Holurnar stækka og dýpka sífellt og þeim fjölgar.

Í meira en 40 ár hefur Kjalvegur aldrei verið eins slæmur og nú.Það get ég fullyrt eftir kynni við hann öll þessi ár, nú síðast í gær.

Þessa dagana er miklu meiri umferð um veginn en áður og fjöldinn allur af rútum fer reglulega um hann.

Ástæðan er sú að vegurinn er, þrátt fyrir allt, fær öllum fólksbílum, ef ekið er hægt og með mikilli aðgát, og það er því auðveldara fyrir ferðafólk, sem vill aka um islenska hálendið, að velja Kjöl heldur en Sprengisand, enda ekki lengur yfir neinar úbrúaðar ár að fara á Kili og leiðin mun styttri en Sprengisandsleið.

Þar að auki er ekkert svæði við Sprengisandsleið, sem hægt er að aka að og líkist Hveravöllum eða Kerlingarfjöllum.   

Gamli vegurinn, sem liggur frá Hvítárbrú við Hvítárvatn og norður fyrir Hveravelli, er kominn á það stig að það er ekki hægt að hefla hann, nema rífa hið þjappaða undirlag hans upp og velta með því steinum upp á yfirborðið.

Sums staðar eru holurnar ekki holur heldur gímöld.

Spurningin er hvaða markhópi eigi að þjóna. Ef sá markhópur er fólk, sem þráir ögrandi og tvísýnt viðfangsefni í akstri um íslenska hálendið og hefur nægan tíma til að hossast á lafhægri ferð um óveg, er Kjalvegur í núverandi ástandi eitthvað sem getur gefið því slíka upplifun.

En sá markhópur kann að vera stærri sem myndi vilja fá ögn þægilegri og ánægjulegri ferð um sléttan óupphleyptan malarveg.

Til þess að hægt sé að bjóða upp á slíkt þyrfti að bera ofan í núverandi veg heppilega ögn leirblandna möl, svipaða þeirri sem nú er á Bláfellshálsi.

Engin afsökun er fyrir því að hinn upphleypti vegur á nyrsta kafla leiðarinnar sé versti kaflinn og engin ástæða fyrir því að láta hið svakalega ástand hans líðast, svo fjölfarin sem þessi leið er orðin.   

 

Kjalvegur sagður „skelfilegur“

Athugasemdir

[kristinn geir steindórsson briem (IP-tala skráð) 9.7.2014 kl. 14:17]

það á að vinna í honum í sumar altaf. spurníng hve mikið á að setja í veigi sem tæplega eiga að vera heilsársveigir. þegar nóg er af vegum með takmarkað viðhald.

[Þorsteinn Briem, 9.7.2014 kl. 16:15]

10.4.2014:

Vegagerðin fær einungis 60-70% af því fé sem þarf til að viðhalda vegakerfinu

[Ómar Ragnarsson, 9.7.2014 kl. 16:26]

Rétt, Steini, og þegar staðið er frammi fyrir því að vegakerfið drabbist óhjákvæmilega niður verður að forgangsraða. Þá vaknar spurningin: Hvort er verra að hafa héraðsveg niðri í byggð nær ófæran vegna skorts á viðhaldi eða hálendisveg.

Skiljanlegt er að héraðsvegurinn verði fyrir valinu, því að útilokað er að hægt sé að sætta fólk við ástand hans. Dæmi um slíka vegi er að finna í vegakerfinu og bæði heimamenn og ferðafólk á erfitt með að sætta sig við slæmt ástand þeirra.

Einhverjir eiga hins vegar auðveldara með að sætta sig við illt ástand vegarslóða og vega uppi á hálendinu á þeim forsendum að það geti verið eins konar áskorun eða upplifun að aka eftir þeim.   

[Þorsteinn Briem, 9.7.2014 kl. 18:39]

Hossast nú um víðan völl,
veltur í margt gatið,
sorgleg er þar sagan öll,
Sigmundur á hratið.