Hefur svosem gerst áður. "Like father like son".

Það þykir fréttnæmt að ungabörn kunni að líkjast fyrrverandi kærustum kvenna. Þetta er þó ekki nýtt fyrirbæri, fjarri fer því. 

Eitt besta dæmið sem ég þekki er hálfrar aldar gamalt. Íslenskur listamaður kom fram á skemmtun á Búðum á Snæfellsnesi. Hann hafði tæpum þremur árum fyrr unnið þar um hríð en síðan farið suður.

Þegar leið á skemmtiatriði hans heyrðist kurr á einum bekknum í salnum, sem hélt áfram eftir að atriði hans lauk og hann lagði af stað til Reykjavíkur nokkru síðar.

En áður en hann var kominn langt kom lögreglubíll með blikkandi ljós á eftir honum og í bílnum var sýslumaðurinn, sem hafði verið á skemmtuninni og hafði hann sér til fylgilags fílelfda lögreglumenn.

Þeir tjáðu honum að í salnum hefði verið kona, sem hafði átt vingott við hann um skamma hríð þegar hann vann á Búðum, og væri með barnsfaðernismál á hendur honum. 

Gögnin í því máli væru svo sláandi að best yrði fyrir alla aðila að skera úr því sem fyrst með því að hann gengist við barninu.

Listamaðurinn neitaði því í fyrstu en sýslumaðurinn krafðist þess að hann kæmi með sér til baka til að standa fyrir máli sínu frammi fyrir sönnungargögnunum, enda yrði játning hans farsælustu málalokin, en málið annars tapað af hans hálfu.

Var nú ekið til baka til konu, sem hafði átt dreng fyrir tveimur árum og sýndi listamanninum hann.

Hún hafði verið á samkomunni ásamt sambýlismanni sínum, og hafði soðið upp úr hjá þeim þegar listamaðurinn birtist á sviðinu.

Ástæðan var sú, að drengurinn, sem hún hafði kennt sambýlismanni sínum, var svo ólíkur báðum "foreldrum" sínum að orð var haft á í sveitinni.

En um leið og listamaðurinn birtist á sviðinu ráku allir upp stór augu . Drengurinn var nákvæmlega eins og hann!  

Sambýlismaðurinn brást hinn versti við og sleit sambandi þeirra á staðnum með miklum látum. 

En listamaðurinn góði sá, að það var beinlínis sprenghlægilegt hve líkur drengurinn var honum og játaði því faðernið !  

 

„Barnið þitt lítur út eins og þinn fyrrverandi“

Athugasemdir

[Þorsteinn Briem, 5.10.2014 kl. 18:18]

Núverandi ríkisstjórn Framsóknarflokksins og Sjálfstæðisflokksins er alveg eins og fyrrverandi ríkisstjórnir þessara flokka.

Og faðernið er augljóst.