Þarf að endurskoða reglurnar ?

Það er nauðsynlegt að einhver hafi yfirumsjón með því að meta, hvort rétt sé að hleypa almennri umferð á hálendisvegi á sumrin og hvenær það sé gert og vald til að loka slóðum. Við slíkt mat hefur verið og verður að miða við venjulega bíla, þá sem hafa minnsta getu til að hægt sé að aka um þessar slóðir við venjuleg skilyrði, án vandræða og án þess að skemma vegina.

Umferðin og aðsóknin vaxa, og eins og sést á efstu myndinni, sem tekin var yfir Öskju með Herðubreið í baksýn í fyrradag er eftir miklu að slægjast. Það sést líka að það er kafsnjór enn í Öskju en þegar kemur nokkra kílómetra norður fyrir hana er alautt.

Ef allir bílar væru svipaðir væri málið einfalt. En bílar, sem notaðir eru til ferða um óbyggðir, eru svo ólíkir að þeim verður ekki jafnað saman og því athugunarefni, hvort ekki þurfi að gera sér reglur um þá.

Slóð getur verið í þannig ástandi, að venjulegur óbreyttur jeppi eða jepplingur festist í slóðinni eða skeri hana illa á sama tíma sem jöklajeppi getur á stórum dekkjum, sem hleypt hefur verið úr, farið leiðina auðveldlega án vandræða og án þess að valda neinum skemmdum. 

Þetta síðara atriði olli því, að hópur fólks, sem staðkunnugt er á leiðinni frá hringveginum upp í Öskju fór á vegum ferðaskrifstofu með ferðafólk í óleyfi á jöklajeppum hina lokuðu leið frá hringveginum upp í Öskju fyrir viku.

Ferðin hafði verið seld fyrirfram í trausti þess að leiðin opnaðist á eðlilegum tíma, en í vor hefur verið alveg sérstaklega snjóþungt á þessu svæði, einkum þegar kemur fram hjá Herðubreiðartöglum við Herðubreiðarlindir.

Er leiðin því enn lokuð samkvæmt hálendiskorti Vegagerðarinnar.

Á flugi yfir leiðina fyrir þremur dögum sást, að ekið hafði verið á slóðinni alla leið upp að þeim stað efst í Öskjuopi, þangað sem leyft er að aka á sumrin, og myndin hér er af. En þaðan láu gönguför inn að sprengigígnum Víti eins og sést á myndinni af síðasta spottanum inn á gígbarminn. 

Leiðin frá Dreka og uppeftir var enn að mestu snævi þakin og jeppunum var ekið á snjónum, en enda þótt auðvelt hefði verið að aka þeim alla leið að gígnum Víti, var það ekki gert, heldur passað upp á að ekki væri ekið á snjó þá leið sem banna er að aka þegar jörð er auð.

Þetta atvik vekur spurningar um það, hvort í ljósi afar ólíkra bíla, sem hægt er að nota, sé rétt að hafa reglurnar um akstur á svona slóðum eins einhæfar og þær sýnast vera.

Hvort í staðinn fyrir blátt bann geti verið rétt að gefa leyfi fyrir afmarkaðar ferðir undir ströngu eftirliti, þar sem leyfishafar gangast undir það að hlíta forsögn og skilyrðum sem fara þarf eftir og viðurlög eða sektir lægju við að brjóta.

Þetta kallar auðvitað á kostnað við slíkt eftirlit og umsjón, en á móti kemur, að tekjur af ferðamönnum hafa stórvaxið og að það getur varla verið æskilegt ástand sem hefur ríkt og ríkir.

Ég hef áður hér á blogginu talað fyrir því að lagfæra leiðina inn í Herðubreiðarlindir og veita fé í meiri þjónustu og eftirlit í samræmi við aukinn fjölgandi ferðamenn og tekjur af þeim.

Það er hvort eð er þannig, að veita verður í sumum tilfellum undanþágu frá algeru akstursbanni.

Dæmi um það er ferð sem vísindamenn fengu leyfi til að fara á jöklajeppum í apríl í fyrra upp í Öskju við svipaðar aðstæður og nú, og þó jafnvel öllu verri.

Þá hafði verið frost undanfarna daga og því hægt að komast þetta án þess að valda skemmdum.

Þá sáust ljót för rétt norðan við friðlandið í Herðubreiðarlindum, eins og sést á meðfylgjandi mynd, sem höfðu greinilega komið þarna þegar einhverjir fóru í óleyfi í tveggja vikna þíðu skömmu áður og urðu að fara framhjá djúpum tjörnum á veginum.

  

Fært inn í Landmannalaugar

Athugasemdir

[Sigurður Sunnanvindur (IP-tala skráð) 19.6.2013 kl. 14:10]

Þetta er gott innslag Ómar.

Samtök Útivistarfélga og Samtök Ferðaþjónustunnar hafa árum saman farið fram á það að fjallvegir sem þola léttfætta umferð fái takmarkaða opnun sem er sambærileg við öxulþungatakmarkanir sem eru vel þekktar.

Opnun mundi þá takmarkast við leyfðan vegþrýsting ökutækja eða "ground pressure" sem er einfaldlega loftþrýstingurinn í dekkjunum.

Öskjuleiðin mætti vera opin allt vorið með vegþrýsting undir 8PSI um miðjan júní mætti hækka þetta í 12PSI.

Vegagerðin hefur aldrei tekið undir þessar kröfur en þó er Vegagerðin mælandi loftþrýsting flesta daga ársins á Vöruflutningabílum með heildarþunga á milli 44 til 49 tonn en bílum í þessum þyngdarflokki má ekki aka um þjóðvegi með hærri vegþrýsting/dekkjaþrýsting en 100PSI.

Venjulegur þrýstingur í þessum dekkjum er 120PSI og það kostar umtalsvert eldsneyti og dregur úr endingu hjólbarða að aka á þessum lága þrýstingi en er talið nauðsynlegt til að minnka slit á vegum.

Öskjuleiðin er ekki lokuð vegna aurbleytu!

Þarna er engöngu ekið um foksand, hraun og skolaða ármöl sem hleypur ekki í drullu.

Ég hef verið þarna á þessum árstíma þegar Vegagerðin vildi opna veginn en FFA og FFF vildi halda honum lokuðum þar til dagatalið sýndi ráðningardag sumarstarfsfólks og vatnsveitur við skálana væru klárar.

VJÞ vildi ekki umferð um Herðubreiðarlindir vegna gæsavarps. (sjálfur tel ég nauðsynlegt að setja upp fuglahræður í Herðubreiðarlindum til að draga úr beitarálagi á þessa gróðurvin).

Vegagerðin er því í þeim ljóta leik að loka vegi sem er fær.

Svona gengur þetta ár eftir ár.

[Þorsteinn Briem, 19.6.2013 kl. 17:55]

Ekki veitir nú af að minnka loftið í Þingeyingum.

[Þorsteinn Briem, 19.6.2013 kl. 18:02]

Bókin um veginn er komin út í nýrri þýðingu.

Formála ritar vegamálastjóri.

[Þorsteinn Briem, 19.6.2013 kl. 18:29]

Sigurður er Sunnanvindur,
sorglegur hans þunni tindur,
Sigurður að sunnan vindur,
sér nú upp á Gunnars kindur.

[Þorsteinn Briem, 19.6.2013 kl. 18:42]

19.6.2013 (í dag):

Vegagerðin flýtir athugun á hálendisvegum

[Þorsteinn Briem, 19.6.2013 kl. 20:53]

Útgjöld hvers erlends ferðamanns til íslenskra fyrirtækja voru að meðaltali um 354 þúsund íslenskar krónur árið 2012, um 44 þúsund krónur á dag að meðaltali.

Árið 2012 komu um 673 þúsund erlendir ferðamenn hingað til Íslands og það ár voru útgjöld erlendra ferðamanna til íslenskra fyrirtækja samtals 238 milljarðar króna.

Erlendir ferðamenn voru að meðaltali 6,6 gistinætur hér á Íslandi að vetri til en 10,2 nætur að sumri til árið 2012, um átta gistinætur að meðaltali sumar og vetur.

Ofangreindar fjárhæðir samsvara því að útgjöld hvers Íslendings vegna ferðalaga til útlanda árið 2012 hefðu að meðaltali verið 704 þúsund krónur og meðalútgjöld hjóna því 1,4 milljónir króna.

Þá var meðaldvalarlengd Íslendinga á ferðalögum erlendis 15,9 gistinætur.

Ferðaþjónusta hér á Íslandi í tölum árið 2012 - Ferðamálastofa í apríl 2013

[Sæmundur Þór Sigurðsson (IP-tala skráð) 19.6.2013 kl. 22:09]

Þetta er einmitt málið.  

Við erum búin að aflýsa ferðum í Öskju síðan allt varð vitlaust og gestir okkar komast ekki að sjá þennan einstaka magnaða stað.

Það er hægt að bjóða uppá ferðir í Öskju snemm sumars ef farið er með gát og á mikið breyttum jeppum.    Og í þessu tilfelli vorum við með fatlaðan einstakling með okkur og albest að flytja hann á snjó að vatninu.  

Við sóttum um leyfi Vatnajökulsþjóðgarðs til að nota vélsleða en það fékkst ekki. 

Það er ekki sanngjarnt að setja á okkur kröfur um fólksflutningaleyfi, hópferðaskoðun, meirapróf, ferðaskipuleggjandaleyfi og nú á að bæta við stórauknum kröfum á leiðsögumenn og bílstjóra í svona ferðum.   Wilderness first ofl.ofl.   sem allt er gott mál.   En að við sem stundum þessa grein ferðaþjónustu með öll leyfi í lagi séum þrátt fyrir það við sama borð og útlendingur sem leigir sér jeppa og keyrir á malarvegi í fyrsta sinn.