Kranablaðamennska; - enginn spyr um stærð línanna.

Í allan dag hefur endurómað í öllum fjölmiðlum sú frétt, að það þurfði að fara út í 70 milljarða króna fjárfestingu í háspennulínum til að "tryggja orkuöryggi" og "öryggi á afhendingu orkunnar til landsmanna" og að ef eitthvað verði lagt í jörðu, muni þessi kostnaður margfaldast og orkuverðið hækka.  

Kranablaðamennskan hefur verið alls ráðandi, því að ekki einn einasti fréttamaður hefur spurt þeirrar grundvallarsspurningar, af hverju það þarf stærstu gerðir af risalínum til þess að þetta öryggi sé tryggt, - til dæmis af hverju það þurfi háspennulínu sem anni flutningi á allt að þúsund megavatta orku til þess að tryggja flutning á þeim 16 megavöttum, sem Akureyringar og Miðnorðurland nota.

Í fullyrðingum forsprakka Landsnets eru bilanir á dreifilínum í vondum veðrum notaðar sem átyllur fyrir lagningu risalínanna og gefið í skyn, að ef fólk samþykki ekki risalínurnar muni raflínurnar halda áfram að bila í vondum veðrum. Sem sagt: Annað hvort skuluð þið fá að sitja í rafmagnsleysi eða samþykkja risaháspennulínurnar fyrir stóriðju.

Enginn spyr hve stór hluti bilananna var í byggðalínunni sjálfri og hve stór hluti var í línum, sem dreifast út frá henni.

Meðan allsherjar kranablaðamennska af þessu tagi ríkir komast Landsnetsmenn upp með þá blöndu af hótunum og stórmennskubrjálæði, sem þeir hafa getað haldið uppi og ætla sér að halda uppi áfram.  

Orkuöryggi fullnægir ekki stöðlum

Athugasemdir

[Pálmar Smári Gunnarsson (IP-tala skráð) 22.2.2013 kl. 22:06]

Þetta er allt gott og blessað sem að þú segir Ómar, enn þeir hjá Landsneti virðast ekki taka með í reikninginn allan þann hrikalega kostnað sem þeir verða að leggja í þegar að háspennulínurnar og bara rafmagnslínur yfir höfuð hrynja úr sambandi hér og þar um landið, enn svo væla þeir yfir því að kostnaðurinn við að leggja línurnar í jörð sé svo mikill að þeir geti ekki farið í það?? Það er sjálfsagt rétt að kostnaður við að leggja línurnar í jörð sé eitthvað meiri enn að setja upp þessi ljótu möstur sem að sjást um land allt, enn hvað tæki það langan tíma fá þessa fjármuni til baka þegar að ekki þarf að senda heilu vinnuflokkana út um allt land, vestur á firði, norður í land, og austur á firði, þá er suðurlandið eftir, hvað kosta slíkar viðgerðir þegar að brjáluð veður verða á öllum þessum stöðum, og þegar að ekki er hægt að gera við í marga daga vegna veðurs, ég er ansi hræddur um að það myndi fljótt skila sér til baka, og svo öryggið sem að því fylgir fyrir heilu byggðalögin!! Nei í jörð með allt draslið og taka þessi ljótu möstur niður og henda þeim í brotajárn!! Ég gæti ímyndað mér að þegar að allt er komið í jörð að þá myndi orku öryggi fullnæga öllum þeim stöðlum sem þeir tala um, hverjir sem þeir nú annars eru? 

[JR (IP-tala skráð) 22.2.2013 kl. 22:13]

Verkfræði-mafían í þessu landi hefur fengið að matreiða allt eins og henni hefur þótt best svo lengi sem ég man !  Í dag heitir það kranablaðamennska, eða copy/paste.

[Jósef Smári Ásmundsson, 22.2.2013 kl. 22:31]

Mér finnst vera meiri verðmunur á háspennulínunum og jarðstrengunum en hægt er að ímynda sér í fljótu bragði.Finnst reyndar að í sumum tilfellum þar sem landslagið er hagrænt ætti það að vera ódýrara.En hugsanlega er fóðringin(einangrunin) svona dýr.En það ætti að tryggja Öryggið betur en Loftlínurnar Þar sem snjóþyngsli eru t.d. fyrir vestan og Fljótum-Siglufirði.Og minnka viðgerðarkostnaðinn.

[Sigurður Antonsson, 23.2.2013 kl. 05:29]

Blaðamönnum á veikburða fjölmiðlum er vorkunn. Þeir einfaldlega ná ekki yfir allt sviðið. Auglýsatekjur standa undir mestum útgjöldum og þá er ritstjórnarstefnan ekki sú vænasta. Hjá RÚV gildir öðru máli, en fréttamenn þar komast ekki yfir allar hliðar mála. Þeir eru hluti af ríkiskerfinu og vilja oftar en ekki rugga bátnum. Þess vegna eru veitur eins og þínar mikilvægar, en jafnvel hún nær ekki til allra málaflokka.

Í BNA er mikið um háspennulínur. Frumskógur raflína sem oft fýkur um koll. Þeir byggja einnig tréhús sem verður skýstrókum að bráð. Breyta yfirleitt engu nema skýr rök séu fyrir málum. Eitthvaðp hefur þetta með kostnað að gera. Ísland er ekki ódýrasta landið til framkvæmda og samkeppnishæfni ólíkleg á raforkusviði ef verðið verður of hátt.

Meðalhófið er vandratað. Helst er ávinningur að betri menntun og að nýta eigin orku með eigin frumkrafti og getu.

Spursmál hvað krana við eigum að opna? Vernda og virkja.

[Lárus Ólafsson (IP-tala skráð) 23.2.2013 kl. 09:40]

Það hefur verið í umræðunni nýlega að leggja háspennurafstrengi þúsundir kílómetra neðansjávar til að selja orku til Evrópu.  Hvað kemur í veg fyrir að strengir séu lagðir neðansjávar við landið, t.d. milli Straumsvíkur og Helguvíkur?  Neðansjávarstrengur hefur verið til Vestmannaeyja í 50 ár.

[Ómar Ragnarsson, 23.2.2013 kl. 18:48]

Kostnaðurinn við að leggja risaháspennulínur í jörðu er mikill en hins vegar hlutfallslega miklu minni, ef um venjulegar línur er að ræða.

En slíkar línur mega Landsnetsmenn alls ekki heyra nefndar.