Hvað um 15 ár í viðbót ?

Meðal aldurslíkur fólks, sem er orðið sjötugt mun vera nálægt 80 árum eða rúmlega það.

Nú hefur frést af því að hugsanlega geti gamlingjar lengt líf sitt um tvö ár með mikilli fiskneyslu.

En spurningin er hvort hægt sé að ná betri árangri.

Maður einn, sem var orðinn sjötugur spurði gamla lækninn sinn hvort hann teldi möguleika á því að hann gæti lengt líf sitt um 15 ár í viðbót eftir að hann yrði áttræður, eða upp í 95 ár.

Viðtalið við lækninn var svohljóðandi:  

"Ég þarf að vita hvernig lífsvenjur þínar eru og hafa verið", sagði læknirinn. "Hefurðu borðað eða borðarðu mikið af sætindum og feitum steikum með óhollu viðbiti með sterkjufitu?"

"Nei," svaraði sá sjötugi.

"Hefurðu reykt mikið eða verið í dópinu"

"Nei."

"Hefurðu drukkið mikið af áfengi og verið mikið úti lífinu?"

"Nei."

"Hefurðu verið mikið að slæpast í sterku sólskini?"

"Nei."

"Finnst þér gott að stunda bílífi með því að liggja í leti og hreyfa þig helst sem minnst?"

"Nei."

"Hefurðu sótt í stressandi athæfi, svo sem að stunda fjárhættuspil, aka hraðskreiðum bílum, eða eiga langar vökunætur út og suður með kvenfólki?"

"Nei."

"Til hvers andskotans ertu þá að óska þér þess að verða 95 ára?"

Getur aukið lífslíkur um tvö ár

Athugasemdir

[Sigurður Þorsteinsson, 2.4.2013 kl. 02:20]

[Þorsteinn Briem, 2.4.2013 kl. 08:10]

Ómar drekkur eins og svín,
ekkert er hann fyrir grín,
sólin á hans skalla skín,
skyldur er hann Mister Bean.

[Þórhallur Birgir Jósepsson, 2.4.2013 kl. 09:29]

Það er auðvelt að vera sammála þessum lækni! Hins vegar hefur í rauninni náðst ögn betri árangur en þú nefnir. Nýjustu tölur hagstofunnar um lífslíkur segja að við 65 ára aldur sé ólifuð meðalævi karla 19,2 ár (þ.e. til 84,2 ára aldurs) og við 80 ára aldur sé meðalævi íslenskra karla 8,4 ár (til 88,4). Hjá konunum eru tölurnar við 65 ára aldur 21,1 ár (til 86,1 ára) og við 80 ára aldur 9,6 ár, þ.e. til 89,6 ára. Hagstofan svarar hins vegar ekki spurningum um hversu skemmtilegt eða innihaldsríkt þetta æviskeið verði, svari því hver fyrir sig.

Þetta má sjá í einfaldri mynd hér, á bls. 9: http://www.live.is/media/arsfundur-2013/Arsskyrsla_2012.pdf 

[Þorsteinn Úlfar Björnsson (IP-tala skráð) 2.4.2013 kl. 11:35]

Það geta fleiri leirborið nafni.

Aldrei drekkur Ómar vín.

oftast gerir stólpagrín.

Sólin á hans skalla skín,

smættar alveg Mister Bean.

[Jósef Smári Ásmundsson, 2.4.2013 kl. 14:21]

Ómar hann er sóma sveinn

Sá fær dóminn:Hreinn og beinn

í sveit sleit skónum maðurinn

og skeitir ekki um leirburðinn.

[Haukur Kristinsson (IP-tala skráð) 2.4.2013 kl. 18:16]

Engin spurning. Steini Briem er bestur.

[Ómar Ragnarsson, 2.4.2013 kl. 18:18]

Þakka fyrir nýjar tölur um ævilíkur sem eru talsvert hærri en þær tölur, sem ég mundi eftir, en þær voru frá því fyrir meira en 15 árum.

[Jósef Smári Ásmundsson, 3.4.2013 kl. 05:10]

Ég man alltaf eftir sögunni af 117 ára konunni sem var spurð hverju hún þakkaði langlífi sínu.Hún svari því til að hún þakkaði það að hafa hætt að reykja þegar hún var 110.Ég held að góða skapið fleyti okkur lengra á lífsbrautinni.Þetta eru svo miklir leiðindaskarfar og DAUÐYFLI þarna fyrir handan að þeir tefja fyrir að við brandarakarlarnir komust yfirum.