðaði hita og vindstyrk. Í ljós kom að vindstyrkurinn var nokkurn veginn sá sem spáð hafði verið en það sem réði úrslitum var að hitinn var 1-2 stigum lægri en spáð hafði verið og úrkoman öllu meiri, þó ekki alls staðar.

Mestu munaði um hitamuninn eins og sést af dæminu úr Reykjadal.

Á svæðinu við Ísland eru einhverjar mestu veðursviptingar frá september til apríl sem þekkjast á jörðinni. Aðeins 285 kílómetra fyrir norðvestan Vestfirði er tveggja milljón ferkílómetra frystikista Grænlands með næsthæsta meðal loftþrýstingi jarðar að vetri til, en álíka vegalengd fyrir suðvestan Ísland er lægsti meðalloftþrýstingur jarðar á sama tíma.

Afleiðingin felst í mestu sviptingum og átökum í veðri að vetri til, sem þekkjast á byggðu bóli.

Þegar hitastigið er á bilinu 1-2 stig sem er stærstan hluta vetrarins, getur það skipt sköpum um hvort úrkoman er þungur snjór eða slydda/rigning. Engin veðurstofa í heimi getur ráðið til hlítar við það að spá nákvæmlega um það hvorum megin hryggjar þetta lendir þegar hitinn er á þessu fíngerða róli í vetarumhleypingunum.

Menn ættu að minnast þess að tvívegis lenti ferðafólk hér á landi í miklum hremmingum, vegna þess að fararstjórar leituðu uppi hagstæðustu erlendu spána.

Með þessu er ekki sagt að hinar erlendu veðurstofur rambi ekki á stundum á réttari spá en Veðurstofan okkar gerir. En það er ekki gæfulegt að leita uppi hagstæðustu spána hverju sinni.     

Ummæli ráðherra komu Veðurstofunni í opna skjöldu

Athugasemdir

[Axel Jóhann Hallgrímsson, 8.11.2012 kl. 15:10]

Það virðist orðin ríkjandi hugsunarháttur að veðurspá Veðurstofunnar sé ekki spá heldur veðurlýsing og óbrigðul fullyrðing um veðrið framundan.

[Skúli Víkingsson, 8.11.2012 kl. 15:40]

Vel mælt Ómar. Það er lúalegt af ráðherranum að reyna að koma einvherri sök á Veðurstofnuna.

[Sigurður Haraldsson, 8.11.2012 kl. 16:53]

Flottur Ómar og hafðu enn og aftur þökk fyrir þitt innlegg.

[Þorsteinn Briem, 8.11.2012 kl. 17:32]

Í Svarfaðardal, sem er mesta snjóakista landsins, ásamt Fljótunum, getur samtímis verið rigning öðru megin í dalnum en sólskin hinu megin.

Og allt öðruvísi veður á Dalvík, niðri við sjó, en inni í Skíðadal, um 20 kílómetrum frá sjó.

En á sama veðurspásvæði og Húsavík, Norðurlandi eystra.

Og þar í millum geta verið fjölmargar tegundir af veðri samtímis.

En hefur Ömmi frændi migið í saltan sjó, búið úti á landi eða tekið skeytin?

Það held ég ekki.

Hann er skrifstofublók, sem hefur í mesta lagi vit á ferðadagpeningum, en gapir daglega eins og nýveiddur þorskur.

[Þorsteinn Briem, 8.11.2012 kl. 17:51]

8.2.1994:

Um 70% Íslendinga vita ekki á hvaða veðurspársvæði þeir búa

[Ómar Ragnarsson, 9.11.2012 kl. 01:34]

Við skulum ekkert vera að æsa okkur út af Ömma frænda né ráðast á hann. Hann hefur beðist afsökunar og er maður að meiri. Og út af fyrir sig er sannleikskorn fólgið í því að útilokað var að spá nákvæmlega fyrir um þetta veður út í hörgul og að því leyti var spáin ófullkomin, sem hins vegar var að mínu mati ekkert óeðlilegt við.

[Ari (IP-tala skráð) 9.11.2012 kl. 01:48]

Skulum ekki gleyma því að erlendu veðurspárnar eru að mestu ef ekki alveg tölvugerðar, auðvitað nota hinar íslensku spár þær líka, en okkar fræðingar fara svo að vinna meira úr spánum og taka meira til greina staðbundna þætta hér, fjöll og firði, áhrif sjávar, áhrif landmassa... (kann ekki að fara með þetta svo sem) þannig að endanlega spáin tekur mögulega ákveðnum og jafnvel mikilvægum breytingum og við eigum að treysta þeim betur þess vegna, þeir þekkja landið best og hafa mest reynsluna af því og koma á endanum með betri spár en erlendar tölvuveðurreiknisíður.

[Jón Logi (IP-tala skráð) 11.11.2012 kl. 10:47]

Mér finnst gott að taka spána til hliðsjónar, lesa þær upplýsingar sem ég hef um þrýstimun, og hræra því svo út í reynslu af heimasvæði, og útkoman er yfirleitt sæmileg spá ;=)