Icelandair í stórræðum. Stórir 17 sentimetrar.

Icelandair stendur í stórræðum þessa dagana eins og sjá má af fréttum. Kristján Már Unnarsson greindi frá spennandi lokametrum síðustu klukkustundirnar áður en ákveðið var að kaupa frekar Boeing 737 Max en Airbus 320 og 321.

Því er ekki að neita að gildar ástæður voru fyrir valinu af ýmsum ástæðum eftir viðskipti við Boeing í 45 ár og hugsanlega sálrænt átak fólgið í því að skipta yfir á Airbus.  Auðveldara og ódýrara að þjálfa flugliða og hagkvæmt af fleiri ástæðum að halda sig við Boeing.

Og það er staðreynd að engin gerð farþegaþotna hefur verið framleidd í fleiri eintökum en Boeing 737.

En að einu leyti er þessi ákvörðun Icelandair þó gegn ákveðinni þróun, sem staðið hefur yfir síðan fyrir 60 árum þegar lagður var grunnur að fyrstu Boeing þotunni, 707.

Á þessum sex áratugum hafa farþegar hækkað, breikkað og þyngst og ekki hægt að sjá fyrir endann á þeirri þróun.

Þegar Airbus 320 og 321 voru hannaðar var ákveðið að taka mið af þessu með því að hafa skrokkinn 17 sentimetrum breiðari en skrokk Boeing þotnanna.

17 sentimetrar kunna að sýnast lítil stærð, en svo er ekki þegar skoðuð eru áhrif sentimetranna á vellíðan farþega í hliðstæðum farartækjum, svo sem bílum.

Ef 17 sentimetrunum er skipti niður á báðar sætaraðirnar, þar sem þrír sitja saman, er hvor röðin 8 sentimetrum breiðari í Airbus en í Boeing. Þeir, sem þekkja til stærða í innanrými bíla, vita, að 8 sentimetrar í aftursæti geta í mörgum tilfellum skipt sköpum um vellíðan farþega.

Svona eins og munurinn á Volkswagen Polo og Passat eða munurinn á BMW 3 og BMW 7.

Kaupir allt sitt eldsneyti á Íslandi af N1

Athugasemdir

[Kristinn J (IP-tala skráð) 8.12.2012 kl. 07:38]

Ómar. Icelandair er göfugt fyrirtæki sem pantar flugvélar í gríð og erg, þetta er því góð viðbót við Boeing Dremliner 787 sem þeir eiga fyrir ef ég man rétt,, en þær voru pantaðar 2005. Eða var það ekki ??

Það hvíslaði líka einhver að mér að þær Boeing 757 sem fyrir eru eru allar komar yfir 20 árin, og Icelandair ætti ekki hreyflana á þeim en þeir eiga jú skrokkinn og nýju farþegasætin með skjánum. Eða er það ekki ?

Og nú er bara að kaupa bréf í Icelandair aftur :)

http://www.vb.is/frett/3206/

"Í ársbyrjun 2005 samdi Icelandair Group um kaup á 787 Dreamliner en félagið á nú fimm vélar í pöntun. Til stóð að afhenda tvær þeirra árið 2010, aðrar tvær árið 2012 og eina árið 2013.

Eins og fram hefur komið verður fyrstu vélinni reynsluflogið í dag en það er rúmlega tveimur árum á eftir áætlun. Því er ljóst að einhver töf verður á afhendingu til Icelandair Group. Óvísst er hve löng hún verður. Það mun þó ekki hafa mikil áhrif á rekstur félagsins þar sem ekki hefur verið gert ráð fyrir vélunum í rekstri samstæðunnar.

Samkvæmt upplýsingum Viðskiptablaðsins munu munu vélarnar að öllum líkindum verða nýttar í leiguflug og þannig leigðar út frá félaginu. Ekki er gert ráð fyrir þeim í núverandi ætlunarleiðum Icelandair (rétt er að gera hér greinarmun á Icelandair og móðurfélaginu Icelandair Group sem rekur 69 vélar)."

[E (IP-tala skráð) 8.12.2012 kl. 10:04]

http://www.visir.is/nymaeli-i-mannrettindakaflanum-tilviljanakennd/article/2012121209174

Mér finnst athyglisvert m.t.t. þess að Björg Thorarensen er gift hæstaréttardómara það best ég veit, hvað hún er viljug að koma með yfirlýsingar um stjórnarskrárfrumvarpið.

[Þorsteinn Briem, 8.12.2012 kl. 11:39]

26.5.2011:

"IG Invest, hlutdeildarfélag Icelandair Group, hefur undirritað viljayfirlýsingu við Norwegian Air Shuttle um að Norwegian gangi inn í pöntun félagsins á þremur B787 Dreamliner flugvélum frá Boeing."

"Eftir viðskiptin mun félagið eiga pöntun á einni B787 flugvél."

Pantanir Icelandair Group á Dreamliner til Norwegian Air Shuttle

[Einar (IP-tala skráð) 8.12.2012 kl. 13:23]

Ég má til með að bæta við að ef þú reiknar þverskurðarflatarmálið þá er það 0,91fermetrum meira á Airbus vélinni, þannig að rúmmál innra rýmis vélarinnar er 25m3 meira en á Boeing vélinni. Inni í þeirri tölu er auðvitað aukið lestarrými en samt munar ansi miklu um fleiri rúmmetra í farþegarýminu. Það hljómar mjög sérstakt að flugfélag sem leggur áherslu á þægindi með því að bjóða m.a. viðskiptafarrými skuli vera með þrengri vélar en samkeppnisaðilinn Wow air sem er markaðssetur sig sem lággjaldaflugfélag.

(http://www.airbus.com/aircraftfamilies/passengeraircraft/a320family/a320/specifications/)

[Axel Jóhann Hallgrímsson, 8.12.2012 kl. 13:59]

Hafa ekki flestar flugvélapanntanir Icelandair (Flugleiða) verið seldar öðrum þegar á hólmin kom? Var ekki hagnaður Flugleiða árum saman myndaður af flugvélasölu meðan tap var af rekstrinum?

[Karl J. (IP-tala skráð) 8.12.2012 kl. 19:13]

Þessar 737 taka heldur ekki gámana sem er farið að nota svo víða svo áfram verður handhlaðið í þær. Atvinnuskapandi!   :)

[Guðmundur Pétursson, 10.12.2012 kl. 08:41]

Öreigar allra landa sameinist, eða "Gjaldþrota fyrirtæki Íslands staðið saman" Eðlilegt að Icelandair versli við N1, allavega þangað til annað þeirra verður gjaldþrota í næsta skipti.

Annars var frétt um ÍAV á sömu síðu, enn eitt gjaldþrota fyrirtækið sem stendur núna í stórræðum eftir kennitöluflakk og gífurlegar skuldaafskriftir. Það getur komið sér vel að hafa réttu samböndin, það hefur margsýnt sig :-)