Það vantar svona mann í "reitaboltann."

"Reitaboltinn" svokallaði, sem Barcelona og fleiri stórlið hafa stundað með góðum árangri, gengur í gegnum sína mestu eldraun þessi misserin. 

Ýmis spakmæli liggja að baki reitaboltanum og eitt þeirra er það, að "meðan andstæðingurinn er ekki með boltann, skorar hann ekki."

Þar með er það orðið keppikefli að halda boltanum í umferð hjá liði reitaboltans og komast í ótrúlegar prósentutölur hvað það varðar, jafnvel í 60 af 90 mínútum.

Þetta er svipað og var í handboltanum hér áður, þar sem sum lið komust upp með ógurlega langar sóknir sem höfðu svæfandi áhrif á andstæðingana og gáfu færi á að velja sér mjög gaumgæfilega úr þeim skotfærum sem buðust.

Þetta fyrirbrigði fékk verðskuldaða deyfingu með reglunni um lengd sókna og heimild til að dæma leiktafir.

Reitaboltinn, að allir leikmenn séu hlekkir í leikskipulagi sem gengur út á það að sem flestir séu "fríir" til að taka á móti boltanum og senda hann til samherja í næsta reit eða auðu svæði, gengur hins vegar ekki upp ef enginn leikmaður hefur hæfileikana til að leika á andstæðingana, splundra vörn þeirra og búa sér til marktækifæri til að skora. 

Boltinn er gefinn á slikan mann til að klára spilið þegar vörn andstæðinganna er svo góð að enginn reitabolti dugar.  

Þess vegna hefur Lionel Messi verið svo mikilvægur fyrir lið Barcelona, og þegar hann er ekki upp á sitt besta er liðið í vandræðum. 

Neymar var ráðinn til liðsins til að tvíefla ógnunina og geta tekið við hlutverki Messis, en er enn kornungur og hefur ekki náð hámarki getu sinnar.

Hann sýndi það hins vegar í fyrsta leik Brassanna að hann getur skorað mark af nákvæmnissnilld upp á eigin spýtur.   

Luis Suárez er greinilega maðurinn sem Barcelona vantar og með sama áframhaldi verður hann hugsanlega dýrasti leikmaður heims.   

Fer Suárez til Barcelona?

Athugasemdir

[Theódór Norðkvist, 20.6.2014 kl. 21:21]

Það er málið, tiki-taka leikstíllinn krefst mikillar leikni, tækni og hraða. Miðjuspilið hjá Spáni  hefur byggst mikið á Xavi og Iniesta. Farið er að hægjast á Xavi og hann er ekki eins góður og hann var. Iniesta stendur enn nokkurn veginn fyrir sínu, en aðrir leikmenn landsliðsins eru einfaldlega ekki nógu góðir og nokkrir leikmenn liðsins komnir yfir þrítugt. Sama er hægt að segja um Barcelona, en mögulega mun nýtt blóð einhverju breyta og með nýjum mönnum leikstíllinn breytast líka.