Auðvitað var minni umferð í fyrra.

Þegar sú stórfrétt er sögð að umferðin í Reykjavík í janúar síðastliðinum hafi verið meiri en í janúar í fyrra koma orð Guðmundar Jaka í hugann þess efnis að stundum megi efast um nauðsyn umfangsmikilla og dýrra rannsókna hámenntaðs fólks, sem fréttnæmar þykja, á hlutum, sem liggja í augum uppi.

Nefndi hann sem dæmi þegar viðamikil og dýr háskólarannsókn á matarvenjum Íslendinga leiddi þá stórfrétt í ljós að landsmenn borðuðu mest á milli klukkan 12 og 1 í hádeginu og milli klukkan sjö og átta á kvöldin.

Nýliðinni janúarmánuður var 3,3 stigum hlýrri en í meðalári og einn af tíu hlýjustu janúarmánuðum frá upphafi mælinga fyrir 160 árum. Götur Reykjavíkur voru auðar mest allan mánuðinn með sumarfæri og lengst af nánast vorveður.

Í fyrra var hins vegar einhver snjóþyngsti janúar í áraraðir í borginni nánast allan mánuðinn, mikil ófærð og hálka í marga daga og erfiðleikar við að komast um. Hundruð manna beinbrotnaði í hálkunni.

Af sjálfu leiðir að umferðin var minni þá en núna og er engin frétt. Það hefði verið frétt ef umferðin hefði verið meiri í janúar í fyrra en nú.    

Aukin umferð á höfuðborgarsvæðinu

Athugasemdir

[Brjánn Guðjónsson, 6.2.2013 kl. 23:02]

Nákvæmlega. Þetta er ekki-frétt.

[Davíð Þ. Löve, 6.2.2013 kl. 23:17]

Hahahahaha! Alveg hárrétt hjá þér Ómar! Og hefur þú tekið eftir öllum þeim "hávísindalegu" könnunum sem dunið hafa á okkur undanfarið? Ég er búinn að hlægja mig máttlausann yfir fíflaganginum í háskólaborgurunum sem framkvæma þessa vitleysu! T.d: Mesta byssueignin er meðal framsóknarmanna!! Er verið að skaffa bjánum verkefni eða? Það er eitthvað stórkostlegt að í Háskóla Íslands.

[Ágúst H Bjarnason, 7.2.2013 kl. 07:07]

Það þarf ekki "umfangsmikla og dýra rannsókn hámenntaðs fólks" til að komast að þessu Ómar.

Í mörg ár hafa verið umferðarteljarar vítt og breitt um borgina og þarf ekki annað en gjóa augunum á tölvuskjá til að lesa af þeim. Jafnvel á Internetinu.

Svona fjartengdir teljarar eru einnig á þjóðvegum víða um land. 

[Hjörtur Sæver Steinason (IP-tala skráð) 7.2.2013 kl. 09:01]

Þetta eru snillingar !!!

[Gunnar Th. Gunnarsson, 7.2.2013 kl. 12:35]

Ætlaði einmitt að minnast á það sama og Ágúst. Svona umferðartölur eru athyglisverðar þegar til lengri tíma er litið og raunar nauðsynlegar ef vegakerfið á að þróast í takt við notkun þess.

Þetta hjá Ómari er svona svipað og að segja að frétt um það að það hafi verið hlýrra í janúar sl. en á sama tíma og í fyrra:... "Iss, það þarf nú ekki hámenntaða veðurfræðinga til að segja okkur það, það fundu þetta allir á eigin skinni!".