Þrjár asískar þotur á árinu. Tilviljun?

Þessarar spurningar væri ekki spurt ef þrjár amerískar eða þrjár evrópskar þotur hefðu farist á sama árinu. 

Ljóst er að þotan sem skotin var niður yfir austanverðri Úkraínu hefði getað verið frá fleiri heimshornum og því er ástæðulaust að taka hana með í þennan reikning. 

Þá eru eftir þessar tvær malasísku þotur sem báðar hverfa á flugi í sama heimshlutanum á sama árinu. 

Miðað við tíðni í flugi fyrir nokkrum áratugum var þó kannski ekkert skrýtnara að tvær þotur frá sama ríki færust á sama árinu nú en þá, þegar þoturnar, sem fórust á sama ári voru oft frá sama landi. 

Einhvern veginn er hægt að hafa það á tilfinningunni að frekar takist að upplýsa orsakir hvarfs þotu AirAsia félagsins en hið dularfulla hvart MH 370, sem var að svo mörgu leyti svo einstakt tilfelli alveg frá upphafi. 

 

Spurt & svarað um hvarf þotunnar

Athugasemdir

[Haukur Kristinsson (IP-tala skráð) 29.12.2014 kl. 21:49]

"Miðað við tíðni í flugi fyrir nokkrum áratugum var þó kannski ekkert skrýtnara að tvær þotur frá sama ríki færust á sama árinu nú en þá, þegar þoturnar, sem fórust á sama ári voru oft frá sama landi."

"Dsjísus kræst", skil núna af hverju menn hafa áhyggjur af íslenskri tungu.

[Ómar Ragnarsson, 30.12.2014 kl. 01:08]

Kær þökk, Haukur. Játa arfamistök varðandi það að safna of mörgum atriðum málsins saman í eina flókna setningu í stað þess að segja einfaldlega:

"Á árum áður fórust oft fleiri en ein flugvél frá sama ríki á sama árinu án þess að það væri talið grunsamlegt". 

Ég tiltek þetta af því að þá var yfirleitt um að ræða flugvélar frá vestrænum ríkjum en núna lyktar umræðan af vantrú á getu Asíríkja til að stunda farþegaflug. 

Í sambandi við athugasemd þína rifjast til gamans upp fyrir mér staka, sem varð til þegar Spaugstofan var sökuð um að brjóta í páskaþætti sínum bororðið um að ekki megi leggja nafn Guðs við hégóma. Vísan er svona.  

Fermingarbörn fóru hnugginn í háttinn.

Hneyksluð var þjóðin og æst. 

Og þegar Guð sá Spaugstofuþáttinn

sagði hann: Dsjísus Kræst!

Bestu hátíðakveðjur.  

[Haukur Kristinsson (IP-tala skráð) 30.12.2014 kl. 10:57]

Sömuleiðis Ómar, okkar umboðsmaður og verndari íslenskrar náttúru.

Gleðilegt nýtt ár og haltu þínu striki bæði í lofti sem á legi.

"Have a good day" og kærar kveðjur frá Sviss.