Örugg staðfesting.

Ég hef oftar en einu sinni minnt á það á blogginu hérna hve votviðrasöm tíðin í sumar bliknar í samanburði við rigningasumarið mikla 1955. 

Páll Bergþórsson staðfestir þetta heldur betur í skrifum sínum um málið og lýsing hans á sumrinu 1955 sýnir, að héðan af mun sumarið núna ekki verða jafnoki sumarsins 1955, því að hingað til hefur einn og einn þurr dagur verið inni á milli, jafnvel tveir saman, og er eins þurrs dags í viðbót að vænta á morgun, að minnsta kosti fram á kvöld.

1955 voru rigningardagarnir 80 í röð, og til þess að jafna það þyrfti að vera dagleg úrkoma frá næstkomandi fimmtudegi 18. júlí allt til 18. september, en það verður bæði að teljast heldur ólíklegt auk þess sem síðasti hluti september heyrir frekar til haustsins en sumarsins.  

1955 var blautara

Athugasemdir

[Þorsteinn Briem, 16.7.2013 kl. 23:08]

"Meðalhiti mældist 9,9 stig í Reykjavík [í júní síðastliðnum], sem er 0,9 stigum ofan meðaltals áranna 1961 til 1990 en 0,6 stigum undir meðallagi síðustu tíu júnímánaða.

Júní 2011 var þó kaldari en nú.

Óvenjuhlýtt var á Akureyri, meðalhitinn mældist 11,4 stig og hefur ekki verið svo hár í júní síðan 1953, eða í 60 ár.

Frá því að samfelldar mælingar hófust á Akureyri 1881 hefur meðalhiti í júní verið hærri aðeins fimm sinnum.

Einnig var óvenjuhlýtt um landið austanvert sem og á hálendinu. Meðalhiti á Höfn í Hornafirði mældist 10,1 stig og 7,3 á Hveravöllum."

Tíðarfar í júní 2013 - Veðurstofa Íslands

[Þorsteinn Briem, 16.7.2013 kl. 23:36]

Meðalhitinn í Reykjavík var 5,5 stig árið 2012, sem er um 1,2 stigum fyrir ofan meðallag áranna 1961-1990 og í meðallagi sé miðað við árin 2001-2010.

Á Akureyri var meðalhitinn hins vegar 4,3 stig árið 2012, sem er 1,1 stigi fyrir ofan meðallag áranna 1961-1990.

Og sólskinsstundirnar voru 172 færri á Akureyri en í Reykjavík árið 2012, enda þótt þær hafi verið tæplega 140 stundum fleiri en áður hefur mælst á einu ári á Akureyri.

Og meðalhitinn árin 1961-1990 var 4,3 stig í Reykjavík en 3,2 stig á Akureyri.

Tíðarfar árið 2012 - Veðurstofa Íslands

[Þorsteinn Briem, 17.7.2013 kl. 04:17]

Sumrin (júní, júlí og ágúst) 2001-2012 var meðalhitinn hærri í Reykjavík en á Akureyri, samkvæmt mælingum Veðurstofu Íslands.

Í Reykjavík var hitinn þá að meðaltali um 11,3 stig en 10,6 á Akureyri.

Hitinn var því að meðaltali um 0,7 stigum hærri í Reykjavík en á Akureyri þessi tólf síðastliðin sumur.

Á þessum árum var meðalhitinn í Reykjavík í júní 10,3 stig, í júlí 12,0 og í ágúst 11,5 stig.

En meðalhitinn á Akureyri í júní var 9,6 stig, í júlí 11,4 og í ágúst 10,9 stig.

Í Reykjavík var því meðalhitinn í júní um 0,7 stigum hærri en á Akureyri, í júlí 0,6 stigum hærri og í ágúst 0,6 stigum hærri.