"Ristilspeglun indæl er..."

Okkur þykir ekkert tiltökumál, þótt við fylgjumst með ástandi pústkerfisins undir bílum okkar, enda þurfa þau að fara í gegnum reglubundnar bílaskoðanir svo að allt sé í lagi.

Hins vegar er eins og við séum eitthvað feimin við eigið "pústkerfi" og tölum um "óæðri endann" á  okkur. Og líkast til geta flestir forðast það allt sitt líf að ristillinn sé skoðaður en eðlilegra þykir að skoða önnur atriði í líkama okkar.

Þetta, ásamt tregðu til að skoða blöðruhálskirtil í sama mæli og legháls hjá konum, veldur því að dánartíðni vegna sjúkdóma í "kjallaranum" er hærri en hún þyrfti að vera.

Ég hef farið í þrjár ristilspeglanir, sem raunar hafa verið skoðanir á öllum meltingarveginum, og játa það að ef það hefði ekki verið vegna bakflæðis og annarra kvilla, auk atriða í tveimur læknisskoðunum á ári hverju vegna atvinnuflugmannsréttinda, hefði ég líklega aldrei farið í þessar skoðanir.

Eftir reynsluna af þremur slíkum skoðunum sýnist mér að manni hætti til að mikla fyrir sér óþægindin við þær, enda alltaf hægt að finna eitthvað spaugilegt eða jákvætt við þær.

Til dæmis fannst mér á sínum tíma svokallað "viðrekstrarherbergi" í St. Jósepsspítalanum sáluga í Hafnarfirði, og fannst mér þetta frábæra herbergi eitt réttlæta mótmæli mín við því að hann yrði lagður niður.

Ég tjáði ánægju mína þegar ég var þar síðast, með því að skilja eftir þessa vísu til læknisins:

Ristilspeglun indæl er 

með útkomunni glæstri.

Ánægður ég þakka þér

með þarmalúðrablæstri.  

Takið þið eftir hvað nýyrðið "þarmalúður" er miklu jákvæðara og tignarlegra en endaþarmur.

Hvað ef ein flugvél myndi farast?

Athugasemdir

[Þorsteinn Briem, 21.1.2014 kl. 20:36]

Þrýstinn endaþarmurinn,
þar er röð og regla,
gamall þó sé garmurinn,
gleði endurspegla.

[Haukur Kristinsson (IP-tala skráð) 21.1.2014 kl. 20:52]

Flottur, Steini!

[Bjarni Gunnlaugur (IP-tala skráð) 21.1.2014 kl. 21:03]

Kvenna að skoða brjóstin ber

 bjargar lífi ,

Ristilskoðun indæl er

einkum fyrir - ja, Ómar og fleiri sem vilja gæta að heilsunni! 

[Hucabee (IP-tala skráð) 22.1.2014 kl. 03:08]

Roto Router er þekkt í frárensilsvandræðum Pípari óskast uppmælinig í boði

Fór í eina slíka um daginn í USA Voru 9 píparar að verki og sýndist mér hver afgreiða 5-8 Kvikindi á klukkustund.Tryggingarfélög borga þar sem þetta er talið borga sig.

Mæli með hafragraut og Citrusel og frárennslið eins og Guðni vill hafa það

[Jón Logi (IP-tala skráð) 22.1.2014 kl. 12:21]

Magaspeglun og sýnataka (klórað) úr vélinda er helv. ógeðsleg. En....sé bakflæði í gangi er nauðsynlegt að átta sig á þessu.