Góð auglýsing fyrir Airbus.

Svo lengi sem ég man eftir, eða frá því um 1960, hefur það verið skilyrði bifreiðaeftirlitsins fyrir því að þrír farþega megi vera í aftursæti bíls, að hver þeirra hafi yfir 43 sentimetra breidd að ráða, þ. e. 17 tommum.

Sama ákvæði um lágmarksbreidd sæta gilti um flugvélar.

Þegar hönnuðir Airbus fór að hanna flugvélar verksmiðjunnar, allt frá ATR 42 og upp úr, ákváðu þeir að auka þessa breidd upp í 18 tommur eða tæpa 46 sentimetra, og ég hef áður bloggað um þetta atriði.

Í flugvél með sex sætum í hverri röð þýðir þetta að skrokkbreidd vélarinnar er 15,3 sentimetrum meiri en hjá Boeing og maður finnur fyrir því, þótt ótrúlegt sé, rétt eins og maður finnur fyrir þessu í fullskipuðu aftursæti bíla, eins og ég hef áður fjallað um hér á síðunni.

Vonandi er rannsóknin á vegum Airbus gerð af óhlutdrægni, en betra hefði samt verið að einhver annar aðili hefði gert hana, því að útkoman varð fyrirsjáanlega Airbus í hag.  

Ein tomma skiptir miklu máli

Athugasemdir

[Haukur Kristinsson (IP-tala skráð) 31.10.2013 kl. 09:15]

Í september flaug ég með Icelandair (Boeing) til Frankfurt og tveimur vikum síðar með Swiss (Airbus) til Grikklands. Og eins og Ómar réttilega segir, munurinn er ekki mikill mældur í sentímetrum, en fyrir farþegann ótrúlega meiri þægindi.

Mér leið eins og ég væri í Business Class í Airbus vélinni. Þá er bilið á milli sætisraða hjá Icelandair of stutt.

Ég tók eftir því að í þessu flugi frá KEF til FRA var ein hræða í Saga Class.

[Haukur Kristinsson (IP-tala skráð) 31.10.2013 kl. 10:02]

Smá viðbót.

Flugið frá Zürich til Aþenu, fram og til baka, var ódýrara en KEF/FRA/KEF, miðað við flugtíma. Boðið var upp á heitan mat hjá Swiss, einfaldan mjög, en engu að síður. Létt vín með matnum var gratís.

Hjá Icelandair er alltaf verið að rukka og rukka. Jafnvel fyrir að hnerra.

Þá finnst mér frekar hvimleitt þessi sala hjá stelpunum á vörum á leiðinni. Og engir kaupa nema Íslendingar, sem eru að koma úr Duty-free shop á leiðinni í Duty-free shop. Þær græða víst nokkra hundraðkalla á þessu bauki.