Gott að nokkur atriði séu öllum ljós.

 Hér eru nokkur atriði sem gott er að okkur séu ljós fyrirfram varðandi stóriðju á Bakka við Húsavík. 

 1.  Ekki hefur verið reist kísilver í Evrópu í 20 ár. Þá voru síðst uppi áætlanir um að reisa kísilver á Grundartanga. Af hverju?  

  2. Síðastu setningarnar sem sagðar voru á 4,5 klst afmælisráðstefnu Ísor á dögunum gefa hugsanlega skýringu.

Fyrirspyrjandi úr sal:  "Hefur síðasti ræðumaður eitthvað um það að segja, að útreikningar mínir sýna að við séum að selja orku á 20 mills á einingu sem kostar 40 mills að framleiða þegar upp er staðið?"

Síðasti ræðumaður: "Nei. Þetta er rétt."

Ráðstefnunni slitið. Mikil ánægja. Fréttir í fjölmiðlum um glæsilega forystu Íslendinga og fordæmi fyrir heiminn á þessu sviði.  

3.  Úr því að fyrsta kísilver í 20 ár verður reist á Íslandi og það síðasta var við Grundartangahöfn hefði mátt ætla að nýja kísilverið risi við tilbúna höfn og verksmiðjusvæði í Helguvík. Þar hefur verið mesta atvinnuleysi á landinu.

4. Kísilver á Bakka kostar seljendur orkunnar nokkra auka milljarða miðað við sams konar verksmiðju í Helguvík.

Grafa þarf jarðgöng milli hafnar og verksmiðju fyrir norðan, byggja hafnarmannvirki og veita meiri ívilnanir en nokkurn tíma voru veittar til stóriðju af ráðherrum í ríkisstjórn Sjalla og Framsóknar á sínum tíma.

Ástæða: Það verður að reisa álver í Helguvík, sem tekur alla fáanlegu orku og miklu meira en það og borgar smánarlega lágt verið fyrir hana. Halló, miklu meiri orku en er fáanleg? Já, en það er aukaatriði, álverið verður að rísa og bægja öllum öðrum möguleikum frá, líka mun hagkvæmara kísilveri en fyrir norðan. 

5. Allir þingmenn kjördæmisins og meirihluti Alþingis eru og voru sammála um þennan fjáraustur núna, líka Vg þingmaðurinn og þáverandi ráðherra Steingrímur J. Sigfússon.

6. Í ofanálag er gert að skilyrði í samningi um málið, að þessar met meðgjafir verði aðeins veittar orkufrekum iðnaði, þ. e. stóriðju, - önnur fyrirtæki komi þar með ekki til greina! Stóriðjustefna í nýju hámarki!   

7. Jarðgöngin og verksmiðjan verða á nákvæmlega þeim stað á Íslandi þar sem búast má við stærstum jarðskjálfta a landinu hvenær sem er, að mati jarðfræðinga.

Engum manni virðist detta í hug að endurskoða staðsetninguna af þessum sökum eða hnika henni til fyrir norðan.

Enda pottþétt að risa jarðskjálfti beint þarna undir myndi ekki trufla neinn eða neitt af því að möguleikarnir eru aðeins tveir: 

A. Jarðskjálftinn kemur ekki fyrr en eftir að verksmiðjan er risin. Í fínu lagi, hann kemur þá of seint, það verður búið að reisa hana. Stækkaður viðlagasjóður borgar tjónið eins og tjón vegna annarra jarðskjálfta, líka hugsanlegt manntjón. Við förum létt með það. 

B. Jarðskjálftinn kemur áður en verksmiðjan er risin. Fínt, þá er það afgreitt, búið að tappa spennunni af og eftir það verða minnstu mögulegu líkur á öðrum jafnstórum jarðskjálfta í bráð !

Málinu lokað, málið dautt. Fínt.  

Af hverju er þessi pistill skrifaður?  

Bara til þess að það sé á hreinu hvað við ætlum að gera og að við séum fyrirfram búin að sætta okkur við allt, sem því fylgir eða getur fylgt.  

 

 

Framkvæmdir við kísilver gætu hafist í haust

Athugasemdir

[Þorsteinn Briem, 31.7.2013 kl. 01:21]

Það var fyrir löngu ljóst að hvorki yrði reist álver á Húsavík né í Helguvík.

En menn geta að sjálfsögðu haldið áfram að staglast á því ef þeir endilega vilja.

Kísilver verður hins vegar reist á Húsavík og trúlega einnig í Helguvík.

[Þorsteinn Briem, 31.7.2013 kl. 01:39]

10.5.2013:

Skipulagsstofnun: Kísilver í Helguvík þyrfti 130 MW þegar það yrði komið í fulla stærð, sjá bls. 4

Hins vegar þyrfti álver í Helguvík 625 MW, um fimm sinnum meiri raforku en kísilver á sama stað.

Samtals þyrftu álverið og kísilverið því 755 MW.

[Þorsteinn Briem, 31.7.2013 kl. 02:22]

Háhitasvæði á Reykjanesskaga:

Eldvörp 50 MW,
Sveifluháls 50 MW,
Gráuhnúkar 45 MW,
Hverahlíð 90 MW,
Meitillinn 45 MW,
Sandfell 50 MW,
Reykjanes 50 MW,
Stóra-Sandvík 50 MW.

Samtals 430 MW.

Og engan veginn víst að hægt verði að fullnýta allar þessar átta virkjanir, enda þótt þær hafi verið samþykktar á Alþingi.

Hvað þá að álver í Helguvík geti fengið raforku frá þeim mjög fljótlega.

[Þorsteinn Briem, 31.7.2013 kl. 02:24]

30.7.2013 (í gær):

"Alþjóðlega lánshæfismatsfyrirtækið Standard and Poor's hefur breytt horfum á lánshæfiseinkunn Landsvirkjunar úr stöðugum í neikvæðar."

Rafnar Lárusson fjármálastjóri Landsvirkjunar:

"Það er enn vegur að fara áður en staðan verður góð.

Ríkisábyrgð á skuldum fyrirtækisins hækkar endanlegt lánshæfismat.

Áhrif ríkissjóðs á Landsvirkjun er því frekar til þess að hífa einkunn fyrirtækisins upp, þó að nú hafi horfur versnað með versnandi horfum ríkissjóðs.“

"Í nýrri skýrslu frá matsfyrirtækinu Standard and Poor's kemur fram að lánshæfismati Íslands sé breytt úr stöðugum horfum í neikvæðar en lánshæfiseinkunn ríkissjóðs er einungis einum flokki fyrir ofan svokallaðan ruslflokk.

Helstu rök matsfyrirtækisins á þessum breytingum eru fyrirhugaðar niðurfærslur ríkisstjórnarinnar á skuldum heimilanna sem eigi eftir að leiða til verri afkomu ríkissjóðs."

Lánshæfi Landsvirkjunar veikist

[Gunnar Th. Gunnarsson, 31.7.2013 kl. 09:20]

Hvernig má það vera að það kosti 40 mills að framleiða orku, þegar stóriðjunni er seld orka á innan við það og samt er stóriðjan helsta og tryggasta tekjulind Landsvirkjunar, eins og forstjórinn Hörður Arnarson segir og í raun ástæða þess að orkan til almennings er jafn lág hérlendis og raun ber vitni? (eitt lægsta orkuverð til almennings í heimi)

Jarðgöng eru ekki í neinni sérstakri hættu vegna jarðskjálfta, eins og sýnt var fram á með Hvalfjarðargöngum. Það er lega sprungna og brotabelta sem skiptir máli. Ef þau eru samsíða legu gangnanna, þá er lítil hætta.

[Gunnar Th. Gunnarsson, 31.7.2013 kl. 09:21]

lega og stefna átti þetta að vera

[Jarðálfur (IP-tala skráð) 31.7.2013 kl. 11:04]

Fréttablaðið greindi frá því 25. júní að nýjustu rannsóknir jarðvísindamanna sýna að spenna í Húsavíkurmisgenginu svokallaða sé til staðar fyrir skjálfta af stærðinni 6,8 á Richter, en svo stórir skjálftar og stærri eru þekktir á svæðinu.

Það er mat Páls Einarssonar, prófessors í jarðeðlisfræði, að upplýsingarnar ættu að skoðast í ljósi ákvarðana um uppbyggingu mannvirkja, ekki síst kísilmálmverksmiðju PCC á Bakka enda væri verksmiðjan bókstaflega ofan í virkasta sprungusvæðinu. Nefndi hann sérstaklega sprungugrein kennda við Skjólbrekku og aðra sem kennd er við Laugardal – þar sem jarðgöngin kæmu upp úr jörðinni norðan megin.

Sprungugreinarnar tvær eru þær virkustu á Húsavíkurmisgenginu. Því yrðu göngin staðsett skammt frá stærstu jarðskjálftasprungum á svæðinu – þar sem ein mesta jarðskjálftahættan er á landinu.

[Gunnar Heiðarsson, 31.7.2013 kl. 11:28]

Óskaplega hlýtur kísilverið á Grundartanga að vera lítið. Ekki hef ég orðið var við þá verksmiðju.

Hins vegar er jánblendiverksmiðja þar, sem er svo sem ekki ósvipuð kísilveri, en eðlið þó allt annað. Sú verksmiðja hóf störf fyrir 34 árum síðan.

Hins vegar voru uppi áætlanir fyrir um tuttugu árum að reysa kísilver á Grundartanga og voru það eigendur járnblendiverksmiðjunnar sem stóðu að þeim áætlunum. Ekkert varð af þeim áætlunum þá. Þó verksmiðjan hafi viðhaldið viljanum og stundum skoðað þetta mál síðan, hefur enn ekkert kísilver verið reyst þar, svo ég viti.

Það er mikill munur á eðli járnblendiverksmiðju og kísilveri. Afurð járnblendiverksmiðju er eins og nafnið ber með sér, járnblendi og er það notað sem hráefni í stálframleiðslu. Afurð kísilvers er hins vegar kísill sem notaður er m.a. í tölvuiðnaði og alls kyns framleiðslu á hitaþolnum vörum. Eftirspurn eftir kýsil fer vaxandi. Hin mikla framrás í tölvuiðnaði kallar og einnig varð mikil aukning á eftirspurn eftir þessu efni þegar asbestið var bannað.

Það sem sameinar þessar tvær gerðir af verksmiðjum er að báðar framleiða hráefni og báðar byggja á svokallaðri "Södeberg" tækni, þ.e. bræðslu sem fengi er með ljósboga milli þriggja skauta í til þess gerðum bræðsluofnum.

Hvort rétt eða rangt sé að reysa kísilver að Bakka, ætla ég ekki að dæma um. Hins vegar þykir mér ríkið hafa lofað of miklu vegna hennar. Ef vilji er til að byggja slíka verksmiðju er í sjálfu sér allt í lagi að leyfa slíkt. Þeir sem þess óska kyna sér þá væntanlega staðhætti og eiga að sjálfsögðu að greiða þann kostnað sem þarf til að hægt sé að byggja.

Þegar járnblendiverksmiðjan á Grundartanga var reyst var allur kostnaður við byggingu hafnarinnar og vegaframkvæmda, tengda verksmiðjunni greiddur af þeim sem byggðu. Síðan var höfnin afhennt sveitarfélgunum og vegirnir vegagerðinni.

[Sigurður Sunnanvindur (IP-tala skráð) 31.7.2013 kl. 13:54]

Merkilegt að Gunnar Heiðarsson hafi aldrei komið auga á kísilverið á Grundartanga!

-Hann telur að þar sé aðeins að finna sk "Járnblendiverksmiðju"

!

Gunnar til upplýsingar þá hefur lengi verið starfrækt verksmiðja á Grundartanga sem framleiðir kísilmálm (Si) úr steintegundinni kvartsi (SiO2).

Verksmiðja sem framleiðir kísilmálm úr kísiloxíði er sannkallað kísilver á sama hátt og verksmiðja sem framleiðir ál úr áloxíði er jafnan nefnd álver.

Vert er að benda Gunnari á að 3 slík álver eru starfrækt á landinu. og eru þau sýnileg úr veulegri fjarlægð.

[Árni Gunnarsson, 31.7.2013 kl. 14:41]

"Sannleikurinn er áreiðanlega til en það hefur bara engum tekist að koma auga á hann ennþá".

[Jón Ingi Cæsarsson, 1.8.2013 kl. 15:33]

Núverandi stjórnarflokkar segjast ætla að drífa upp álver í Helguvík, horfa ekkert annað.

[Einar Karl, 1.8.2013 kl. 19:53]

Gott að Steini Briem sé með nákvæmlega sundurliðað hversu mikið er eftir óvirkjað af "potential" jarðhita á Reykjanesi. Þá veit hann meira en allir íslenskir jarðvísindamenn.

[Sigurður Sunnanvindur (IP-tala skráð) 2.8.2013 kl. 13:30]

Kísilverksmiðja á Bakka verður tryggð af Viðlagatryggingum Íslands.

Þar með er það almenningur sem fær skellinn ef verksmiðjan skemmist í hörðum jarðskjálfta en fram hefur komið a verksmiðjulóðin er ein hættulegasta byggingarlóð á landinum

Ef verksmiðjan gengur vel fær almenningur hinsvegar ekki arðinn.

Þetta fyrirkomulag er ekki ásættanlegt