Hálf öld frá hröðustu og stærstu kuldasveiflunni.

Síðastliðið vor var liðin rétt hálf öld síðan slíkt norðanáhlaup reið yfir landið að vori til að ekkert viðlíka hefur komið síðan.

Áhlaupið í apríl 1963 var svo slæmt vegna þess að það höfðu verið það mikil hlýindi á undan, að komið var brum á tré og gras farið að grænka, jafnvel að springa út blóm og gróður þar sem skjól var.

Á örfáum klukkustundum féll hitinn um meira en 20 stig, úr nokkurra stiga hita í hörkufrost ! Áhlaupið stóð í nokkra daga og olli meiri skemmdum á gróðri að vori til en orðið hafa í líkast til heila öld.

Jólaáhlaupið nú getur ekki orðið eins slæmt og vorhretið 1963 að því leyti til að enginn nýgræðingur getur farið illa út úr því á þessum árstíma. Vonandi falla ekki skæð snjóflóð eins og gerðist í tvígang árið 1995.

Gæti orðið dýpsta lægð 21. aldar

Athugasemdir

[Árni Tryggvason (IP-tala skráð) 22.12.2013 kl. 23:16]

Fyrsti andardráttur undirritaðs utanhúss var í þessu fræga veðri.

Sem sagt, foreldrar mínir fóru með mig heim af fæðingadeildinni þegar veðrið var í sínum versta ham í þessu fræga hreti. Oft hef ég fengið að heyra og er sannfærður um að þar sé skýringin fengin á dálæti mínu á snjó, fjöllum og vetraríþróttum.

En þess má líka geta að páskahretið fræga '63 beit norðlendinga ekki eins fast og sunnlendinga. Stór hluti trjágróðurs drapst hérna megin á landinu. Margir halda að hávöxnu trén á Akureyri séu orsök betra veðurfars. Skýringin er að jafnaldrar þeirra á SV-landi drápust í þessari gríðarlegu kuldasveiflu sem átti sér stað. Á nokkrum klst. fór hitinn úr +15° niður í -20°. Þetta þoldu fáar plöntur en fyrir norðan var gróðurinn ekki farinn að taka við sér þegar veðrið brast á þar sem ekki hafði verið jafn hlýtt þar.

[Sigurður Þór Guðjónsson, 22.12.2013 kl. 23:27]

Í kjölfar hretsins vorið 1963 fórst svo flugvélin Hrimfaxi í Ósló.  Sumir vilja reyndar meina að þetta hret hafi verið eins konar fyrirboði hafásáranna ásamt nokkrum öðrum einkennilegum veðurfyrirboðum á þeim árum ofan í áratuga hlýindi.

[Þorsteinn Briem, 23.12.2013 kl. 00:08]

Inn Eyjafjörðinn kemur oft ískaldur vindur norðan úr ballarhafi og víða á Tröllaskaganum á milli Eyjafjarðar og Skagafjarðar er ekkert sólskin mánuðum saman á veturna vegna hárra fjalla, líkt og til að mynda á Ísafirði.

Gríðarleg snjókoma er einnig oft við Eyjafjörð, eins og til dæmis á Dalvík síðastliðinn vetur.

[Þorsteinn Briem, 23.12.2013 kl. 00:50]

Sumrin (júní, júlí og ágúst) 2001-2012 var meðalhitinn hærri í Reykjavík en á Akureyri, samkvæmt mælingum Veðurstofu Íslands.

Í Reykjavík var á þessum árum meðalhitinn í júní um 0,7 stigum hærri en á Akureyri, í júlí um 0,6 stigum hærri og í ágúst einnig um 0,6 stigum hærri.

Meðalhiti á Íslandi eftir mánuðum 1961-1990 - Kort

[Halldór Egill Guðnason, 23.12.2013 kl. 03:26]

Ég hef nú eiginlega lítið annað gert undanfarna vetur, en kennt í brjósti um landa mína Norðanlands, sem mátt hafa þolað hvern harðindaveturinn á fætur öðrum, meðan spjátrungur eins og ég, hef nánast vaðið hvern veturinn á fætur öðrum á sandölum hér sunnanlands, nema svona rétt, inn á milli.......

Væri sennilega ekki slæm hugmynd að slá saman í athvarf á Austfjörðum og hafa það frekar í stærri kantinum, því þar mun sólin skína skærast, næstu sumur)

Yndislegt hvað veðrið er, þrátt fyrir allt, stór hluti af ökkur öllum.

Kveðja að sunnan og gleðileg jól.

[Sigurður Antonsson, 23.12.2013 kl. 11:06]

Jólaspámennska getur farið út í öfgar. Samkvæmt sjálfvirkri spá átti að vera snjókoma á Faxaflóasvæðinu í dag og hiti um frostmark. Atlandshafsspákortið sýnir heita lægð koma úr suðri fyrir austan land. Alls óvíst er hvort hún verður eins kraftmikill og spámenn greina frá.