Annað íslenskt Zlatan-mark. En bara ein Ladda-karfa.

Mér finnst rétt að upplýsa þegar komið hefur á daginn að Viktor Jónsson hafi skorað Zlatan-mark fyrir nokkrum árum á KA-móti á Akureyri, að fyrir nokkrum árum var slíkt mark skorað á grasvelli fyrir vestan tjaldstæðið á Brautarholti á Skeiðum.

Þarna var haldið fjölmennt árlegt ættarmót og leikinn knattspyrnuleikur með meira en fullskipuðum tveimur liðum á grasvellinum.

Jónína, dóttir mín, sem var í norðurmarkinu, spyrnti knettinum í hárri spyrnu út á kantinn þar sem maður hennar, Óskar Olgeirsson, stóð. Óskar hefur gaman af því að kalla upp "láta vaða!" undir ýmsum kringumstæðum og af því að hann sneri baki í hitt markið, ákvað hann að "láta vaða" og tók á móti boltanum með bakfallsspyrnu.

Fyrir hreina tilviljun fór boltinn í háum boga yfir áfram yfir endilangan völlinn og hafnaði í markinu hinum megin!  Aðeins ein snerting á leiðinni á milli markanna!  Að þessu voru tugir vitna og hefur oft verið vitnað síðan í ættinnni til þessa makalausa atburðar.

En auðvitað hlýtur mark Zlatans að vera áfram einstætt í knattspyrnusögunni, - þetta var jú landsleikur á milli tveggja knattspyrnuþjóða í fremstu röð.

Hins vegar fer ég ekki ofan af því að karfan, sem Laddi skoraði í íþróttahúsinu í Njarðvík hér um árið í lok leiks Stjörnuliðsins míns eigi sér enga hliðstæðu um víða veröld.

Hef sagt frá henni áður, en í sem stystu máli:

Jón, bróðir minn, sendir boltann frá endamörkum yfir endilangan völlinn til Ladda, sem kemur hlaupandi úr gagnstæðu horni, stekkur hátt upp í splitt-stellingu eins og ballettdansmær, fær boltann á hnéð svo að hann fer í stórum boga yfir endilangan völlinn og hafnar í körfunni.

Boltinn  var það lengi á leiðinni, að áður en hann lenti í körfunni var Laddi lentur og búinn að kvitta fyrir !

"Ljónagryfjan" var troðfull af áheyrendum og því hundruð vitna að þessum einstæða atburði.   

Íslenskt Zlatan-mark

Athugasemdir

[Arnar E. (IP-tala skráð) 16.11.2012 kl. 21:08]

Þætti nú gaman að sjá þetta mark frá Essó mótinu....

...þvílík steypa. Allt öðruvísi mark en Zlatans, en ef fyrirsögnin er mögulegt, þá er allt leyfilegt.......já, æi, alltaf tekst Íslendingum að afbaka nánast hvert einasta atriði, hreinlega magnað ef maður spáir í það..

[Þorsteinn Briem, 16.11.2012 kl. 21:58]

Þetta er nú ekkert! - Myndband