Fyrsta góðviðrisleirfok sumarsins við Hálslón.

Það var ekki amalegt að vera á Sauðárflugvelli í gær og fyrradag við að valta völlinn og yfirfara hann. Á efstu myndinni sést úr lofti yfir völlinn með sínum fimm brautum, alls 4,7 km langar, en Brúarjökull og Kverkfjöll eru í baksýn. 

Hitinn komst í ellefu stig um miðjan dag í gær og þangað til þá var logn eða andvari. 

Á loftmyndinni sést að gríðarstór skafl er vestan við flugvöllinn, en á svæðinu umhverfis hann, einkum fyrir vestan hann, er enn kolófært fyrir jeppa vegna skafla og aurbleytu þótt völlurinn hafi verið harður og fínn í meira en viku. Þetta sést betur á mynd, sem tekin er á vellinum til vesturs og á mynd, sem er sköflunum sem liggja upp að suðurbrún melsins, sem völlurinn stendur á.  

Eftir hádegi fór að kula af suðri og þegar farið var í loftið áleiðis til Hvolsvallar var komið dimmt leirfok úr þurrum leirum Hálslóns, alla leið frá jökli og 25 kílómetra norður um til Kárahnjúka.

Á myndunum sést þetta vel og fellið, sem grillir í heitir Sauðafelli en Kárahnjúkar og stíflurnar tvær eru huldar rykmekkinum, því að það eru Eiríksstaðahneflar sem sjást fjær, enda fer mökkurinn beint í norður, en Hneflarnir eru í norðaustri.

Ég átti ekki von á leirfoki vegna þess að lónstæðið hefur verið blautt vegna leysinga fram að þessu.

Á næstu mynd sést auð leirfjaran að vestanverðu og fjaran að austanverðu hægra megin.

En um leið og yfirborðið þornar, er það þakið spánnýjum leir ár hvert, sem fíngerður eins og hveiti og byrjar að rjúka.

Þegar það verður orðið þurrara í gegn verður leirfokið meira, og þetta ástand getur verið þarna alveg fram yfir mánaðamótin júlí-ágúst.

Kárahnjúkavegur hefur verið fær upp að stíflunum, en þetta "bætta aðgengi" verður til lítils á bestu góðviðrisdögunum eins og í gær og fyrradag.

Í ljósi þessa eru broslegar myndirnar sem Landsvirkjun birti á sínum tíma af komandi fjölförnustu ferðamannamiðstöðinni á hálendinu, þar sem stundaðar yrðu allar helstu tegundir útvistar á hinu blátæra vatni, ef marka mátti myndirnar.

En í raun er vatnið líkast til það aurugasta í heimi, - skyggni í því talið á sentimetrum á fingrum annarrar handar og engu lífi vært.

Allt að 18 stiga hiti

Athugasemdir

[Þorsteinn Briem, 18.6.2013 kl. 23:53]

7.5.2013:

"Þetta ætti að segja manni, sem vill kenna sig við hægristefnu eða markaðshyggju, að stóriðjustefna sé eitthvað sem hann á að láta eiga sig."

"Hvernig stendur á því, í ljósi alls þess sem að ofan greinir, að það hafa verið hægrimenn sem hafa barist fyrir stóriðju en vinstrimenn gegn henni?

Er þetta ekki allt saman einn stór misskilningur?"

"Og ættu umhverfissinnar ekki að taka upp markaðshyggju sem vopn í sinni baráttu?"

Opið bréf til hægrimanna: Hættum stóriðjustefnunni - Ungir sjálfstæðismenn

[Þorsteinn Briem, 19.6.2013 kl. 00:33]

1.6.2013:

Líklega nóg komið af álverum - Frosti Sigurjónsson þingmaður Framsóknarflokksins

[Sigrún Pálsdóttir (IP-tala skráð) 19.6.2013 kl. 01:19]

Rykið er varla gott fyrir flugvélabúnað. Guðs mildi að ekki fór verr Ómar. Til hamingju með það afrek að lifa þetta af.

[Ómar Ragnarsson, 19.6.2013 kl. 12:02]

Sem betur fer er mun sjaldgæfara að blási á þurrar leirurnar úr austri og ekki kom rykkorn vestur yfir völlinn um helgina. Lang algengustu leirfoksáttirnar eru sunnanátt og suðvestanátt.

[RE, 21.6.2013 kl. 12:06]

Sæll Ómar, Ertu með leyfi frá Umhverfisráðuneytinu fyrir gerð þessara flugvalla.

[Jón Logi (IP-tala skráð) 23.6.2013 kl. 08:20]

Flugvöllurinn er náttúrulegur. Náttúran fékk reyndar ekki leyfi.