Hvað um Peking ´08, Moskvu '80, Berlín '36, Los Angeles '32 o. s. frv..?

Þegar rætt er um sniðgöngu á Ólympíuleikunum í Sochy er rétt að skoða fortíðina í þessum málum til að átta sig á því, hvort og þá hvernig eigi að blanda saman íþróttum og stjórnmálum.

Ógöngurnar, sem slíkt getur leitt af sér, sjást til dæmis á því þegar ýmsar vestrænar þjóðir sniðgengu Ólympíuleikana í Moskvu 1980 og eyðilögðu þá í raun, vegna þess að Rússar höfðu árið áður ráðist inn í Afganistan til að fást við Mujaheddin múslima þar, sálufélaga Talibana.

Í því stríði studdu Bandaríkjamenn Talíbana með hernaðaraðstoð til þess að flæma Rússa í burtu, en aðeins 12 árum síðar réðust Bandaríkjamenn inn í Afganistan til þess að berjast við þessa fyrrum skjólstæðinga sína.  

Rússar og taglhnýtingar þeirra hefndu sín með því að eyðileggja Ólympíleikana í Los Angeles 1984.

Íslendingar sendu fólk á báða þessa leika, sem betur fór.

Mannréttindabrot eru líkast til öllu meiri í einræðisríkinu Kína en í Rússlandi en samt eru Íslendingar hreyknir af handboltalandsliðinu, sem fór til Peking 2008 og nældi sér í silfurverðlaun að viðstöddum forseta vorum. Þangað fóru nefnilega íslenskir ráðamenn og bandarískir líka.

Á þessu ári eru 25 ár frá því að valdhafarnir þar slátruðu stúdentum á Torgi hins himeska í þeirri sömu borg og hafa ekki slakað á alræðiskló kommúnistaflokksins síðan.  

1936 voru Ólympíuleikarnir haldnir í Berlín í landi þar sem einræðisherrann Hitler hélt þá þegar uppi kúgun og ofsóknum.

1932 voru leikarnir haldnir í Los Angeles í ríki þar sem mannréttindi blökkumanna voru enn víða fótum troðin.

Leikarnir voru haldnir í París, London og Amsterdam á þeim tíma sem þetta voru höfuðborgir nýlenduvelda sem beittu fjarlægar þjóðir harðræði.  

 

Gagnrýndu Rússlandsför ráðherra

Athugasemdir

[Þorsteinn Briem, 23.1.2014 kl. 22:21]

Þjóðum og einstaklingum er væntanlega í flestum tilvikum í sjálfsvald sett hvort þeir taka þátt í eða eru áhorfendur á Ólympíuleikum.

Og ef menn vilja mótmæla einhverju með því að taka ekki þátt í leikunum geta þeir það að sjálfsögðu.

Í kommúnistaríkjunum er hins vegar auðvelt að banna hitt og þetta, þar á meðal í Kína, þar sem mörlenski presidentinn er með annan fótinn og hlær við sínum hjartans vinum.

[Jens Ívar (IP-tala skráð) 23.1.2014 kl. 22:36]

Ég er að vissu leyti sammála þér Ómar en það sem er að gerast í Rússlandi er afturför. Nýleg lög sem hafa verið sett á banna jákvæðan fréttaflutning af LBGT einstaklingum. Það er verið að stíga skref aftur á bak í mannréttindum þar í landi. Og þetta land er hliðiná Evrópu og margir myndu segja að sé vestrænt ríki (annað en Kína).

Þannig að ég skil hvers vegna margir eru að mótmæla svona harðlega Sochi.

[Ómar Ragnarsson, 24.1.2014 kl. 00:37]

Já, Jens, það er málið, að láta í sér heyra og mótmæla. Það sögðust menn hafa gert í Peking 2008 en ekki er að sjá að forseti okkar hafi látið heyra í sér múkk í heimsókn til Shri Lanka, þar sem við völd er ríkisstjórn sem fékk óáreitt frá alþjóðasamfélaginu að strádrepa uppeisnarmenn í blóðbaði fyrir nokkrum árum og viðheldur mannréttindabrotum.