Að "toppa" á réttum tíma.

Íþróttasagan greinir frá því hvernig bestu afreksmenn hafa lent í því að "toppa" á röngum tíma.

Eftir rúmlega aldar langa reynslu á formúlan að liggja fyrir, en bestu þjálfunaraðferðirnar eru orðnar svo margbrotnar og vísindalegar að það getur enn komið fyrir færasta afreksfólk og heilu hópana að ná hámarksgetu annað hvort of snemma eða of seint.

Íslendingar bundu til dæmis miklar vonir við þátttöku Torfa Bryngeirssonar í stangarstökki á Ólympíuleikunum í Helsinki 1952. Ef ég man rétt varð hann fyrir slæmum innvortis meiðslum í aðdragandanum og það truflaði að vísu, en samt var hann á afar góðu róli í að byggja sig upp og ekki vantaði keppnisskapið, samanber það þegar hann vann stangarstökkið í sigrinum fræga á Dönum og Norðmönnum árið áður með hálbólgu og hita og setti glæsilegt Íslandsmet.

En Torfi klikkaði gersamlega í Helsinki, komst að vísu í úrslit en var langt frá sínu besta. 

Eftir leikana var farið í smá keppnisferð um Norðurlönd og þá brá svo við að Torfi stórbætti Íslandsmetið, stökk 4,35 metra, en það hefði dugað til gullverðlauna á OL í Berlín 1936.

Ragnar Lundberg Evrópumeistari í greininni, sem toppaði í Helsinki og krækti í bronsið, sagði að hann hefði ekki átt roð í Torfa þar ef hann hefði verið í þessum ham fyrr um sumarið.

Nú virðist Aníta Hinriksdóttir á uppleið í aðdragana EM og er vonandi að hún "toppi" ekki of snemma, heldur nákvæmlega á réttum tíma.   

Aníta bætti Íslandsmetið

Athugasemdir

[Alain Fréchet (IP-tala skráð) 8.2.2015 kl. 14:59]

Hi Omar, have a look at your plane in my blog, I took it as I was in Iceland with my wife in July 2012. Can you transfer it to M. Dagfinnur Stefánsson as I don't have his e-mail. I can transfer a high resolution file if you want (I have it as a poster here - in Canada).

Don't hesitate to send me an e-mail. I will be back in Reykjavik in May !

Alain

[Gunnar Th. Gunnarsson, 8.2.2015 kl. 15:17]

Mig minnir að Torfi hafi orðið fyrir meinlegu slysi sem hafði eitthvað með ferðatösku að gera... hvort hann tók hana upp og tognaði, man ekki alveg en held að það hafi ekkert haft með að toppa of snemma að gera.

Gott dæmi er um að toppa of snemma var íslenska landsliðið í handbolta fyrir ÓL í Seúl 1988. Þá var Bogdan þjálfari. Rétt fyrir mót unnum við Rússa í Laugardalshöllinni og það var fyrsti tapleikur þeirra í tæp tvö ár. Þetta rússneska lið var klárlega eitt besta handboltalið sögunnar, með örvhentu skyttuna Tuchskin, línumannströllið Atavin og Lavrov í markinu. 

 Styrkleikalisti Alþjóðahandknattleikssambandsins setti Ísland í fjórða sæti heimslistans skömmu fyrir leikana og því urðu vonbrigðin mikil með árangurinn.

[Ómar Ragnarsson, 8.2.2015 kl. 16:08]

Nei, það var Örn Clausen sem tognaði við það að vippa þungri ferðatösku upp í hilli. Maginn sprakk hins vegar í Torfa ef ég man rétt. 

[Gunnar Th. Gunnarsson, 8.2.2015 kl. 16:15]

Ok, takk fyrir leiðréttinguna