Gaman væri að bera þetta saman við 1979.

Í viðbót við það sem Einar Sveinbjörnsson veðurfræðingur upplýsir í tengdri frétt á mbl.is má nefna það, að Trausti Jónsson hefur upplýst á bloggsíðu sinni að hann muni ekki eftir jafnmörgum lægðum dýpri en 930 millibör á jafn stuttum tíma og verið hefur undanfarið. Þess má geta að lægsti loftþrýstingur sem mælst hefur á Íslandi var 920 millibör (hectopascals)  

Trausti er iðinn við veðurfarskannanir aftur í tímann á Veðurstofunni og gaman væri ef hann hefði tíma til að bera þessa langvarandi hlýju norðan- og norðaustanátt saman við hið óvenjulega veðurfar árið 1979, sem mig grunar að hafi verið kaldasta ár 20. aldarinnar eftir 1920.

Árið 1979 voru austan- og norðaustanáttir alveg sérstaklega algengar, en andstætt því, sem nú er, voru þær sérlega kaldar og áttu mestan þátt í einstakri hafísmyndun og harðindum 1979 og svo köldu árferði að vetur gekk í garð á Grímsstöðum á Fjöllum með snjóum í september, en gagnstætt því sem gerst hefur bæði 2013 og 2012, hlýnaði nær ekkert eftir það.

Annað vakti athygli mína 1979: Ég held að það hafi aðeins tvisvar gerst allt árið, að það kæmi suðvestanátt í Reykjavík. Gaman væri ef Trausti gæti fundið út, hvort þetta hefur gerst nokkurt annað ár síðan 1950.

Lægðirnar fóru svo sunnarlega yfir Atlantshafið árið 1979 að kuldaskilin, sem jafnan fara yfir landið á eftir suðaustanáttinni, komust aldrei svona norðarlega.

Veðrið var því mánuðum saman þannig að það hvessti og rigndi á suðaustan með landsynningi, en síðan færðist vindurinn til norðanáttar með kuldarigningu eða snjókomu fyrir norðan, eftir því hvort þetta gerðist að sumri eða vetri.

Ég minnist þess heldur ekki síðan ég fór að fylgjast með veðrinu um 1950 að norðanáttin hafi verið svona hlý vikum saman að vetrarlagi.

Öfgarnar í veðrinu eru sannarlega miklar samanber kuldana í Bandaríkjunum, það hve hlýtt árið 2013 var í Ástralíu og það, að nú eru hlýindi og rigning í Moskvu og ég hef verið að fylgjast með því undanfarnar vikur að hinn illræmdi kaldi rússneski vetur lætur enn bíða eftir sér þótt komið sé fram yfir áramót.  

Veðurkerfin standa á haus

Athugasemdir

[Sigurður Þór Guðjónsson, 6.1.2014 kl. 01:02]

Síberíukuldinn hefur ekkert látið bíða eftir sér með meira en 50 stiga frosti í Norlisk og Agata, miklu vestar en venjulega. Hann getur herjað á Evrópu þegar honum þóknast. Það er alveg nóg af honum.

[E (IP-tala skráð) 6.1.2014 kl. 09:33]

Sigurður Þór; Ég þykist vita að Trausti myndi vísa á þig varðandi það, sem ÓR spyr um, ertu ekki til í að koma með þessar upplýsingar? Veit að þú hefur þær tiltækar.

[Ómar Ragnarsson, 6.1.2014 kl. 19:39]

Takk, Sigurður. Þetta sýnir hve stutt er á milli "haustrigningar" í Moskvu og Síberíukuldans.