Skömmuð fyrir að vera "á móti öllu" og ekki á móti öllu.

Af og til koma upp umræður um það að kenna megi náttúruverndarfólki um sumt sem illa fer varðandi umhverfisspjöll.

Nú síðast kemur þetta enn upp þar sem því er blákalt haldið fram að náttúruverndarfólk sé bara á móti stóriðju og "bara á móti atvinnuuppbyggingu úti á landi" en láti umhverfisspjöll sig engu skipta nálægt höfuðborginni. 

Nú er það svo að í gangi eru um 100 virkjunarhugmyndir um allt land og á hundruðum staða um allt land steðja að náttúrunni afleiðingar illrar og óþarfrar umgengni okkar við hana.

Á landinu eru hátt á þriðja þúsund malarnámur og því í mörg horn að líta.

Venjulega er söngurinn sá, að náttúruverndarfólk sé "öfgafólk, sem er á móti atvinnuuppbyggingu, - á móti öllu!" En svo koma allt í einu upp atriði eins og dauði Lagarfljóts, aðsteðjandi dauði Mývatns og mengun Þingvallavatns, og þá bregður svo við að við erum sökuð um að hafa ekki "verið á móti" því sem þessu hefur valdið eða er að valda !

Nú eru um 35 ár síðan ég byrjaði að gera sjónvarpsþætti og sjónvarpsfréttir um umhverfisspjöll og gróðureyðingu af mannavöldum í nágrenni Reykjavíkur og meira segja um umhverfisspjöll í Reykjavík sjálfri þegar ég tók fyrir mengun Skerjafjarðar í sjónvarpsfréttum. 

Ég lét það ekki nægja, heldur tók mengunina í Skerjafirði sérstaklega upp í vísum, sem ég söng á skemmtunum og kallaði "Skítasyrpuna".

Læt ég hana kannski fylgja með þessum bloggpistli.

Þessu hef ég haldið áfram í alla þessa áratugi með hundruðum frétta og þátta og náttúruverndarfólk hefur til dæmis unnið mikið starf í samtökunum "Gróður fyrir fólk" í landnámi Ingólfs, og má nefna áratugalanga óþreytandi baráttu Ingva Þorsteinssonar í því sambandi.

Í áratugi hefur Pétur Jónasson barist fyrir því að bjarga Þingvallavatni frá því að missa sérstöðu sína sem tært og blátt vatn og í marga áratugi hefur náttúruverndarfólk bent á slæm áhrif Steingrímsstöðvar á urriðann í vatninu.

Í Garðabæ og Hafnarfirði berjast Hraunavinir fyrir verndun verðmætra hraunminja. Svona mætti lengi telja.  

Fyrir níu árum tók ég fyrir mengun Þingvallavatns og gerði sérstakar fréttir um lagningu betri og styttri vegar milli Reykjavíkur og Laugarvatns, þar sem rök voru færð að þeirri lausn að leggja veg um eða undir Grafningsskarð á milli Ölfuss og Grafnings eða til vara að leggja veg stystu leið Nesjavallaleið í gegnum stutt göng norðan við Nesjavallavirkjun um Kaldárhöfða og áfram austur Lyngdalsheiði.

Í stað hraðbrautar milli Þingvalla og Laugarvatns mætti lagfæra Konungsveginn lítillega og leggja á hann bundið slitlag, þannig að róleg og afmörkuð ferðamannaumferð gæti legið um hann en hraða umferðin fjær Þingvallavatni. Fyrir 6-7 árum kom í ljós að arsen fannst í Þingvallavatni og ég reyndi að varpa ljósi á það mál, en kom alls staðar að dyrum þögggunar, enda bárust böndin að Nesjavallavirkjun og umfjallanir mínar um þessi mál kallaðar "sérviska" og "öfgar".  

Í áratugi hef ég sýnt myndir af spjöllum vegna malarnáms á ótrúlegustu stöðum á Reykjanesskaga án hins minnsta árangurs vegna andstöðu þeirra sömu og nú vilja kenna náttúrverndarfólki um það að hafa með aðgerðarleysi samþykkt ofangreind spjöll og mörg fleiri.

Fyrir 45 árum söng ég ádeilu um sprengingu á smíðum sumarbústaða við Þingvallavatn, en hér fylgir syrpan, sem ég söng við ljúf lög, eins og Lapi listamannakrá, Amorella og Hvítu máva fyrir 36 árum.  

"SKÍTASYRPAN"

Lækur tifar létt um smurða steina.

Ljótur pollur skín við Hlíðarfót.

Brunnið flak er brotið milli hleina.

Í blárri leðju liggur mökuð snót.

Þótt ég yrði ógnar olíusuga

ég aldrei gæti þurrkað þennan pytt,

en sumir sem til annars ekki duga

þeir eflaust gætu áfram gert þar "hitt".

              Nú blikar við sólarlag saurgerlafjöld

               og svona´ætti að menga hvert einasta kvöld

               með ilmandi fýlu og flökrandi blæ

               og fjöruna brúna og myglandi sæ.

Ef lambasteik þú færð að borða´á Loftleiðahóteli

og labbar þig svo næsta morgun þar á salerni, -

í hlýju veðri sjóinn ferð að hýrga kroppinn þinn

þá hittirðu þar máltíðina þína´í annað sinn  

 og syndir fram á fyrrverandi lúxuskvöldverðinn !

               Fuglinn í fjörunni hann er mjög blár,

               drullubleik er húfan hans og olíulitað hár, -

skítamávar, segið þið honum

að þið salmonellum dritið út um allt, -

               ljúfasta salmonella,

               ástvina mín, la bella, -

               í görnum þú glöð vilt sprella

               og gefa mér bleikan lit, -

               salmonella, - gubbugella!

                

Litið alvarlegum augum

Athugasemdir

[Þorsteinn Briem, 12.4.2013 kl. 14:15]

12.4.2013 (í dag):

"Eins og komið hefur fram á mbl.is gaf Heilbrigðiseftirlit Hafnarfjarðar- og Kópavogssvæðis út skýrslu í mars síðastliðnum um mælingar á brennisteinsvetni í Kópavogi.

Í niðurstöðu heilbrigðisnefndarinnar segir að vaxandi styrkur brennisteinsvetnis í andrúmslofti á höfuðborgarsvæðinu sé áhyggjuefni en langtíma áhrif lágs styrks brennisteinsvetnis á heilsufar hafa lítið verið rannsökuð."

Kópavogur lýsir yfir áhyggjum af loftgæðum

[Þorsteinn Briem, 12.4.2013 kl. 15:06]

18.1.2013:

"Morgunútvarpið hefur fjallað um brennisteinsvetni í andrúmloftinu i vikunni, það er að segja mengun frá Hellisheiðarvirkjun sem berst yfir íbúðabyggð - til dæmis á höfuðborgarsvæðinu.

Þetta getur valdið fólki óþægindum og til dæmis eru vísbendingar um að sala á astmalyfjum aukist í kjölfarið á mengunartoppum frá virkjuninni.

En brennisteinsvetni hefur áhrif á fleira, meðal annars er ýmiss konar tækjabúnaður viðkvæmur fyrir þessari mengun - til dæmis rekja tæknimenn í Útvarpshúsinu margvíslegar bilanir til þessa."

Brennisteinsvetni skemmir tæki

[Þorsteinn Briem, 12.4.2013 kl. 15:38]

3.1.2013:

"Ef geisla- og DVD-spilarar hætta skyndilega að virka og skruðningar heyrast í hljómflutningstækjum heimilisins má ef til vill rekja bilunina til brennisteinsmengunar.

Sama mengun veldur því að jólasilfrið hefur undanfarin ár verið ansi svart.

Brennisteinsmengun í andrúmslofti hefur aukist á höfuðborgarsvæðinu frá því að jarðvarmavirkjanir voru teknar í gagnið á Hellisheiði árið 2006.

Brennisteinsvetni myndar nýtt efnasamband þegar það kemst í snertingu við silfur þannig að það fellur á málminn."

"Algengt er að þetta sé ástæðan þegar komið er með biluð raftæki í viðgerð, segir Arnar Sigurður Hallgrímsson, rafeindavirki hjá Sjónvarpsmiðstöðinni."

"Arnar segir dæmi um það að fólk komi með sömu tækin aftur og aftur vegna þessa vandamáls."

Brennisteinsvetni skemmir hljómflutningstæki

[Jón Logi (IP-tala skráð) 12.4.2013 kl. 17:13]

Þegar ég bjó í snyrtilegu kaupstaðarheimili og fór í sveitina, þá fannst mér alltaf fjósalykt út um allt. Sú tilfinning hvarf þó með samdaunun.

Nú bý ég við hana að staðaldri og læt af mér vel. En fari ég í höfuðborgina finn ég ekkert nema þessa "prumpufýlu" af heiðinni, og er ég spyr innvígða um fnykinn, þá hvá þeir og segja "hvaða lykt".

Ég er það naskur, að er ég fæ gesti, ferska úr borginni, þá finn ég þetta af fötum þeirra, jafnt og þeir hinir finna lyktina af búkollu hjá mér.

En....Búkolla sprengir ekki rafmagnstæki, veldur ekki astma, og svertir ekki sparisilfrið.

Ferðamenn hjá mér erlendir hafa enn eitt nef á þetta. Finnst bölvuð fýla í Reykjavík, en flott sveitaloftið :D

[Hjörtur Sæver Steinason (IP-tala skráð) 12.4.2013 kl. 21:43]

Af hverju er ekki rædd hlýnun Þingvallavatns og af hver sé ástæða hennar, Það má sennilega ekki ræða að Nesjavallar virkjun notar vatn úr Þingvallavatni til kælingar og dælir því svo aftur í vatnið !! Tala nú ekki um alla umferðina sem þeir stýra í gegnum ÞJÓÐGARÐINN fleiri og fleiri rútur sem rúlla þarna í gegn og fer alltaf fjölgandi. Einkum eftir nýju hraðbrautina eins og þú kallar hana. Það er allt í lagi !!

Svo segir Ólafur Örn Haraldsson þjóðgarðsvörður "að Þingvellir séu á heimsminjaskrá. Hann segir að það vanti enn talsvert upp á að menn séu búnir að læra að umgangast þjóðgarða af þeirri virðingu sem þeir eigi skilið"

Hræsnin er svo mikil að maður á ekki eitt einasta orð !!

[Hjörtur Sæver Steinason (IP-tala skráð) 12.4.2013 kl. 21:51]

Þarna var ég aðeins of fljótur á mér. Var að lesa grein... http://tryggvifel.wordpress.com/tag/olafur-orn-haraldsson/

En þar lýsir Ólafur Þjóðgarsvörður... áhyggjum af bæði aukinni gegnumstreymisumferð um þjóðgarðinn og auknum umferðarhraða.

Afsakið mér fljótfærnina :-(

Kveðja Hjörtur og JAKINN.is

[Ómar Ragnarsson, 12.4.2013 kl. 23:10]

Pistillinn sá arna er einmitt skrifaður í tilefni af hlýnun Þingvallavatns. Margir halda að útblástur bifreiða hafi engin áhrif á neitt nema andrúmsloftið en um áraraðir hefur Pétur Jónasson reynt að kynna vísindalegar niðurstöður varðandi það á útblástursefnin setjast á yfirborð jarðar og vatns og að aukning níturs sé hreinleika Þingvallavatns hættuleg.

Því hraðari, þyngri og meiri sem bílaumferðin er, því meiri mengun.

Fólk á kannski erfitt með að trúa því, en meðal fólksbíll hér á landi blæs út upp undir 200 grömmum af koldíóxíði á hvern ekinn kílómetra, eða tveimur kílóum á leið sinni framhjá Þingvallavatni.

Meira að segja áhrif útblásturs á hafið eru miklu meiri en fólk gerir sér almennt grein fyrir, því að hafið súrnar hratt og það hefur vaxandi áhrif á lífríkið.